UtshovChapter 207
207.1
वैशंपायन उवाच
कथयित्वा तु तत्सर्वं ब्राह्मणेभ्यः स भारत
प्रययौ हिमवत्पार्श्वं ततो वज्रधरात्मजः
Vaishampayana uvacha
Kathayitva tu tatsarvam brahmanebhyah sa bharata
Prayayau himavatparshvam tato vajradharatmajah
207.2
अगस्त्यवटमासाद्य वसिष्ठस्य च पर्वतम्
भृगुतुङ्गे च कौन्तेयः कृतवाञ्शौचमात्मनः
Agastyavatamasadya vasishthasya cha parvatam
Bhrigutunge cha kaunteyah kritavanshauchamatmanah
207.3
प्रददौ गोसहस्राणि तीर्थेष्वायतनेषु च
निवेशांश्च द्विजातिभ्यः सोऽददत्कुरुसत्तमः
Pradadau gosahasrani tirtheshvayataneshu cha
Niveshanshcha dvijatibhyah sodadatkurusattamah
207.4
हिरण्यबिन्दोस्तीर्थे च स्नात्वा पुरुषसत्तमः
दृष्टवान्पर्वतश्रेष्ठं पुण्यान्यायतनानि च
Hiranyabindostirthe cha snatva purushasattamah
Drishtavanparvatashreshtham punyanyayatanani cha
207.5
अवतीर्य नरश्रेष्ठो ब्राह्मणैः सह भारत
प्राचीं दिशमभिप्रेप्सुर्जगाम भरतर्षभः
Avatirya narashreshtho brahmanaih saha bharata
Prachim dishamabhiprepsurjagama bharatarshabhah
207.6
आनुपूर्व्येण तीर्थानि दृष्टवान्कुरुसत्तमः
नदीं चोत्पलिनीं रम्यामरण्यं नैमिषं प्रति
Anupurvyena tirthani drishtavankurusattamah
Nadim chotpalinim ramyamaranyam naimisham prati
207.7
नन्दामपरनन्दां च कौशिकीं च यशस्विनीम्
महानदीं गयां चैव गङ्गामपि च भारत
Nandamaparanandam cha kaushikim cha yashasvinim
Mahanadim gayam chaiva gangamapi cha bharata
207.8
एवं सर्वाणि तीर्थानि पश्यमानस्तथाश्रमान्
आत्मनः पावनं कुर्वन्ब्राह्मणेभ्यो ददौ वसु
Evam sarvani tirthani pashyamanastathashraman
Atmanah pavanam kurvanbrahmanebhyo dadau vasu
207.9
अङ्गवङ्गकलिङ्गेषु यानि पुण्यानि कानिचित्
जगाम तानि सर्वाणि तीर्थान्यायतनानि च
दृष्ट्वा च विधिवत्तानि धनं चापि ददौ ततः
Angavangakalingeshu yani punyani kanichit
Jagama tani sarvani tirthanyayatanani cha
Drishtva cha vidhivattani dhanam chapi dadau tatah
207.10
कलिङ्गराष्ट्रद्वारेषु ब्राह्मणाः पाण्डवानुगाः
अभ्यनुज्ञाय कौन्तेयमुपावर्तन्त भारत
Kalingarashtradvareshu brahmanah pandavanugah
Abhyanugyaya kaunteyamupavartanta bharata
207.11
स तु तैरभ्यनुज्ञातः कुन्तीपुत्रो धनंजयः
सहायैरल्पकैः शूरः प्रययौ येन सागरम्
Sa tu tairabhyanugyatah kuntiputro dhananjayah
Sahayairalpakaih shurah prayayau yena sagaram
207.12
स कलिङ्गानतिक्रम्य देशानायतनानि च
धर्म्याणि रमणीयानि प्रेक्षमाणो ययौ प्रभुः
Sa kalinganatikramya deshanayatanani cha
Dharmyani ramaniyani prekshamano yayau prabhuh
207.13
महेन्द्रपर्वतं दृष्ट्वा तापसैरुपशोभितम्
समुद्रतीरेण शनैर्मणलूरं जगाम ह
Mahendraparvatam drishtva tapasairupashobhitam
Samudratirena shanairmanaluram jagama ha
207.14
तत्र सर्वाणि तीर्थानि पुण्यान्यायतनानि च
अभिगम्य महाबाहुरभ्यगच्छन्महीपतिम्
मणलूरेश्वरं राजन्धर्मज्ञं चित्रवाहनम्
Tatra sarvani tirthani punyanyayatanani cha
Abhigamya mahabahurabhyagachchhanmahipatim
Manalureshvaram rajandharmagyam chitravahanam
207.15
तस्य चित्राङ्गदा नाम दुहिता चारुदर्शना
तां ददर्श पुरे तस्मिन्विचरन्तीं यदृच्छया
Tasya chitrangada nama duhita charudarshana
Tam dadarsha pure tasminvicharantim yadrichchhaya
207.16
दृष्ट्वा च तां वरारोहां चकमे चैत्रवाहिनीम्
अभिगम्य च राजानं ज्ञापयत्स्वं प्रयोजनम्
तमुवाचाथ राजा स सान्त्वपूर्वमिदं वचः
Drishtva cha tam vararoham chakame chaitravahinim
Abhigamya cha rajanam gyapayatsvam prayojanam
Tamuvachatha raja sa santvapurvamidam vachah
207.17
राजा प्रभंकरो नाम कुले अस्मिन्बभूव ह
अपुत्रः प्रसवेनार्थी तपस्तेपे स उत्तमम्
Raja prabhankaro nama kule asminbabhuva ha
Aputrah prasavenarthi tapastepe sa uttamam
207.18
उग्रेण तपसा तेन प्रणिपातेन शंकरः
ईश्वरस्तोषितस्तेन महादेव उमापतिः
Ugrena tapasa tena pranipatena shankarah
Ishvarastoshitastena mahadeva umapatih
207.19
स तस्मै भगवान्प्रादादेकैकं प्रसवं कुले
एकैकः प्रसवस्तस्माद्भवत्यस्मिन्कुले सदा
Sa tasmai bhagavanpradadekaikam prasavam kule
Ekaikah prasavastasmadbhavatyasminkule sada
207.20
तेषां कुमाराः सर्वेषां पूर्वेषां मम जज्ञिरे
कन्या तु मम जातेयं कुलस्योत्पादनी ध्रुवम्
Tesham kumarah sarvesham purvesham mama jagyire
Kanya tu mama jateyam kulasyotpadani dhruvam
207.21
पुत्रो ममेयमिति मे भावना पुरुषोत्तम
पुत्रिका हेतुविधिना संज्ञिता भरतर्षभ
Putro mameyamiti me bhavana purushottama
Putrika hetuvidhina sangyita bharatarshabha
207.22
एतच्छुल्कं भवत्वस्याः कुलकृज्जायतामिह
एतेन समयेनेमां प्रतिगृह्णीष्व पाण्डव
Etachchhulkam bhavatvasyah kulakrijjayatamiha
Etena samayenemam pratigrihnishva pandava
207.23
स तथेति प्रतिज्ञाय कन्यां तां प्रतिगृह्य च
उवास नगरे तस्मिन्कौन्तेयस्त्रिहिमाः समाः
Sa tatheti pratigyaya kanyam tam pratigrihya cha
Uvasa nagare tasminkaunteyastrihimah samah