অধ্যায় 208

208.1

বৈশংপায়ন উবাচ
ততঃ সমুদ্রে তীর্থানি দক্ষিণে ভরতর্ষভঃ
অভ্যগচ্ছত্সুপুণ্যানি শোভিতানি তপস্বিভিঃ

বর্জয়ন্তি স্ম তীর্থানি পঞ্চ তত্র তু তাপসাঃ
আচীর্ণানি তু যান্যাসন্পুরস্তাত্তু তপস্বিভিঃ

অগস্ত্যতীর্থং সৌভদ্রং পৌলোমং চ সুপাবনম্
কারংধমং প্রসন্নং চ হয়মেধফলং চ যৎ
ভারদ্বাজস্য তীর্থং চ পাপপ্রশমনং মহৎ

বিবিক্তান্যুপলক্ষ্যাথ তানি তীর্থানি পাণ্ডবঃ
দৃষ্ট্বা চ বর্জ্যমানানি মুনিভির্ধর্মবুদ্ধিভিঃ

তপস্বিনস্ততোঽপৃচ্ছত্প্রাজ্ঞলিঃ কুরুনন্দনঃ
তীর্থানীমানি বর্জ্যন্তে কিমর্থং ব্রহ্মবাদিভিঃ

তাপসা ঊচুঃ
গ্রাহাঃ পঞ্চ বসন্ত্যেষু হরন্তি চ তপোধনান্
অত এতানি বর্জ্যন্তে তীর্থানি কুরুনন্দন

বৈশংপায়ন উবাচ
তেষাং শ্রুত্বা মহাবাহুর্বার্যমাণস্তপোধনৈঃ
জগাম তানি তীর্থানি দ্রষ্টুং পুরুষসত্তমঃ

ততঃ সৌভদ্রমাসাদ্য মহর্ষেস্তীর্থমুত্তমম্
বিগাহ্য তরসা শূরঃ স্নানং চক্রে পরংতপঃ

অথ তং পুরুষব্যাঘ্রমন্তর্জলচরো মহান্
নিজগ্রাহ জলে গ্রাহঃ কুন্তীপুত্রং ধনংজয়ম্

স তমাদায় কৌন্তেয়ো বিস্ফুরন্তং জলেচরম্
উদতিষ্ঠন্মহাবাহুর্বলেন বলিনাং বরঃ

উত্কৃষ্ট এব তু গ্রাহঃ সোঽর্জুনেন যশস্বিনা
বভূব নারী কল্যাণী সর্বাভরণভূষিতা
দীপ্যমানা শ্রিয়া রাজন্দিব্যরূপা মনোরমা

তদদ্ভুতং মহদ্দৃষ্ট্বা কুন্তীপুত্রো ধনংজয়ঃ
তাং স্ত্রিয়ং পরমপ্রীত ইদং বচনমব্রবীৎ

কা বৈ ত্বমসি কল্যাণি কুতো বাসি জলেচরী
কিমর্থং চ মহত্পাপমিদং কৃতবতী পুরা

নার্যুবাচ
অপ্সরাস্মি মহাবাহো দেবারণ্যবিচারিণী
ইষ্টা ধনপতের্নিত্যং বর্গা নাম মহাবল

মম সখ্যশ্চতস্রোঽন্যাঃ সর্বাঃ কামগমাঃ শুভাঃ
তাভিঃ সার্ধং প্রয়াতাস্মি লোকপালনিবেশনম্

ততঃ পশ্যামহে সর্বা ব্রাহ্মণং সংশিতব্রতম্
রূপবন্তমধীয়ানমেকমেকান্তচারিণম্

তস্য বৈ তপসা রাজংস্তদ্বনং তেজসাবৃতম্
আদিত্য ইব তং দেশং কৃত্স্নং স ব্যবভাসয়ৎ

তস্য দৃষ্ট্বা তপস্তাদৃগ্রূপং চাদ্ভুতদর্শনম্
অবতীর্ণাঃ স্ম তং দেশং তপোবিঘ্নচিকীর্ষয়া

অহং চ সৌরভেয়ী চ সমীচী বুদ্বুদা লতা
যৌগপদ্যেন তং বিপ্রমভ্যগচ্ছাম ভারত

গায়ন্ত্যো বৈ হসন্ত্যশ্চ লোভয়ন্ত্যশ্চ তং দ্বিজম্
স চ নাস্মাসু কৃতবান্মনো বীর কথংচন
নাকম্পত মহাতেজাঃ স্থিতস্তপসি নির্মলে

সোঽশপত্কুপিতোঽস্মাংস্তু ব্রাহ্মণঃ ক্ষত্রিয়র্ষভ
গ্রাহভূতা জলে যূয়ং চরিষ্যধ্বং শতং সমাঃ