UtshovChapter 193
193.1
धृतराष्ट्र उवाच
अहमप्येवमेवैतच्चिन्तयामि यथा युवाम्
विवेक्तुं नाहमिच्छामि त्वाकारं विदुरं प्रति
Dhritarashtra uvacha
Ahamapyevamevaitachchintayami yatha yuvam
Vivektum nahamichchhami tvakaram viduram prati
193.2
अतस्तेषां गुणानेव कीर्तयामि विशेषतः
नावबुध्येत विदुरो ममाभिप्रायमिङ्गितैः
Atastesham gunaneva kirtayami visheshatah
Navabudhyeta viduro mamabhiprayamingitaih
193.3
यच्च त्वं मन्यसे प्राप्तं तद्ब्रूहि त्वं सुयोधन
राधेय मन्यसे त्वं च यत्प्राप्तं तद्ब्रवीहि मे
Yachcha tvam manyase praptam tadbruhi tvam suyodhana
Radheya manyase tvam cha yatpraptam tadbravihi me
193.4
दुर्योधन उवाच
अद्य तान्कुशलैर्विप्रैः सुकृतैराप्तकारिभिः
कुन्तीपुत्रान्भेदयामो माद्रीपुत्रौ च पाण्डवौ
Duryodhana uvacha
Adya tankushalairvipraih sukritairaptakaribhih
Kuntiputranbhedayamo madriputrau cha pandavau
193.5
अथ वा द्रुपदो राजा महद्भिर्वित्तसंचयैः
पुत्राश्चास्य प्रलोभ्यन्ताममात्याश्चैव सर्वशः
Atha va drupado raja mahadbhirvittasanchayaih
Putrashchasya pralobhyantamamatyashchaiva sarvashah
193.6
परित्यजध्वं राजानं कुन्तीपुत्रं युधिष्ठिरम्
अथ तत्रैव वा तेषां निवासं रोचयन्तु ते
Parityajadhvam rajanam kuntiputram yudhishthiram
Atha tatraiva va tesham nivasam rochayantu te
193.7
इहैषां दोषवद्वासं वर्णयन्तु पृथक्पृथक्
ते भिद्यमानास्तत्रैव मनः कुर्वन्तु पाण्डवाः
Ihaisham doshavadvasam varnayantu prithakprithak
Te bhidyamanastatraiva manah kurvantu pandavah
193.8
अथ वा कुशलाः केचिदुपायनिपुणा नराः
इतरेतरतः पार्थान्भेदयन्त्वनुरागतः
Atha va kushalah kechidupayanipuna narah
Itaretaratah parthanbhedayantvanuragatah
193.9
व्युत्थापयन्तु वा कृष्णां बहुत्वात्सुकरं हि तत्
अथ वा पाण्डवांस्तस्यां भेदयन्तु ततश्च ताम्
Vyutthapayantu va krishnam bahutvatsukaram hi tat
Atha va pandavanstasyam bhedayantu tatashcha tam
193.10
भीमसेनस्य वा राजन्नुपायकुशलैर्नरैः
मृत्युर्विधीयतां छन्नैः स हि तेषां बलाधिकः
Bhimasenasya va rajannupayakushalairnaraih
Mrityurvidhiyatam chhannaih sa hi tesham baladhikah
193.11
तस्मिंस्तु निहते राजन्हतोत्साहा हतौजसः
यतिष्यन्ते न राज्याय स हि तेषां व्यपाश्रयः
Tasminstu nihate rajanhatotsaha hataujasah
Yatishyante na rajyaya sa hi tesham vyapashrayah
193.12
अजेयो ह्यर्जुनः संख्ये पृष्ठगोपे वृकोदरे
तमृते फल्गुनो युद्धे राधेयस्य न पादभाक्
Ajeyo hyarjunah sankhye prishthagope vrikodare
Tamrite phalguno yuddhe radheyasya na padabhak
193.13
ते जानमाना दौर्बल्यं भीमसेनमृते महत्
अस्मान्बलवतो ज्ञात्वा नशिष्यन्त्यबलीयसः
Te janamana daurbalyam bhimasenamrite mahat
Asmanbalavato gyatva nashishyantyabaliyasah
193.14
इहागतेषु पार्थेषु निदेशवशवर्तिषु
प्रवर्तिष्यामहे राजन्यथाश्रद्धं निबर्हणे
Ihagateshu partheshu nideshavashavartishu
Pravartishyamahe rajanyathashraddham nibarhane
193.15
अथ वा दर्शनीयाभिः प्रमदाभिर्विलोभ्यताम्
एकैकस्तत्र कौन्तेयस्ततः कृष्णा विरज्यताम्
Atha va darshaniyabhih pramadabhirvilobhyatam
Ekaikastatra kaunteyastatah krishna virajyatam
193.16
प्रेष्यतां वापि राधेयस्तेषामागमनाय वै
ते लोप्त्रहारैः संधाय वध्यन्तामाप्तकारिभिः
Preshyatam vapi radheyasteshamagamanaya vai
Te loptraharaih sandhaya vadhyantamaptakaribhih
193.17
एतेषामभ्युपायानां यस्ते निर्दोषवान्मतः
तस्य प्रयोगमातिष्ठ पुरा कालोऽतिवर्तते
Eteshamabhyupayanam yaste nirdoshavanmatah
Tasya prayogamatishtha pura kalotivartate
193.18
यावच्चाकृतविश्वासा द्रुपदे पार्थिवर्षभे
तावदेवाद्य ते शक्या न शक्यास्तु ततः परम्
Yavachchakritavishvasa drupade parthivarshabhe
Tavadevadya te shakya na shakyastu tatah param
193.19
एषा मम मतिस्तात निग्रहाय प्रवर्तते
साधु वा यदि वासाधु किं वा राधेय मन्यसे
Esha mama matistata nigrahaya pravartate
Sadhu va yadi vasadhu kim va radheya manyase