অধ্যায় 207

207.1

বৈশংপায়ন উবাচ
কথয়িত্বা তু তত্সর্বং ব্রাহ্মণেভ্যঃ স ভারত
প্রয়য়ৌ হিমবত্পার্শ্বং ততো বজ্রধরাত্মজঃ

অগস্ত্যবটমাসাদ্য বসিষ্ঠস্য চ পর্বতম্
ভৃগুতুঙ্গে চ কৌন্তেয়ঃ কৃতবাঞ্শৌচমাত্মনঃ

প্রদদৌ গোসহস্রাণি তীর্থেষ্বায়তনেষু চ
নিবেশাংশ্চ দ্বিজাতিভ্যঃ সোঽদদত্কুরুসত্তমঃ

হিরণ্যবিন্দোস্তীর্থে চ স্নাত্বা পুরুষসত্তমঃ
দৃষ্টবান্পর্বতশ্রেষ্ঠং পুণ্যান্যায়তনানি চ

অবতীর্য নরশ্রেষ্ঠো ব্রাহ্মণৈঃ সহ ভারত
প্রাচীং দিশমভিপ্রেপ্সুর্জগাম ভরতর্ষভঃ

আনুপূর্ব্যেণ তীর্থানি দৃষ্টবান্কুরুসত্তমঃ
নদীং চোত্পলিনীং রম্যামরণ্যং নৈমিষং প্রতি

নন্দামপরনন্দাং চ কৌশিকীং চ যশস্বিনীম্
মহানদীং গয়াং চৈব গঙ্গামপি চ ভারত

এবং সর্বাণি তীর্থানি পশ্যমানস্তথাশ্রমান্
আত্মনঃ পাবনং কুর্বন্ব্রাহ্মণেভ্যো দদৌ বসু

অঙ্গবঙ্গকলিঙ্গেষু যানি পুণ্যানি কানিচিৎ
জগাম তানি সর্বাণি তীর্থান্যায়তনানি চ
দৃষ্ট্বা চ বিধিবত্তানি ধনং চাপি দদৌ ততঃ

কলিঙ্গরাষ্ট্রদ্বারেষু ব্রাহ্মণাঃ পাণ্ডবানুগাঃ
অভ্যনুজ্ঞায় কৌন্তেয়মুপাবর্তন্ত ভারত

স তু তৈরভ্যনুজ্ঞাতঃ কুন্তীপুত্রো ধনংজয়ঃ
সহায়ৈরল্পকৈঃ শূরঃ প্রয়য়ৌ যেন সাগরম্

স কলিঙ্গানতিক্রম্য দেশানায়তনানি চ
ধর্ম্যাণি রমণীয়ানি প্রেক্ষমাণো যয়ৌ প্রভুঃ

মহেন্দ্রপর্বতং দৃষ্ট্বা তাপসৈরুপশোভিতম্
সমুদ্রতীরেণ শনৈর্মণলূরং জগাম হ

তত্র সর্বাণি তীর্থানি পুণ্যান্যায়তনানি চ
অভিগম্য মহাবাহুরভ্যগচ্ছন্মহীপতিম্
মণলূরেশ্বরং রাজন্ধর্মজ্ঞং চিত্রবাহনম্

তস্য চিত্রাঙ্গদা নাম দুহিতা চারুদর্শনা
তাং দদর্শ পুরে তস্মিন্বিচরন্তীং যদৃচ্ছয়া

দৃষ্ট্বা চ তাং বরারোহাং চকমে চৈত্রবাহিনীম্
অভিগম্য চ রাজানং জ্ঞাপয়ত্স্বং প্রয়োজনম্
তমুবাচাথ রাজা স সান্ত্বপূর্বমিদং বচঃ

রাজা প্রভংকরো নাম কুলে অস্মিন্বভূব হ
অপুত্রঃ প্রসবেনার্থী তপস্তেপে স উত্তমম্

উগ্রেণ তপসা তেন প্রণিপাতেন শংকরঃ
ঈশ্বরস্তোষিতস্তেন মহাদেব উমাপতিঃ

স তস্মৈ ভগবান্প্রাদাদেকৈকং প্রসবং কুলে
একৈকঃ প্রসবস্তস্মাদ্ভবত্যস্মিন্কুলে সদা

তেষাং কুমারাঃ সর্বেষাং পূর্বেষাং মম জজ্ঞিরে
কন্যা তু মম জাতেয়ং কুলস্যোত্পাদনী ধ্রুবম্

পুত্রো মমেয়মিতি মে ভাবনা পুরুষোত্তম
পুত্রিকা হেতুবিধিনা সংজ্ঞিতা ভরতর্ষভ

এতচ্ছুল্কং ভবত্বস্যাঃ কুলকৃজ্জায়তামিহ
এতেন সময়েনেমাং প্রতিগৃহ্ণীষ্ব পাণ্ডব

স তথেতি প্রতিজ্ঞায় কন্যাং তাং প্রতিগৃহ্য চ
উবাস নগরে তস্মিন্কৌন্তেয়স্ত্রিহিমাঃ সমাঃ