UtshovChapter 172
172.1
गन्धर्व उवाच
एवमुक्तः स विप्रर्षिर्वसिष्ठेन महात्मना
न्ययच्छदात्मनः कोपं सर्वलोकपराभवात्
Gandharva uvacha
Evamuktah sa viprarshirvasishthena mahatmana
Nyayachchhadatmanah kopam sarvalokaparabhavat
172.2
ईजे च स महातेजाः सर्ववेदविदां वरः
ऋषी राक्षससत्रेण शाक्तेयोऽथ पराशरः
Ije cha sa mahatejah sarvavedavidam varah
Rishi rakshasasatrena shakteyotha parasharah
172.3
ततो वृद्धांश्च बालांश्च राक्षसान्स महामुनिः
ददाह वितते यज्ञे शक्तेर्वधमनुस्मरन्
Tato vriddhanshcha balanshcha rakshasansa mahamunih
Dadaha vitate yagye shaktervadhamanusmaran
172.4
न हि तं वारयामास वसिष्ठो रक्षसां वधात्
द्वितीयामस्य मा भाङ्क्षं प्रतिज्ञामिति निश्चयात्
Na hi tam varayamasa vasishtho rakshasam vadhat
Dvitiyamasya ma bhanksham pratigyamiti nishchayat
172.5
त्रयाणां पावकानां स सत्रे तस्मिन्महामुनिः
आसीत्पुरस्ताद्दीप्तानां चतुर्थ इव पावकः
Trayanam pavakanam sa satre tasminmahamunih
Asitpurastaddiptanam chaturtha iva pavakah
172.6
तेन यज्ञेन शुभ्रेण हूयमानेन युक्तितः
तद्विदीपितमाकाशं सूर्येणेव घनात्यये
Tena yagyena shubhrena huyamanena yuktitah
Tadvidipitamakasham suryeneva ghanatyaye
172.7
तं वसिष्ठादयः सर्वे मुनयस्तत्र मेनिरे
तेजसा दिवि दीप्यन्तं द्वितीयमिव भास्करम्
Tam vasishthadayah sarve munayastatra menire
Tejasa divi dipyantam dvitiyamiva bhaskaram
172.8
ततः परमदुष्प्रापमन्यैरृषिरुदारधीः
समापिपयिषुः सत्रं तमत्रिः समुपागमत्
Tatah paramadushprapamanyairrishirudaradhih
Samapipayishuh satram tamatrih samupagamat
172.9
तथा पुलस्त्यः पुलहः क्रतुश्चैव महाक्रतुम्
उपाजग्मुरमित्रघ्न रक्षसां जीवितेप्सया
Tatha pulastyah pulahah kratushchaiva mahakratum
Upajagmuramitraghna rakshasam jivitepsaya
172.10
पुलस्त्यस्तु वधात्तेषां रक्षसां भरतर्षभ
उवाचेदं वचः पार्थ पराशरमरिंदमम्
Pulastyastu vadhattesham rakshasam bharatarshabha
Uvachedam vachah partha parasharamarindamam
172.11
कच्चित्तातापविघ्नं ते कच्चिन्नन्दसि पुत्रक
अजानतामदोषाणां सर्वेषां रक्षसां वधात्
Kachchittatapavighnam te kachchinnandasi putraka
Ajanatamadoshanam sarvesham rakshasam vadhat
172.12
प्रजोच्छेदमिमं मह्यं सर्वं सोमपसत्तम
अधर्मिष्ठं वरिष्ठः सन्कुरुषे त्वं पराशर
राजा कल्माषपादश्च दिवमारोढुमिच्छति
Prajochchhedamimam mahyam sarvam somapasattama
Adharmishtham varishthah sankurushe tvam parashara
Raja kalmashapadashcha divamarodhumichchhati
172.13
ये च शक्त्यवराः पुत्रा वसिष्ठस्य महामुनेः
ते च सर्वे मुदा युक्ता मोदन्ते सहिताः सुरैः
सर्वमेतद्वसिष्ठस्य विदितं वै महामुने
Ye cha shaktyavarah putra vasishthasya mahamuneh
Te cha sarve muda yukta modante sahitah suraih
Sarvametadvasishthasya viditam vai mahamune
172.14
रक्षसां च समुच्छेद एष तात तपस्विनाम्
निमित्तभूतस्त्वं चात्र क्रतौ वासिष्ठनन्दन
स सत्रं मुञ्च भद्रं ते समाप्तमिदमस्तु ते
Rakshasam cha samuchchheda esha tata tapasvinam
Nimittabhutastvam chatra kratau vasishthanandana
Sa satram muncha bhadram te samaptamidamastu te
172.15
एवमुक्तः पुलस्त्येन वसिष्ठेन च धीमता
तदा समापयामास सत्रं शाक्तिः पराशरः
Evamuktah pulastyena vasishthena cha dhimata
Tada samapayamasa satram shaktih parasharah
172.16
सर्वराक्षससत्राय संभृतं पावकं मुनिः
उत्तरे हिमवत्पार्श्वे उत्ससर्ज महावने
Sarvarakshasasatraya sambhritam pavakam munih
Uttare himavatparshve utsasarja mahavane
172.17
स तत्राद्यापि रक्षांसि वृक्षानश्मान एव च
भक्षयन्दृश्यते वह्निः सदा पर्वणि पर्वणि
Sa tatradyapi rakshansi vrikshanashmana eva cha
Bhakshayandrishyate vahnih sada parvani parvani