অধ্যায় 210

210.1

বৈশংপায়ন উবাচ
সোঽপরান্তেষু তীর্থানি পুণ্যান্যায়তনানি চ
সর্বাণ্যেবানুপূর্ব্যেণ জগামামিতবিক্রমঃ

সমুদ্রে পশ্চিমে যানি তীর্থান্যায়তনানি চ
তানি সর্বাণি গত্বা স প্রভাসমুপজগ্মিবান্

প্রভাসদেশং সংপ্রাপ্তং বীভত্সুমপরাজিতম্
তীর্থান্যনুচরন্তং চ শুশ্রাব মধুসূদনঃ

ততোঽভ্যগচ্ছত্কৌন্তেয়মজ্ঞাতো নাম মাধবঃ
দদৃশাতে তদান্যোন্যং প্রভাসে কৃষ্ণপাণ্ডবৌ

তাবন্যোন্যং সমাশ্লিষ্য পৃষ্ট্বা চ কুশলং বনে
আস্তাং প্রিয়সখায়ৌ তৌ নরনারায়ণাবৃষী

ততোঽর্জুনং বাসুদেবস্তাং চর্যাং পর্যপৃচ্ছত
কিমর্থং পাণ্ডবেমানি তীর্থান্যনুচরস্যুত

ততোঽর্জুনো যথাবৃত্তং সর্বমাখ্যাতবাংস্তদা
শ্রুত্বোবাচ চ বার্ষ্ণেয় এবমেতদিতি প্রভুঃ

তৌ বিহৃত্য যথাকামং প্রভাসে কৃষ্ণপাণ্ডবৌ
মহীধরং রৈবতকং বাসায়ৈবাভিজগ্মতুঃ

পূর্বমেব তু কৃষ্ণস্য বচনাত্তং মহীধরম্
পুরুষাঃ সমলংচক্রুরুপজহ্রুশ্চ ভোজনম্

প্রতিগৃহ্যার্জুনঃ সর্বমুপভুজ্য চ পাণ্ডবঃ
সহৈব বাসুদেবেন দৃষ্টবান্নটনর্তকান্

অভ্যনুজ্ঞাপ্য তান্সর্বানর্চয়িত্বা চ পাণ্ডবঃ
সত্কৃতং শয়নং দিব্যমভ্যগচ্ছন্মহাদ্যুতিঃ

তীর্থানাং দর্শনং চৈব পর্বতানাং চ ভারত
আপগানাং বনানাং চ কথয়ামাস সাত্বতে

স কথাঃ কথয়ন্নেব নিদ্রয়া জনমেজয়
কৌন্তেয়োঽপহৃতস্তস্মিঞ্শয়নে স্বর্গসংমিতে

মধুরেণ স গীতেন বীণাশব্দেন চানঘ
প্রবোধ্যমানো বুবুধে স্তুতিভির্মঙ্গলৈস্তথা

স কৃত্বাবশ্যকার্যাণি বার্ষ্ণেয়েনাভিনন্দিতঃ
রথেন কাঞ্চনাঙ্গেন দ্বারকামভিজগ্মিবান্

অলংকৃতা দ্বারকা তু বভূব জনমেজয়
কুন্তীসুতস্য পূজার্থমপি নিষ্কুটকেষ্বপি

দিদৃক্ষবশ্চ কৌন্তেয়ং দ্বারকাবাসিনো জনাঃ
নরেন্দ্রমার্গমাজগ্মুস্তূর্ণং শতসহস্রশঃ

অবলোকেষু নারীণাং সহস্রাণি শতানি চ
ভোজবৃষ্ণ্যন্ধকানাং চ সমবায়ো মহানভূৎ

স তথা সত্কৃতঃ সর্বৈর্ভোজবৃষ্ণ্যন্ধকাত্মজৈঃ
অভিবাদ্যাভিবাদ্যাংশ্চ সর্বৈশ্চ প্রতিনন্দিতঃ

কুমারৈঃ সর্বশো বীরঃ সত্কারেণাভিবাদিতঃ
সমানবয়সঃ সর্বানাশ্লিষ্য স পুনঃ পুনঃ

কৃষ্ণস্য ভবনে রম্যে রত্নভোজ্যসমাবৃতে
উবাস সহ কৃষ্ণেন বহুলাস্তত্র শর্বরীঃ