সূক্ত 119

119.1

১০ কক্ষীবান্ দৈর্ঘতমস ঔশিজঃ। অশ্বিনৌ। জগতী।

আ বাং রথং পুরুমায়ং মনোজুবং জীরাশ্বং যজ্ঞিয়ং জীবসে হুবে ।
সহস্রকেতুং বনিনং শতদ্বসুং শ্রুষ্টীবানং বরিবোধামভি প্রয়ঃ ॥১॥

119.2

ঊর্ধ্বা ধীতিঃ প্রত্যস্য প্রয়ামন্যধায়ি শস্মন্ত্সময়ন্ত আ দিশঃ ।
স্বদামি ঘর্মং প্রতি যন্ত্যূতয় আ বামূর্জানী রথমশ্বিনারুহৎ ॥২॥

119.3

সং যন্মিথঃ পস্পৃধানাসো অগ্মত শুভে মখা অমিতা জায়বো রণে ।
যুবোরহ প্রবণে চেকিতে রথো যদশ্বিনা বহথঃ সূরিমা বরম্ ॥৩॥

119.4

যুবং ভুজ্যুং ভুরমাণং বিভির্গতং স্বয়ুক্তিভির্নিবহন্তা পিতৃভ্য আ ।
যাসিষ্টং বর্তির্বৃষণা বিজেন্যং১ দিবোদাসায় মহি চেতি বামবঃ ॥৪॥

119.5

যুবোরশ্বিনা বপুষে যুবায়ুজং রথং বাণী যেমতুরস্য শর্ধ্যম্ ।
আ বাং পতিত্বং সখ্যায় জগ্মুষী যোষাবৃণীত জেন্যা যুবাং পতী ॥৫॥

119.6

যুবং রেভং পরিষূতেরুরুষ্যথো হিমেন ঘর্মং পরিতপ্তমত্রয়ে ।
যুবং শয়োরবসং পিপ্যথুর্গবি প্র দীর্ঘেণ বন্দনস্তার্যায়ুষা ॥৬॥

119.7

যুবং বন্দনং নির্ঋতং জরণ্যয়া রথং ন দস্রা করণা সমিন্বথঃ ।
ক্ষেত্রাদা বিপ্রং জনথো বিপন্যয়া প্র বামত্র বিধতে দংসনা ভুবৎ ॥৭॥

119.8

অগচ্ছতং কৃপমাণং পরাবতি পিতুঃ স্বস্য ত্যজসা নিবাধিতম্ ।
স্বর্বতীরিত ঊতীর্যুবোরহ চিত্রা অভীকে অভবন্নভিষ্টয়ঃ ॥৮॥

119.9

উত স্যা বাং মধুমন্মক্ষিকারপন্মদে সোমস্যৌশিজো হুবন্যতি ।
যুবং দধীচো মন আ বিবাসথো ঽথা শিরঃ প্রতি বামশ্ব্যং বদৎ ॥৯॥

119.10

যুবং পেদবে পুরুবারমশ্বিনা স্পৃধাং শ্বেতং তরুতারং দুবস্যথঃ ।
শর্যৈরভিদ্যুং পৃতনাসু দুষ্টরং চর্কৃত্যমিন্দ্রমিব চর্ষণীসহম্ ॥১০॥