অধ্যায় 209

209.1

বর্গোবাচ
ততো বয়ং প্রব্যথিতাঃ সর্বা ভরতসত্তম
আয়াম শরণং বিপ্রং তং তপোধনমচ্যুতম্

209.2

রূপেণ বয়সা চৈব কন্দর্পেণ চ দর্পিতাঃ
অয়ুক্তং কৃতবত্যঃ স্ম ক্ষন্তুমর্হসি নো দ্বিজ

209.3

এষ এব বধোঽস্মাকং সুপর্যাপ্তস্তপোধন
যদ্বয়ং সংশিতাত্মানং প্রলোব্ধুং ত্বামিহাগতাঃ

209.4

অবধ্যাস্তু স্ত্রিয়ঃ সৃষ্টা মন্যন্তে ধর্মচিন্তকাঃ
তস্মাদ্ধর্মেণ ধর্মজ্ঞ নাস্মান্হিংসিতুমর্হসি

209.5

সর্বভূতেষু ধর্মজ্ঞ মৈত্রো ব্রাহ্মণ উচ্যতে
সত্যো ভবতু কল্যাণ এষ বাদো মনীষিণাম্

209.6

শরণং চ প্রপন্নানাং শিষ্টাঃ কুর্বন্তি পালনম্
শরণং ত্বাং প্রপন্নাঃ স্ম তস্মাত্ত্বং ক্ষন্তুমর্হসি

209.7

বৈশংপায়ন উবাচ
এবমুক্তস্তু ধর্মাত্মা ব্রাহ্মণঃ শুভকর্মকৃৎ
প্রসাদং কৃতবান্বীর রবিসোমসমপ্রভঃ

209.8

ব্রাহ্মণ উবাচ
শতং সহস্রং বিশ্বং চ সর্বমক্ষয়বাচকম্
পরিমাণং শতং ত্বেতন্নৈতদক্ষয়বাচকম্

209.9

যদা চ বো গ্রাহভূতা গৃহ্ণন্তীঃ পুরুষাঞ্জলে
উত্কর্ষতি জলাত্কশ্চিত্স্থলং পুরুষসত্তমঃ

209.10

তদা যূয়ং পুনঃ সর্বাঃ স্বরূপং প্রতিপত্স্যথ
অনৃতং নোক্তপূর্বং মে হসতাপি কদাচন

209.11

তানি সর্বাণি তীর্থানি ইতঃ প্রভৃতি চৈব হ
নারীতীর্থানি নাম্নেহ খ্যাতিং যাস্যন্তি সর্বশঃ
পুণ্যানি চ ভবিষ্যন্তি পাবনানি মনীষিণাম্

209.12

বর্গোবাচ
ততোঽভিবাদ্য তং বিপ্রং কৃত্বা চৈব প্রদক্ষিণম্
অচিন্তয়ামোপসৃত্য তস্মাদ্দেশাত্সুদুঃখিতাঃ

209.13

ক্ব নু নাম বয়ং সর্বাঃ কালেনাল্পেন তং নরম্
সমাগচ্ছেম যো নস্তদ্রূপমাপাদয়েত্পুনঃ

209.14

তা বয়ং চিন্তয়িত্বৈবং মুহূর্তাদিব ভারত
দৃষ্টবত্যো মহাভাগং দেবর্ষিমুত নারদম্

209.15

সর্বা হৃষ্টাঃ স্ম তং দৃষ্ট্বা দেবর্ষিমমিতদ্যুতিম্
অভিবাদ্য চ তং পার্থ স্থিতাঃ স্ম ব্যথিতাননাঃ

209.16

স নোঽপৃচ্ছদ্দুঃখমূলমুক্তবত্যো বয়ং চ তৎ
শ্রুত্বা তচ্চ যথাবৃত্তমিদং বচনমব্রবীৎ

209.17

দক্ষিণে সাগরানূপে পঞ্চ তীর্থানি সন্তি বৈ
পুণ্যানি রমণীয়ানি তানি গচ্ছত মাচিরম্

209.18

তত্রাশু পুরুষব্যাঘ্রঃ পাণ্ডবো বো ধনংজয়ঃ
মোক্ষয়িষ্যতি শুদ্ধাত্মা দুঃখাদস্মান্ন সংশয়ঃ

209.19

তস্য সর্বা বয়ং বীর শ্রুত্বা বাক্যমিহাগতাঃ
তদিদং সত্যমেবাদ্য মোক্ষিতাহং ত্বয়ানঘ

209.20

এতাস্তু মম বৈ সখ্যশ্চতস্রোঽন্যা জলে স্থিতাঃ
কুরু কর্ম শুভং বীর এতাঃ সর্বা বিমোক্ষয়

209.21

বৈশংপায়ন উবাচ
ততস্তাঃ পাণ্ডবশ্রেষ্ঠঃ সর্বা এব বিশাং পতে
তস্মাচ্ছাপাদদীনাত্মা মোক্ষয়ামাস বীর্যবান্

209.22

উত্থায় চ জলাত্তস্মাত্প্রতিলভ্য বপুঃ স্বকম্
তাস্তদাপ্সরসো রাজন্নদৃশ্যন্ত যথা পুরা

209.23

তীর্থানি শোধয়িত্বা তু তথানুজ্ঞায় তাঃ প্রভুঃ
চিত্রাঙ্গদাং পুনর্দ্রষ্টুং মণলূরপুরং যয়ৌ

209.24

তস্যামজনয়ত্পুত্রং রাজানং বভ্রুবাহনম্
তং দৃষ্ট্বা পাণ্ডবো রাজন্গোকর্ণমভিতোঽগমৎ

Contains text from DharmicData, made available under the Open Database License (ODbL). Simple meanings are written by AI and can contain mistakes.