UtshovChapter 211
211.1
वैशंपायन उवाच
ततः कतिपयाहस्य तस्मिन्रैवतके गिरौ
वृष्ण्यन्धकानामभवत्सुमहानुत्सवो नृप
Vaishampayana uvacha
Tatah katipayahasya tasminraivatake girau
Vrishnyandhakanamabhavatsumahanutsavo nripa
211.2
तत्र दानं ददुर्वीरा ब्राह्मणानां सहस्रशः
भोजवृष्ण्यन्धकाश्चैव महे तस्य गिरेस्तदा
Tatra danam dadurvira brahmananam sahasrashah
Bhojavrishnyandhakashchaiva mahe tasya girestada
211.3
प्रासादै रत्नचित्रैश्च गिरेस्तस्य समन्ततः
स देशः शोभितो राजन्दीपवृक्षैश्च सर्वशः
Prasadai ratnachitraishcha girestasya samantatah
Sa deshah shobhito rajandipavrikshaishcha sarvashah
211.4
वादित्राणि च तत्र स्म वादकाः समवादयन्
ननृतुर्नर्तकाश्चैव जगुर्गानानि गायनाः
Vaditrani cha tatra sma vadakah samavadayan
Nanriturnartakashchaiva jagurganani gayanah
211.5
अलंकृताः कुमाराश्च वृष्णीनां सुमहौजसः
यानैर्हाटकचित्राङ्गैश्चञ्चूर्यन्ते स्म सर्वशः
Alankritah kumarashcha vrishninam sumahaujasah
Yanairhatakachitrangaishchanchuryante sma sarvashah
211.6
पौराश्च पादचारेण यानैरुच्चावचैस्तथा
सदाराः सानुयात्राश्च शतशोऽथ सहस्रशः
Paurashcha padacharena yanairuchchavachaistatha
Sadarah sanuyatrashcha shatashotha sahasrashah
211.7
ततो हलधरः क्षीबो रेवतीसहितः प्रभुः
अनुगम्यमानो गन्धर्वैरचरत्तत्र भारत
Tato haladharah kshibo revatisahitah prabhuh
Anugamyamano gandharvairacharattatra bharata
211.8
तथैव राजा वृष्णीनामुग्रसेनः प्रतापवान्
उपगीयमानो गन्धर्वैः स्त्रीसहस्रसहायवान्
Tathaiva raja vrishninamugrasenah pratapavan
Upagiyamano gandharvaih strisahasrasahayavan
211.9
रौक्मिणेयश्च साम्बश्च क्षीबौ समरदुर्मदौ
दिव्यमाल्याम्बरधरौ विजह्रातेऽमराविव
Raukmineyashcha sambashcha kshibau samaradurmadau
Divyamalyambaradharau vijahratemaraviva
211.10
अक्रूरः सारणश्चैव गदो भानुर्विडूरथः
निशठश्चारुदेष्णश्च पृथुर्विपृथुरेव च
Akrurah saranashchaiva gado bhanurvidurathah
Nishathashcharudeshnashcha prithurviprithureva cha
211.11
सत्यकः सात्यकिश्चैव भङ्गकारसहाचरौ
हार्दिक्यः कृतवर्मा च ये चान्ये नानुकीर्तिताः
Satyakah satyakishchaiva bhangakarasahacharau
Hardikyah kritavarma cha ye chanye nanukirtitah
211.12
एते परिवृताः स्त्रीभिर्गन्धर्वैश्च पृथक्पृथक्
तमुत्सवं रैवतके शोभयां चक्रिरे तदा
Ete parivritah stribhirgandharvaishcha prithakprithak
Tamutsavam raivatake shobhayam chakrire tada
211.13
तदा कोलाहले तस्मिन्वर्तमाने महाशुभे
वासुदेवश्च पार्थश्च सहितौ परिजग्मतुः
Tada kolahale tasminvartamane mahashubhe
Vasudevashcha parthashcha sahitau parijagmatuh
211.14
तत्र चङ्क्रम्यमाणौ तौ वसुदेवसुतां शुभाम्
अलंकृतां सखीमध्ये भद्रां ददृशतुस्तदा
Tatra chankramyamanau tau vasudevasutam shubham
Alankritam sakhimadhye bhadram dadrishatustada
211.15
दृष्ट्वैव तामर्जुनस्य कन्दर्पः समजायत
तं तथैकाग्रमनसं कृष्णः पार्थमलक्षयत्
Drishtvaiva tamarjunasya kandarpah samajayata
Tam tathaikagramanasam krishnah parthamalakshayat
211.16
अथाब्रवीत्पुष्कराक्षः प्रहसन्निव भारत
वनेचरस्य किमिदं कामेनालोड्यते मनः
Athabravitpushkarakshah prahasanniva bharata
Vanecharasya kimidam kamenalodyate manah
211.17
ममैषा भगिनी पार्थ सारणस्य सहोदरा
यदि ते वर्तते बुद्धिर्वक्ष्यामि पितरं स्वयम्
Mamaisha bhagini partha saranasya sahodara
Yadi te vartate buddhirvakshyami pitaram svayam
211.18
अर्जुन उवाच
दुहिता वसुदेवस्य वासुदेवस्य च स्वसा
रूपेण चैव संपन्ना कमिवैषा न मोहयेत्
Arjuna uvacha
Duhita vasudevasya vasudevasya cha svasa
Rupena chaiva sampanna kamivaisha na mohayet
211.19
कृतमेव तु कल्याणं सर्वं मम भवेद्ध्रुवम्
यदि स्यान्मम वार्ष्णेयी महिषीयं स्वसा तव
Kritameva tu kalyanam sarvam mama bhaveddhruvam
Yadi syanmama varshneyi mahishiyam svasa tava
211.20
प्राप्तौ तु क उपायः स्यात्तद्ब्रवीहि जनार्दन
आस्थास्यामि तथा सर्वं यदि शक्यं नरेण तत्
Praptau tu ka upayah syattadbravihi janardana
Asthasyami tatha sarvam yadi shakyam narena tat
211.21
वासुदेव उवाच
स्वयंवरः क्षत्रियाणां विवाहः पुरुषर्षभ
स च संशयितः पार्थ स्वभावस्यानिमित्ततः
Vasudeva uvacha
Svayanvarah kshatriyanam vivahah purusharshabha
Sa cha sanshayitah partha svabhavasyanimittatah
211.22
प्रसह्य हरणं चापि क्षत्रियाणां प्रशस्यते
विवाहहेतोः शूराणामिति धर्मविदो विदुः
Prasahya haranam chapi kshatriyanam prashasyate
Vivahahetoh shuranamiti dharmavido viduh
211.23
स त्वमर्जुन कल्याणीं प्रसह्य भगिनीं मम
हर स्वयंवरे ह्यस्याः को वै वेद चिकीर्षितम्
Sa tvamarjuna kalyanim prasahya bhaginim mama
Hara svayanvare hyasyah ko vai veda chikirshitam
211.24
वैशंपायन उवाच
ततोऽर्जुनश्च कृष्णश्च विनिश्चित्येतिकृत्यताम्
शीघ्रगान्पुरुषान्राजन्प्रेषयामासतुस्तदा
Vaishampayana uvacha
Tatorjunashcha krishnashcha vinishchityetikrityatam
Shighraganpurushanrajanpreshayamasatustada
211.25
धर्मराजाय तत्सर्वमिन्द्रप्रस्थगताय वै
श्रुत्वैव च महाबाहुरनुजज्ञे स पाण्डवः
Dharmarajaya tatsarvamindraprasthagataya vai
Shrutvaiva cha mahabahuranujagye sa pandavah