Utshovঅধ্যায় 211
211.1
বৈশংপায়ন উবাচ
ততঃ কতিপয়াহস্য তস্মিন্রৈবতকে গিরৌ
বৃষ্ণ্যন্ধকানামভবত্সুমহানুত্সবো নৃপ
211.2
তত্র দানং দদুর্বীরা ব্রাহ্মণানাং সহস্রশঃ
ভোজবৃষ্ণ্যন্ধকাশ্চৈব মহে তস্য গিরেস্তদা
211.3
প্রাসাদৈ রত্নচিত্রৈশ্চ গিরেস্তস্য সমন্ততঃ
স দেশঃ শোভিতো রাজন্দীপবৃক্ষৈশ্চ সর্বশঃ
211.4
বাদিত্রাণি চ তত্র স্ম বাদকাঃ সমবাদয়ন্
ননৃতুর্নর্তকাশ্চৈব জগুর্গানানি গায়নাঃ
211.5
অলংকৃতাঃ কুমারাশ্চ বৃষ্ণীনাং সুমহৌজসঃ
যানৈর্হাটকচিত্রাঙ্গৈশ্চঞ্চূর্যন্তে স্ম সর্বশঃ
211.6
পৌরাশ্চ পাদচারেণ যানৈরুচ্চাবচৈস্তথা
সদারাঃ সানুয়াত্রাশ্চ শতশোঽথ সহস্রশঃ
211.7
ততো হলধরঃ ক্ষীবো রেবতীসহিতঃ প্রভুঃ
অনুগম্যমানো গন্ধর্বৈরচরত্তত্র ভারত
211.8
তথৈব রাজা বৃষ্ণীনামুগ্রসেনঃ প্রতাপবান্
উপগীয়মানো গন্ধর্বৈঃ স্ত্রীসহস্রসহায়বান্
211.9
রৌক্মিণেয়শ্চ সাম্বশ্চ ক্ষীবৌ সমরদুর্মদৌ
দিব্যমাল্যাম্বরধরৌ বিজহ্রাতেঽমরাবিব
211.10
অক্রূরঃ সারণশ্চৈব গদো ভানুর্বিডূরথঃ
নিশঠশ্চারুদেষ্ণশ্চ পৃথুর্বিপৃথুরেব চ
211.11
সত্যকঃ সাত্যকিশ্চৈব ভঙ্গকারসহাচরৌ
হার্দিক্যঃ কৃতবর্মা চ যে চান্যে নানুকীর্তিতাঃ
211.12
এতে পরিবৃতাঃ স্ত্রীভির্গন্ধর্বৈশ্চ পৃথক্পৃথক্
তমুত্সবং রৈবতকে শোভয়াং চক্রিরে তদা
211.13
তদা কোলাহলে তস্মিন্বর্তমানে মহাশুভে
বাসুদেবশ্চ পার্থশ্চ সহিতৌ পরিজগ্মতুঃ
211.14
তত্র চঙ্ক্রম্যমাণৌ তৌ বসুদেবসুতাং শুভাম্
অলংকৃতাং সখীমধ্যে ভদ্রাং দদৃশতুস্তদা
211.15
দৃষ্ট্বৈব তামর্জুনস্য কন্দর্পঃ সমজায়ত
তং তথৈকাগ্রমনসং কৃষ্ণঃ পার্থমলক্ষয়ৎ
211.16
অথাব্রবীত্পুষ্করাক্ষঃ প্রহসন্নিব ভারত
বনেচরস্য কিমিদং কামেনালোড্যতে মনঃ
211.17
মমৈষা ভগিনী পার্থ সারণস্য সহোদরা
যদি তে বর্ততে বুদ্ধির্বক্ষ্যামি পিতরং স্বয়ম্
211.18
অর্জুন উবাচ
দুহিতা বসুদেবস্য বাসুদেবস্য চ স্বসা
রূপেণ চৈব সংপন্না কমিবৈষা ন মোহয়েৎ
211.19
কৃতমেব তু কল্যাণং সর্বং মম ভবেদ্ধ্রুবম্
যদি স্যান্মম বার্ষ্ণেয়ী মহিষীয়ং স্বসা তব
211.20
প্রাপ্তৌ তু ক উপায়ঃ স্যাত্তদ্ব্রবীহি জনার্দন
আস্থাস্যামি তথা সর্বং যদি শক্যং নরেণ তৎ
211.21
বাসুদেব উবাচ
স্বয়ংবরঃ ক্ষত্রিয়াণাং বিবাহঃ পুরুষর্ষভ
স চ সংশয়িতঃ পার্থ স্বভাবস্যানিমিত্ততঃ
211.22
প্রসহ্য হরণং চাপি ক্ষত্রিয়াণাং প্রশস্যতে
বিবাহহেতোঃ শূরাণামিতি ধর্মবিদো বিদুঃ
211.23
স ত্বমর্জুন কল্যাণীং প্রসহ্য ভগিনীং মম
হর স্বয়ংবরে হ্যস্যাঃ কো বৈ বেদ চিকীর্ষিতম্
211.24
বৈশংপায়ন উবাচ
ততোঽর্জুনশ্চ কৃষ্ণশ্চ বিনিশ্চিত্যেতিকৃত্যতাম্
শীঘ্রগান্পুরুষান্রাজন্প্রেষয়ামাসতুস্তদা
211.25
ধর্মরাজায় তত্সর্বমিন্দ্রপ্রস্থগতায় বৈ
শ্রুত্বৈব চ মহাবাহুরনুজজ্ঞে স পাণ্ডবঃ