Sukta 117

117.1

25 kakshivan dairghatamasa aushijah, ashvinau, trishtup

मध्व॒ः सोम॑स्याश्विना॒ मदा॑य प्र॒त्नो होता वि॑वासते वाम् ।
ब॒र्हिष्म॑ती रा॒तिर्विश्रि॑ता॒ गीरि॒षा या॑तं नास॒त्योप॒ वाजै॑ः ॥१॥

Madhvah somasyashvina madaya pratno hota vivasate vam
Barhishmati ratirvishrita girisha yatam nasatyopa vajaih

117.2

यो वा॑मश्विना॒ मन॑सो॒ जवी॑या॒न् रथ॒ः स्वश्वो॒ विश॑ आ॒जिगा॑ति ।
येन॒ गच्छ॑थः सु॒कृतो॑ दुरो॒णं तेन॑ नरा व॒र्तिर॒स्मभ्यं॑ यातम् ॥२॥

Yo vamashvina manaso javiyan rathah svashvo visha ajigati
Yena gachchhathah sukrito duronam tena nara vartirasmabhyam yatam

117.3

ऋषिं॑ नरा॒वंह॑स॒ः पाञ्च॑जन्यमृ॒बीसा॒दत्रिं॑ मुञ्चथो ग॒णेन॑ ।
मि॒नन्ता॒ दस्यो॒रशि॑वस्य मा॒या अ॑नुपू॒र्वं वृ॑षणा चो॒दय॑न्ता ॥३॥

Rishim naravanhasah panchajanyamribisadatrim munchatho ganena
Minanta dasyorashivasya maya anupurvam vrishana chodayanta

117.4

अश्वं॒ न गू॒ह्लम॑श्विना दु॒रेवी॒र्ऋषिं॑ नरा वृषणा रे॒भम॒प्सु ।
सं तं रि॑णीथो॒ विप्रु॑तं॒ दंसो॑भि॒र्न वां॑ जूर्यन्ति पू॒र्व्या कृ॒तानि॑ ॥४॥

Ashvam na guhlamashvina durevirrishim nara vrishana rebhamapsu
Sam tam rinitho viprutam dansobhirna vam juryanti purvya kritani

117.5

सु॒षु॒प्वांसं॒ न निर्ऋ॑तेरु॒पस्थे॒ सूर्यं॒ न द॑स्रा॒ तम॑सि क्षि॒यन्त॑म् ।
शु॒भे रु॒क्मं न द॑र्श॒तं निखा॑त॒मुदू॑पथुरश्विना॒ वन्द॑नाय ॥५॥

Sushupvansam na nirriterupasthe suryam na dasra tamasi kshiyantam
Shubhe rukmam na darshatam nikhatamudupathurashvina vandanaya

117.6

तद् वां नरा॒ शंस्यं॑ पज्रि॒येण॑ क॒क्षीव॑ता नासत्या॒ परि॑ज्मन् ।
श॒फादश्व॑स्य वा॒जिनो॒ जना॑य श॒तं कु॒म्भाँ अ॑सिञ्चतं॒ मधू॑नाम् ॥६॥

Tad vam nara shansyam pajriyena kakshivata nasatya parijman
Shaphadashvasya vajino janaya shatam kumbham asinchatam madhunam

117.7

यु॒वं न॑रा स्तुव॒ते कृ॑ष्णि॒याय॑ विष्णा॒प्वं॑ ददथु॒र्विश्व॑काय ।
घोषा॑यै चित् पितृ॒षदे॑ दुरो॒णे पतिं॒ जूर्य॑न्त्या अश्विनावदत्तम् ॥७॥

Yuvam nara stuvate krishniyaya vishnapvam dadathurvishvakaya
Ghoshayai chit pitrishade durone patim juryantya ashvinavadattam

117.8

यु॒वं श्यावा॑य॒ रुश॑तीमदत्तं म॒हः क्षो॒णस्या॑श्विना॒ कण्वा॑य ।
प्र॒वाच्यं॒ तद्वृ॑षणा कृ॒तं वां॒ यन्ना॑र्ष॒दाय॒ श्रवो॑ अ॒ध्यध॑त्तम् ॥८॥

Yuvam shyavaya rushatimadattam mahah kshonasyashvina kanvaya
Pravachyam tadvrishana kritam vam yannarshadaya shravo adhyadhattam

117.9

पु॒रू वर्पां॑स्यश्विना॒ दधा॑ना॒ नि पे॒दव॑ ऊहथुरा॒शुमश्व॑म् ।
स॒ह॒स्र॒सां वा॒जिन॒मप्र॑तीतमहि॒हनं॑ श्रव॒स्यं १ तरु॑त्रम् ॥९॥

Puru varpansyashvina dadhana ni pedava uhathurashumashvam
Sahasrasam vajinamapratitamahihanam shravasyam 1 tarutram

117.10

ए॒तानि॑ वां श्रव॒स्या॑ सुदानू॒ ब्रह्मा॑ङ्गू॒षं सद॑नं॒ रोद॑स्योः ।
यद् वां॑ प॒ज्रासो॑ अश्विना॒ हव॑न्ते या॒तमि॒षा च॑ वि॒दुषे॑ च॒ वाज॑म् ॥१०॥

Etani vam shravasya sudanu brahmangusham sadanam rodasyoh
Yad vam pajraso ashvina havante yatamisha cha vidushe cha vajam

117.11

सू॒नोर्माने॑नाश्विना गृणा॒ना वाजं॒ विप्रा॑य भुरणा॒ रद॑न्ता ।
अ॒गस्त्ये॒ ब्रह्म॑णा वावृधा॒ना सं वि॒श्पलां॑ नासत्यारिणीतम् ॥११॥

Sunormanenashvina grinana vajam vipraya bhurana radanta
Agastye brahmana vavridhana sam vishpalam nasatyarinitam

117.12

कुह॒ यान्ता॑ सुष्टु॒तिं का॒व्यस्य॒ दिवो॑ नपाता वृषणा शयु॒त्रा ।
हिर॑ण्यस्येव क॒लशं॒ निखा॑त॒मुदू॑पथुर्दश॒मे अ॑श्वि॒नाह॑न् ॥१२॥

Kuha yanta sushtutim kavyasya divo napata vrishana shayutra
Hiranyasyeva kalasham nikhatamudupathurdashame ashvinahan

117.13

यु॒वं च्यवा॑नमश्विना॒ जर॑न्तं॒ पुन॒र्युवा॑नं चक्रथु॒ः शची॑भिः ।
यु॒वो रथं॑ दुहि॒ता सूर्य॑स्य स॒ह श्रि॒या ना॑सत्यावृणीत ॥१३॥

Yuvam chyavanamashvina jarantam punaryuvanam chakrathuh shachibhih
Yuvo ratham duhita suryasya saha shriya nasatyavrinita

117.14

यु॒वं तुग्रा॑य पू॒र्व्येभि॒रेवै॑ः पुनर्म॒न्याव॑भवतं युवाना ।
यु॒वं भु॒ज्युमर्ण॑सो॒ निः स॑मु॒द्राद् विभि॑रूहथुर्ऋज्रेभि॒रश्वै॑ः ॥१४॥

Yuvam tugraya purvyebhirevaih punarmanyavabhavatam yuvana
Yuvam bhujyumarnaso nih samudrad vibhiruhathurrijrebhirashvaih

117.15

अजो॑हवीदश्विना तौ॒ग्र्यो वां॒ प्रोह्ल॑ः समु॒द्रम॑व्य॒थिर्ज॑ग॒न्वान् ।
निष्टमू॑हथुः सु॒युजा॒ रथे॑न॒ मनो॑जवसा वृषणा स्व॒स्ति ॥१५॥

Ajohavidashvina taugryo vam prohlah samudramavyathirjaganvan
Nishtamuhathuh suyuja rathena manojavasa vrishana svasti

117.16

अजो॑हवीदश्विना॒ वर्ति॑का वामा॒स्नो यत्सी॒ममु॑ञ्चतं॒ वृक॑स्य ।
वि ज॒युषा॑ ययथु॒ः सान्वद्रे॑र्जा॒तं वि॒ष्वाचो॑ अहतं वि॒षेण॑ ॥१६॥

Ajohavidashvina vartika vamasno yatsimamunchatam vrikasya
Vi jayusha yayathuh sanvadrerjatam vishvacho ahatam vishena

117.17

श॒तं मे॒षान् वृ॒क्ये॑ मामहा॒नं तम॒ः प्रणी॑त॒मशि॑वेन पि॒त्रा ।
आक्षी ऋ॒ज्राश्वे॑ अश्विनावधत्तं॒ ज्योति॑र॒न्धाय॑ चक्रथुर्वि॒चक्षे॑ ॥१७॥

Shatam meshan vrikye mamahanam tamah pranitamashivena pitra
Akshi rijrashve ashvinavadhattam jyotirandhaya chakrathurvichakshe

117.18

शु॒नम॒न्धाय॒ भर॑मह्वय॒त् सा वृ॒कीर॑श्विना वृषणा॒ नरेति॑ ।
जा॒रः क॒नीन॑ इव चक्षदा॒न ऋ॒ज्राश्व॑ः श॒तमेकं॑ च मे॒षान् ॥१८॥

Shunamandhaya bharamahvayat sa vrikirashvina vrishana nareti
Jarah kanina iva chakshadana rijrashvah shatamekam cha meshan

117.19

म॒ही वा॑मू॒तिर॑श्विना मयो॒भूरु॒त स्रा॒मं धि॑ष्ण्या॒ सं रि॑णीथः ।
अथा॑ यु॒वामिद॑ह्वय॒त् पुरं॑धि॒राग॑च्छतं सीं वृषणा॒ववो॑भिः ॥१९॥

Mahi vamutirashvina mayobhuruta sramam dhishnya sam rinithah
Atha yuvamidahvayat purandhiragachchhatam sim vrishanavavobhih

117.20

अधे॑नुं दस्रा स्त॒र्यं१ विष॑क्ता॒मपि॑न्वतं श॒यवे॑ अश्विना॒ गाम् ।
यु॒वं शची॑भिर्विम॒दाय॑ जा॒यां न्यू॑हथुः पुरुमि॒त्रस्य॒ योषा॑म् ॥२०॥

Adhenum dasra staryan1 vishaktamapinvatam shayave ashvina gam
Yuvam shachibhirvimadaya jayam nyuhathuh purumitrasya yosham

117.21

यवं॒ वृके॑णाश्विना॒ वप॒न्तेषं॑ दु॒हन्ता॒ मनु॑षाय दस्रा ।
अ॒भि दस्युं॒ बकु॑रेणा॒ धम॑न्तो॒रु ज्योति॑श्चक्रथु॒रार्या॑य ॥२१॥

Yavam vrikenashvina vapantesham duhanta manushaya dasra
Abhi dasyum bakurena dhamantoru jyotishchakrathuraryaya

117.22

आ॒थ॒र्व॒णाया॑श्विना दधी॒चे ऽश्व्यं॒ शिर॒ः प्रत्यै॑रयतम् ।
स वां॒ मधु॒ प्र वो॑चदृता॒यन् त्वा॒ष्ट्रं यद् द॑स्रावपिक॒क्ष्यं॑ वाम् ॥२२॥

Atharvanayashvina dadhiche shvyam shirah pratyairayatam
Sa vam madhu pra vochadritayan tvashtram yad dasravapikakshyam vam

117.23

सदा॑ कवी सुम॒तिमा च॑के वां॒ विश्वा॒ धियो॑ अश्विना॒ प्राव॑तं मे ।
अ॒स्मे र॒यिं ना॑सत्या बृ॒हन्त॑मपत्य॒साचं॒ श्रुत्यं॑ रराथाम् ॥२३॥

Sada kavi sumatima chake vam vishva dhiyo ashvina pravatam me
Asme rayim nasatya brihantamapatyasacham shrutyam raratham

117.24

हिर॑ण्यहस्तमश्विना॒ ररा॑णा पु॒त्रं न॑रा वध्रिम॒त्या अ॑दत्तम् ।
त्रिधा॑ ह॒ श्याव॑मश्विना॒ विक॑स्त॒मुज्जी॒वस॑ ऐरयतं सुदानू ॥२४॥

Hiranyahastamashvina rarana putram nara vadhrimatya adattam
Tridha ha shyavamashvina vikastamujjivasa airayatam sudanu

117.25

ए॒तानि॑ वामश्विना वी॒र्या॑णि॒ प्र पू॒र्व्याण्या॒यवो॑ऽवोचन् ।
ब्रह्म॑ कृ॒ण्वन्तो॑ वृषणा यु॒वभ्यां॑ सु॒वीरा॑सो वि॒दथ॒मा व॑देम ॥२५॥

Etani vamashvina viryani pra purvyanyayavovochan
Brahma krinvanto vrishana yuvabhyam suviraso vidathama vadema