Utshovঅধ্যায় 206
206.1
বৈশংপায়ন উবাচ
তং প্রয়ান্তং মহাবাহুং কৌরবাণাং যশস্করম্
অনুজগ্মুর্মহাত্মানো ব্রাহ্মণা বেদপারগাঃ
206.2
বেদবেদাঙ্গবিদ্বাংসস্তথৈবাধ্যাত্মচিন্তকাঃ
চৌক্ষাশ্চ ভগবদ্ভক্তাঃ সূতাঃ পৌরাণিকাশ্চ যে
206.3
কথকাশ্চাপরে রাজঞ্শ্রমণাশ্চ বনৌকসঃ
দিব্যাখ্যানানি যে চাপি পঠন্তি মধুরং দ্বিজাঃ
206.4
এতৈশ্চান্যৈশ্চ বহুভিঃ সহায়ৈঃ পাণ্ডুনন্দনঃ
বৃতঃ শ্লক্ষ্ণকথৈঃ প্রায়ান্মরুদ্ভিরিব বাসবঃ
206.5
রমণীয়ানি চিত্রাণি বনানি চ সরাংসি চ
সরিতঃ সাগরাংশ্চৈব দেশানপি চ ভারত
206.6
পুণ্যানি চৈব তীর্থানি দদর্শ ভরতর্ষভ
স গঙ্গাদ্বারমাসাদ্য নিবেশমকরোত্প্রভুঃ
206.7
তত্র তস্যাদ্ভুতং কর্ম শৃণু মে জনমেজয়
কৃতবান্যদ্বিশুদ্ধাত্মা পাণ্ডূনাং প্রবরো রথী
206.8
নিবিষ্টে তত্র কৌন্তেয়ে ব্রাহ্মণেষু চ ভারত
অগ্নিহোত্রাণি বিপ্রাস্তে প্রাদুশ্চক্রুরনেকশঃ
206.9
তেষু প্রবোধ্যমানেষু জ্বলিতেষু হুতেষু চ
কৃতপুষ্পোপহারেষু তীরান্তরগতেষু চ
206.10
কৃতাভিষেকৈর্বিদ্বদ্ভির্নিয়তৈঃ সত্পথি স্থিতৈঃ
শুশুভেঽতীব তদ্রাজন্গঙ্গাদ্বারং মহাত্মভিঃ
206.11
তথা পর্যাকুলে তস্মিন্নিবেশে পাণ্ডুনন্দনঃ
অভিষেকায় কৌন্তেয়ো গঙ্গামবততার হ
206.12
তত্রাভিষেকং কৃত্বা স তর্পয়িত্বা পিতামহান্
উত্তিতীর্ষুর্জলাদ্রাজন্নগ্নিকার্যচিকীর্ষয়া
206.13
অপকৃষ্টো মহাবাহুর্নাগরাজস্য কন্যয়া
অন্তর্জলে মহারাজ উলূপ্যা কাময়ানয়া
206.14
দদর্শ পাণ্ডবস্তত্র পাবকং সুসমাহিতম্
কৌরব্যস্যাথ নাগস্য ভবনে পরমার্চিতে
206.15
তত্রাগ্নিকার্যং কৃতবান্কুন্তীপুত্রো ধনংজয়ঃ
অশঙ্কমানেন হুতস্তেনাতুষ্যদ্ধুতাশনঃ
206.16
অগ্নিকার্যং স কৃত্বা তু নাগরাজসুতাং তদা
প্রহসন্নিব কৌন্তেয় ইদং বচনমব্রবীৎ
206.17
কিমিদং সাহসং ভীরু কৃতবত্যসি ভামিনি
কশ্চায়ং সুভগো দেশঃ কা চ ত্বং কস্য চাত্মজা
206.18
উলূপ্যুবাচ
ঐরাবতকুলে জাতঃ কৌরব্যো নাম পন্নগঃ
তস্যাস্মি দুহিতা পার্থ উলূপী নাম পন্নগী
206.19
সাহং ত্বামভিষেকার্থমবতীর্ণং সমুদ্রগাম্
দৃষ্টবত্যেব কৌন্তেয় কন্দর্পেণাস্মি মূর্চ্ছিতা
206.20
তাং মামনঙ্গমথিতাং ত্বত্কৃতে কুরুনন্দন
অনন্যাং নন্দয়স্বাদ্য প্রদানেনাত্মনো রহঃ
206.21
অর্জুন উবাচ
ব্রহ্মচর্যমিদং ভদ্রে মম দ্বাদশবার্ষিকম্
ধর্মরাজেন চাদিষ্টং নাহমস্মি স্বয়ংবশঃ
206.22
তব চাপি প্রিয়ং কর্তুমিচ্ছামি জলচারিণি
অনৃতং নোক্তপূর্বং চ ময়া কিংচন কর্হিচিৎ
206.23
কথং চ নানৃতং তত্স্যাত্তব চাপি প্রিয়ং ভবেৎ
ন চ পীড্যেত মে ধর্মস্তথা কুর্যাং ভুজংগমে
206.24
উলূপ্যুবাচ
জানাম্যহং পাণ্ডবেয় যথা চরসি মেদিনীম্
যথা চ তে ব্রহ্মচর্যমিদমাদিষ্টবান্গুরুঃ
206.25
পরস্পরং বর্তমানান্দ্রুপদস্যাত্মজাং প্রতি
যো নোঽনুপ্রবিশেন্মোহাত্স নো দ্বাদশবার্ষিকম্
বনে চরেদ্ব্রহ্মচর্যমিতি বঃ সময়ঃ কৃতঃ
206.26
তদিদং দ্রৌপদীহেতোরন্যোন্যস্য প্রবাসনম্
কৃতং বস্তত্র ধর্মার্থমত্র ধর্মো ন দুষ্যতি
206.27
পরিত্রাণং চ কর্তব্যমার্তানাং পৃথুলোচন
কৃত্বা মম পরিত্রাণং তব ধর্মো ন লুপ্যতে
206.28
যদি বাপ্যস্য ধর্মস্য সূক্ষ্মোঽপি স্যাদ্ব্যতিক্রমঃ
স চ তে ধর্ম এব স্যাদ্দত্ত্বা প্রাণান্মমার্জুন
206.29
ভক্তাং ভজস্ব মাং পার্থ সতামেতন্মতং প্রভো
ন করিষ্যসি চেদেবং মৃতাং মামুপধারয়
206.30
প্রাণদানান্মহাবাহো চর ধর্মমনুত্তমম্
শরণং চ প্রপন্নাস্মি ত্বামদ্য পুরুষোত্তম
206.31
দীনাননাথান্কৌন্তেয় পরিরক্ষসি নিত্যশঃ
সাহং শরণমভ্যেমি রোরবীমি চ দুঃখিতা
206.32
যাচে ত্বামভিকামাহং তস্মাত্কুরু মম প্রিয়ম্
স ত্বমাত্মপ্রদানেন সকামাং কর্তুমর্হসি
206.33
বৈশংপায়ন উবাচ
এবমুক্তস্তু কৌন্তেয়ঃ পন্নগেশ্বরকন্যয়া
কৃতবাংস্তত্তথা সর্বং ধর্মমুদ্দিশ্য কারণম্
206.34
স নাগভবনে রাত্রিং তামুষিত্বা প্রতাপবান্
উদিতেঽভ্যুত্থিতঃ সূর্যে কৌরব্যস্য নিবেশনাৎ