সূক্ত 118

118.1

১১ কক্ষীবান্ দৈর্ঘতমস ঔশিজঃ। অশ্বিনৌ। ত্রিষ্টুপ্।

আ বাং রথো অশ্বিনা শ্যেনপত্বা সুমৃলীকঃ স্ববাঁ যাত্বর্বাঙ্ ।
যো মর্ত্যস্য মনসো জবীয়ান্ ত্রিবন্ধুরো বৃষণা বাতরংহাঃ ॥১॥

118.2

ত্রিবন্ধুরেণ ত্রিবৃতা রথেন ত্রিচক্রেণ সুবৃতা যাতমর্বাক্ ।
পিন্বতং গা জিন্বতমর্বতো নো বর্ধয়তমশ্বিনা বীরমস্মে ॥২॥

118.3

প্রবদ্যামনা সুবৃতা রথেন দস্রাবিমং শৃণুতং শ্লোকমদ্রেঃ ।
কিমঙ্গ বাং প্রত্যবর্তিং গমিষ্ঠাহুর্বিপ্রাসো অশ্বিনা পুরাজাঃ ॥৩॥

118.4

আ বাং শ্যেনাসো অশ্বিনা বহন্তু রথে যুক্তাস আশবঃ পতংগাঃ ।
যে অপ্তুরো দিব্যাসো ন গৃধ্রা অভি প্রয়ো নাসত্যা বহন্তি ॥৪॥

118.5

আ বাং রথং যুবতিস্তিষ্ঠদত্র জুষ্ট্বী নরা দুহিতা সূর্যস্য ।
পরি বামশ্বা বপুষঃ পতংগা বয়ো বহন্ত্বরুষা অভীকে ॥৫॥

118.6

উদ্ বন্দনমৈরতং দংসনাভিরুদ্রেভং দস্রা বৃষণা শচীভিঃ ।
নিষ্টৌগ্র্যং পারয়থঃ সমুদ্রাৎ পুনশ্চ্যবানং চক্রথুর্যুবানম্ ॥৬॥

118.7

যুবমত্রয়েঽবনীতায় তপ্তমূর্জমোমানমশ্বিনাবধত্তম্ ।
যুবং কণ্বায়াপিরিপ্তায় চক্ষুঃ প্রত্যধত্তং সুষ্টুতিং জুজুষাণা ॥৭॥

118.8

যুবং ধেনুং শয়বে নাধিতায়াপিন্বতমশ্বিনা পূর্ব্যায় ।
অমুঞ্চতং বর্তিকামংহসো নিঃ প্রতি জঙ্ঘাং বিশ্পলায়া অধত্তম্ ॥৮॥

118.9

যুবং শ্বেতং পেদব ইন্দ্রজূতমহিহনমশ্বিনাদত্তমশ্বম্ ।
জোহূত্রমর্যো অভিভূতিমুগ্রং সহস্রসাং বৃষণং বীড্বঙ্গম্ ॥৯॥

118.10

তা বাং নরা স্ববসে সুজাতা হবামহে অশ্বিনা নাধমানাঃ ।
আ ন উপ বসুমতা রথেন গিরো জুষাণা সুবিতায় যাতম্ ॥১০॥

118.11

আ শ্যেনস্য জবসা নূতনেনাস্মে যাতং নাসত্যা সজোষাঃ ।
হবে হি বামশ্বিনা রাতহব্যঃ শশ্বত্তমায়া উষসো ব্যুষ্টৌ ॥১১॥