UtshovChapter 198
198.1
धृतराष्ट्र उवाच
भीष्मः शांतनवो विद्वान्द्रोणश्च भगवानृषिः
हितं परमकं वाक्यं त्वं च सत्यं ब्रवीषि माम्
Dhritarashtra uvacha
Bhishmah shantanavo vidvandronashcha bhagavanrishih
Hitam paramakam vakyam tvam cha satyam bravishi mam
198.2
यथैव पाण्डोस्ते वीराः कुन्तीपुत्रा महारथाः
तथैव धर्मतः सर्वे मम पुत्रा न संशयः
Yathaiva pandoste virah kuntiputra maharathah
Tathaiva dharmatah sarve mama putra na sanshayah
198.3
यथैव मम पुत्राणामिदं राज्यं विधीयते
तथैव पाण्डुपुत्राणामिदं राज्यं न संशयः
Yathaiva mama putranamidam rajyam vidhiyate
Tathaiva panduputranamidam rajyam na sanshayah
198.4
क्षत्तरानय गच्छैतान्सह मात्रा सुसत्कृतान्
तया च देवरूपिण्या कृष्णया सह भारत
Kshattaranaya gachchhaitansaha matra susatkritan
Taya cha devarupinya krishnaya saha bharata
198.5
दिष्ट्या जीवन्ति ते पार्था दिष्ट्या जीवति सा पृथा
दिष्ट्या द्रुपदकन्यां च लब्धवन्तो महारथाः
Dishtya jivanti te partha dishtya jivati sa pritha
Dishtya drupadakanyam cha labdhavanto maharathah
198.6
दिष्ट्या वर्धामहे सर्वे दिष्ट्या शान्तः पुरोचनः
दिष्ट्या मम परं दुःखमपनीतं महाद्युते
Dishtya vardhamahe sarve dishtya shantah purochanah
Dishtya mama param duhkhamapanitam mahadyute
198.7
वैशंपायन उवाच
ततो जगाम विदुरो धृतराष्ट्रस्य शासनात्
सकाशं यज्ञसेनस्य पाण्डवानां च भारत
Vaishampayana uvacha
Tato jagama viduro dhritarashtrasya shasanat
Sakasham yagyasenasya pandavanam cha bharata
198.8
तत्र गत्वा स धर्मज्ञः सर्वशास्त्रविशारदः
द्रुपदं न्यायतो राजन्संयुक्तमुपतस्थिवान्
Tatra gatva sa dharmagyah sarvashastravisharadah
Drupadam nyayato rajansanyuktamupatasthivan
198.9
स चापि प्रतिजग्राह धर्मेण विदुरं ततः
चक्रतुश्च यथान्यायं कुशलप्रश्नसंविदम्
Sa chapi pratijagraha dharmena viduram tatah
Chakratushcha yathanyayam kushalaprashnasanvidam
198.10
ददर्श पाण्डवांस्तत्र वासुदेवं च भारत
स्नेहात्परिष्वज्य स तान्पप्रच्छानामयं ततः
Dadarsha pandavanstatra vasudevam cha bharata
Snehatparishvajya sa tanpaprachchhanamayam tatah
198.11
तैश्चाप्यमितबुद्धिः स पूजितोऽथ यथाक्रमम्
वचनाद्धृतराष्ट्रस्य स्नेहयुक्तं पुनः पुनः
Taishchapyamitabuddhih sa pujitotha yathakramam
Vachanaddhritarashtrasya snehayuktam punah punah
198.12
पप्रच्छानामयं राजंस्ततस्तान्पाण्डुनन्दनान्
प्रददौ चापि रत्नानि विविधानि वसूनि च
Paprachchhanamayam rajanstatastanpandunandanan
Pradadau chapi ratnani vividhani vasuni cha
198.13
पाण्डवानां च कुन्त्याश्च द्रौपद्याश्च विशां पते
द्रुपदस्य च पुत्राणां यथा दत्तानि कौरवैः
Pandavanam cha kuntyashcha draupadyashcha visham pate
Drupadasya cha putranam yatha dattani kauravaih
198.14
प्रोवाच चामितमतिः प्रश्रितं विनयान्वितः
द्रुपदं पाण्डुपुत्राणां संनिधौ केशवस्य च
Provacha chamitamatih prashritam vinayanvitah
Drupadam panduputranam sannidhau keshavasya cha
198.15
राजञ्शृणु सहामात्यः सपुत्रश्च वचो मम
धृतराष्ट्रः सपुत्रस्त्वां सहामात्यः सबान्धवः
Rajanshrinu sahamatyah saputrashcha vacho mama
Dhritarashtrah saputrastvam sahamatyah sabandhavah
198.16
अब्रवीत्कुशलं राजन्प्रीयमाणः पुनः पुनः
प्रीतिमांस्ते दृढं चापि संबन्धेन नराधिप
Abravitkushalam rajanpriyamanah punah punah
Pritimanste dridham chapi sambandhena naradhipa
198.17
तथा भीष्मः शांतनवः कौरवैः सह सर्वशः
कुशलं त्वां महाप्राज्ञः सर्वतः परिपृच्छति
Tatha bhishmah shantanavah kauravaih saha sarvashah
Kushalam tvam mahapragyah sarvatah pariprichchhati
198.18
भारद्वाजो महेष्वासो द्रोणः प्रियसखस्तव
समाश्लेषमुपेत्य त्वां कुशलं परिपृच्छति
Bharadvajo maheshvaso dronah priyasakhastava
Samashleshamupetya tvam kushalam pariprichchhati
198.19
धृतराष्ट्रश्च पाञ्चाल्य त्वया संबन्धमीयिवान्
कृतार्थं मन्यतेऽऽत्मानं तथा सर्वेऽपि कौरवाः
Dhritarashtrashcha panchalya tvaya sambandhamiyivan
Kritartham manyatetmanam tatha sarvepi kauravah
198.20
न तथा राज्यसंप्राप्तिस्तेषां प्रीतिकरी मता
यथा संबन्धकं प्राप्य यज्ञसेन त्वया सह
Na tatha rajyasampraptistesham pritikari mata
Yatha sambandhakam prapya yagyasena tvaya saha
198.21
एतद्विदित्वा तु भवान्प्रस्थापयतु पाण्डवान्
द्रष्टुं हि पाण्डुदायादांस्त्वरन्ते कुरवो भृशम्
Etadviditva tu bhavanprasthapayatu pandavan
Drashtum hi pandudayadanstvarante kuravo bhrisham
198.22
विप्रोषिता दीर्घकालमिमे चापि नरर्षभाः
उत्सुका नगरं द्रष्टुं भविष्यन्ति पृथा तथा
Viproshita dirghakalamime chapi nararshabhah
Utsuka nagaram drashtum bhavishyanti pritha tatha
198.23
कृष्णामपि च पाञ्चालीं सर्वाः कुरुवरस्त्रियः
द्रष्टुकामाः प्रतीक्षन्ते पुरं च विषयं च नः
Krishnamapi cha panchalim sarvah kuruvarastriyah
Drashtukamah pratikshante puram cha vishayam cha nah
198.24
स भवान्पाण्डुपुत्राणामाज्ञापयतु माचिरम्
गमनं सहदाराणामेतदागमनं मम
Sa bhavanpanduputranamagyapayatu machiram
Gamanam sahadaranametadagamanam mama
198.25
विसृष्टेषु त्वया राजन्पाण्डवेषु महात्मसु
ततोऽहं प्रेषयिष्यामि धृतराष्ट्रस्य शीघ्रगान्
आगमिष्यन्ति कौन्तेयाः कुन्ती च सह कृष्णया
Visrishteshu tvaya rajanpandaveshu mahatmasu
Tatoham preshayishyami dhritarashtrasya shighragan
Agamishyanti kaunteyah kunti cha saha krishnaya