সূক্ত 117

117.1

২৫ কক্ষীবান্ দৈর্ঘতমস ঔশিজঃ। অশ্বিনৌ। ত্রিষ্টুপ্।

মধ্বঃ সোমস্যাশ্বিনা মদায় প্রত্নো হোতা বিবাসতে বাম্ ।
বর্হিষ্মতী রাতির্বিশ্রিতা গীরিষা যাতং নাসত্যোপ বাজৈঃ ॥১॥

117.2

যো বামশ্বিনা মনসো জবীয়ান্ রথঃ স্বশ্বো বিশ আজিগাতি ।
যেন গচ্ছথঃ সুকৃতো দুরোণং তেন নরা বর্তিরস্মভ্যং যাতম্ ॥২॥

117.3

ঋষিং নরাবংহসঃ পাঞ্চজন্যমৃবীসাদত্রিং মুঞ্চথো গণেন ।
মিনন্তা দস্যোরশিবস্য মায়া অনুপূর্বং বৃষণা চোদয়ন্তা ॥৩॥

117.4

অশ্বং ন গূহ্লমশ্বিনা দুরেবীর্ঋষিং নরা বৃষণা রেভমপ্সু ।
সং তং রিণীথো বিপ্রুতং দংসোভির্ন বাং জূর্যন্তি পূর্ব্যা কৃতানি ॥৪॥

117.5

সুষুপ্বাংসং ন নির্ঋতেরুপস্থে সূর্যং ন দস্রা তমসি ক্ষিয়ন্তম্ ।
শুভে রুক্মং ন দর্শতং নিখাতমুদূপথুরশ্বিনা বন্দনায় ॥৫॥

117.6

তদ্ বাং নরা শংস্যং পজ্রিয়েণ কক্ষীবতা নাসত্যা পরিজ্মন্ ।
শফাদশ্বস্য বাজিনো জনায় শতং কুম্ভাঁ অসিঞ্চতং মধূনাম্ ॥৬॥

117.7

যুবং নরা স্তুবতে কৃষ্ণিয়ায় বিষ্ণাপ্বং দদথুর্বিশ্বকায় ।
ঘোষায়ৈ চিৎ পিতৃষদে দুরোণে পতিং জূর্যন্ত্যা অশ্বিনাবদত্তম্ ॥৭॥

117.8

যুবং শ্যাবায় রুশতীমদত্তং মহঃ ক্ষোণস্যাশ্বিনা কণ্বায় ।
প্রবাচ্যং তদ্বৃষণা কৃতং বাং যন্নার্ষদায় শ্রবো অধ্যধত্তম্ ॥৮॥

117.9

পুরূ বর্পাংস্যশ্বিনা দধানা নি পেদব ঊহথুরাশুমশ্বম্ ।
সহস্রসাং বাজিনমপ্রতীতমহিহনং শ্রবস্যং ১ তরুত্রম্ ॥৯॥

117.10

এতানি বাং শ্রবস্যা সুদানূ ব্রহ্মাঙ্গূষং সদনং রোদস্যোঃ ।
যদ্ বাং পজ্রাসো অশ্বিনা হবন্তে যাতমিষা চ বিদুষে চ বাজম্ ॥১০॥

117.11

সূনোর্মানেনাশ্বিনা গৃণানা বাজং বিপ্রায় ভুরণা রদন্তা ।
অগস্ত্যে ব্রহ্মণা বাবৃধানা সং বিশ্পলাং নাসত্যারিণীতম্ ॥১১॥

117.12

কুহ যান্তা সুষ্টুতিং কাব্যস্য দিবো নপাতা বৃষণা শয়ুত্রা ।
হিরণ্যস্যেব কলশং নিখাতমুদূপথুর্দশমে অশ্বিনাহন্ ॥১২॥

117.13

যুবং চ্যবানমশ্বিনা জরন্তং পুনর্যুবানং চক্রথুঃ শচীভিঃ ।
যুবো রথং দুহিতা সূর্যস্য সহ শ্রিয়া নাসত্যাবৃণীত ॥১৩॥

117.14

যুবং তুগ্রায় পূর্ব্যেভিরেবৈঃ পুনর্মন্যাবভবতং যুবানা ।
যুবং ভুজ্যুমর্ণসো নিঃ সমুদ্রাদ্ বিভিরূহথুর্ঋজ্রেভিরশ্বৈঃ ॥১৪॥

117.15

অজোহবীদশ্বিনা তৌগ্র্যো বাং প্রোহ্লঃ সমুদ্রমব্যথির্জগন্বান্ ।
নিষ্টমূহথুঃ সুয়ুজা রথেন মনোজবসা বৃষণা স্বস্তি ॥১৫॥

117.16

অজোহবীদশ্বিনা বর্তিকা বামাস্নো যত্সীমমুঞ্চতং বৃকস্য ।
বি জয়ুষা যয়থুঃ সান্বদ্রের্জাতং বিষ্বাচো অহতং বিষেণ ॥১৬॥

117.17

শতং মেষান্ বৃক্যে মামহানং তমঃ প্রণীতমশিবেন পিত্রা ।
আক্ষী ঋজ্রাশ্বে অশ্বিনাবধত্তং জ্যোতিরন্ধায় চক্রথুর্বিচক্ষে ॥১৭॥

117.18

শুনমন্ধায় ভরমহ্বয়ৎ সা বৃকীরশ্বিনা বৃষণা নরেতি ।
জারঃ কনীন ইব চক্ষদান ঋজ্রাশ্বঃ শতমেকং চ মেষান্ ॥১৮॥

117.19

মহী বামূতিরশ্বিনা ময়োভূরুত স্রামং ধিষ্ণ্যা সং রিণীথঃ ।
অথা যুবামিদহ্বয়ৎ পুরংধিরাগচ্ছতং সীং বৃষণাববোভিঃ ॥১৯॥

117.20

অধেনুং দস্রা স্তর্যং১ বিষক্তামপিন্বতং শয়বে অশ্বিনা গাম্ ।
যুবং শচীভির্বিমদায় জায়াং ন্যূহথুঃ পুরুমিত্রস্য যোষাম্ ॥২০॥

117.21

যবং বৃকেণাশ্বিনা বপন্তেষং দুহন্তা মনুষায় দস্রা ।
অভি দস্যুং বকুরেণা ধমন্তোরু জ্যোতিশ্চক্রথুরার্যায় ॥২১॥

117.22

আথর্বণায়াশ্বিনা দধীচে ঽশ্ব্যং শিরঃ প্রত্যৈরয়তম্ ।
স বাং মধু প্র বোচদৃতায়ন্ ত্বাষ্ট্রং যদ্ দস্রাবপিকক্ষ্যং বাম্ ॥২২॥

117.23

সদা কবী সুমতিমা চকে বাং বিশ্বা ধিয়ো অশ্বিনা প্রাবতং মে ।
অস্মে রয়িং নাসত্যা বৃহন্তমপত্যসাচং শ্রুত্যং ররাথাম্ ॥২৩॥

117.24

হিরণ্যহস্তমশ্বিনা ররাণা পুত্রং নরা বধ্রিমত্যা অদত্তম্ ।
ত্রিধা হ শ্যাবমশ্বিনা বিকস্তমুজ্জীবস ঐরয়তং সুদানূ ॥২৪॥

117.25

এতানি বামশ্বিনা বীর্যাণি প্র পূর্ব্যাণ্যায়বোঽবোচন্ ।
ব্রহ্ম কৃণ্বন্তো বৃষণা যুবভ্যাং সুবীরাসো বিদথমা বদেম ॥২৫॥