Sukta 118

118.1

11 kakshivan dairghatamasa aushijah, ashvinau, trishtup

आ वां॒ रथो॑ अश्विना श्ये॒नप॑त्वा सुमृळी॒कः स्ववाँ॑ यात्व॒र्वाङ् ।
यो मर्त्य॑स्य॒ मन॑सो॒ जवी॑यान् त्रिवन्धु॒रो वृ॑षणा॒ वात॑रंहाः ॥१॥

A vam ratho ashvina shyenapatva sumrilikah svavam yatvarvang
Yo martyasya manaso javiyan trivandhuro vrishana vataranhah

त्रि॒व॒न्धु॒रेण॑ त्रि॒वृता॒ रथे॑न त्रिच॒क्रेण॑ सु॒वृता या॑तम॒र्वाक् ।
पिन्व॑तं॒ गा जिन्व॑त॒मर्व॑तो नो व॒र्धय॑तमश्विना वी॒रम॒स्मे ॥२॥

Trivandhurena trivrita rathena trichakrena suvrita yatamarvak
Pinvatam ga jinvatamarvato no vardhayatamashvina viramasme

प्र॒वद्या॑मना सु॒वृता॒ रथे॑न॒ दस्रा॑वि॒मं शृ॑णुतं॒ श्लोक॒मद्रे॑ः ।
किम॒ङ्ग वां॒ प्रत्यव॑र्तिं॒ गमि॑ष्ठा॒हुर्विप्रा॑सो अश्विना पुरा॒जाः ॥३॥

Pravadyamana suvrita rathena dasravimam shrinutam shlokamadreh
Kimanga vam pratyavartim gamishthahurvipraso ashvina purajah

आ वां॑ श्ये॒नासो॑ अश्विना वहन्तु॒ रथे॑ यु॒क्तास॑ आ॒शव॑ः पतं॒गाः ।
ये अ॒प्तुरो॑ दि॒व्यासो॒ न गृध्रा॑ अ॒भि प्रयो॑ नासत्या॒ वह॑न्ति ॥४॥

A vam shyenaso ashvina vahantu rathe yuktasa ashavah patangah
Ye apturo divyaso na gridhra abhi prayo nasatya vahanti

आ वां॒ रथं॑ युव॒तिस्ति॑ष्ठ॒दत्र॑ जु॒ष्ट्वी न॑रा दुहि॒ता सूर्य॑स्य ।
परि॑ वा॒मश्वा॒ वपु॑षः पतं॒गा वयो॑ वहन्त्वरु॒षा अ॒भीके॑ ॥५॥

A vam ratham yuvatistishthadatra jushtvi nara duhita suryasya
Pari vamashva vapushah patanga vayo vahantvarusha abhike

उद् वन्द॑नमैरतं दं॒सना॑भि॒रुद्रे॒भं द॑स्रा वृषणा॒ शची॑भिः ।
निष्टौ॒ग्र्यं पा॑रयथः समु॒द्रात् पुन॒श्च्यवा॑नं चक्रथु॒र्युवा॑नम् ॥६॥

Ud vandanamairatam dansanabhirudrebham dasra vrishana shachibhih
Nishtaugryam parayathah samudrat punashchyavanam chakrathuryuvanam

यु॒वमत्र॒येऽव॑नीताय त॒प्तमूर्ज॑मो॒मान॑मश्विनावधत्तम् ।
यु॒वं कण्वा॒यापि॑रिप्ताय॒ चक्षु॒ः प्रत्य॑धत्तं सुष्टु॒तिं जु॑जुषा॒णा ॥७॥

Yuvamatrayevanitaya taptamurjamomanamashvinavadhattam
Yuvam kanvayapiriptaya chakshuh pratyadhattam sushtutim jujushana

यु॒वं धे॒नुं श॒यवे॑ नाधि॒तायापि॑न्वतमश्विना पू॒र्व्याय॑ ।
अमु॑ञ्चतं॒ वर्ति॑का॒मंह॑सो॒ निः प्रति॒ जङ्घां॑ वि॒श्पला॑या अधत्तम् ॥८॥

Yuvam dhenum shayave nadhitayapinvatamashvina purvyaya
Amunchatam vartikamanhaso nih prati jangham vishpalaya adhattam

यु॒वं श्वे॒तं पे॒दव॒ इन्द्र॑जूतमहि॒हन॑मश्विनादत्त॒मश्व॑म् ।
जो॒हूत्र॑म॒र्यो अ॒भिभू॑तिमु॒ग्रं स॑हस्र॒सां वृष॑णं वी॒ड्व॑ङ्गम् ॥९॥

Yuvam shvetam pedava indrajutamahihanamashvinadattamashvam
Johutramaryo abhibhutimugram sahasrasam vrishanam vidvangam

ता वां॑ नरा॒ स्वव॑से सुजा॒ता हवा॑महे अश्विना॒ नाध॑मानाः ।
आ न॒ उप॒ वसु॑मता॒ रथे॑न॒ गिरो॑ जुषा॒णा सु॑वि॒ताय॑ यातम् ॥१०॥

Ta vam nara svavase sujata havamahe ashvina nadhamanah
A na upa vasumata rathena giro jushana suvitaya yatam

आ श्ये॒नस्य॒ जव॑सा॒ नूत॑नेना॒स्मे या॑तं नासत्या स॒जोषा॑ः ।
हवे॒ हि वा॑मश्विना रा॒तह॑व्यः शश्वत्त॒माया॑ उ॒षसो॒ व्यु॑ष्टौ ॥११॥

A shyenasya javasa nutanenasme yatam nasatya sajoshah
Have hi vamashvina ratahavyah shashvattamaya ushaso vyushtau