Sukta 116

116.1

25 kakshivan dairghatamasa aushijah, ashvinau, trishtup

नास॑त्याभ्यां ब॒र्हिरि॑व॒ प्र वृ॑ञ्जे॒ स्तोमाँ॑ इयर्म्य॒भ्रिये॑व॒ वात॑ः ।
यावर्भ॑गाय विम॒दाय॑ जा॒यां से॑ना॒जुवा॑ न्यू॒हतू॒ रथे॑न ॥१॥

Nasatyabhyam barhiriva pra vrinje stomam iyarmyabhriyeva vatah
Yavarbhagaya vimadaya jayam senajuva nyuhatu rathena

116.2

वी॒ळु॒पत्म॑भिराशु॒हेम॑भिर्वा दे॒वानां॑ वा जू॒तिभि॒ः शाश॑दाना ।
तद् रास॑भो नासत्या स॒हस्र॑मा॒जा य॒मस्य॑ प्र॒धने॑ जिगाय ॥२॥

Vilupatmabhirashuhemabhirva devanam va jutibhih shashadana
Tad rasabho nasatya sahasramaja yamasya pradhane jigaya

116.3

तुग्रो॑ ह भु॒ज्युम॑श्विनोदमे॒घे र॒यिं न कश्चि॑न्ममृ॒वाँ अवा॑हाः ।
तमू॑हथुर्नौ॒भिरा॑त्म॒न्वती॑भिरन्तरिक्ष॒प्रुद्भि॒रपो॑दकाभिः ॥३॥

Tugro ha bhujyumashvinodameghe rayim na kashchinmamrivam avahah
Tamuhathurnaubhiratmanvatibhirantarikshaprudbhirapodakabhih

116.4

ति॒स्रः क्षप॒स्त्रिरहा॑ति॒व्रज॑द्भि॒र्नास॑त्या भु॒ज्युमू॑हथुः पतं॒गैः ।
स॒मु॒द्रस्य॒ धन्व॑न्ना॒र्द्रस्य॑ पा॒रे त्रि॒भी रथै॑ः श॒तप॑द्भि॒ः षळ॑श्वैः ॥४॥

Tisrah kshapastrirahativrajadbhirnasatya bhujyumuhathuh patangaih
Samudrasya dhanvannardrasya pare tribhi rathaih shatapadbhih shalashvaih

116.5

अ॒ना॒र॒म्भ॒णे तद॑वीरयेथामनास्था॒ने अ॑ग्रभ॒णे स॑मु॒द्रे ।
यद॑श्विना ऊ॒हथु॑र्भु॒ज्युमस्तं॑ श॒तारि॑त्रां॒ नाव॑मातस्थि॒वांस॑म् ॥५॥

Anarambhane tadavirayethamanasthane agrabhane samudre
Yadashvina uhathurbhujyumastam shataritram navamatasthivansam

116.6

यम॑श्विना द॒दथु॑ः श्वे॒तमश्व॑म॒घाश्वा॑य॒ शश्व॒दित् स्व॒स्ति ।
तद् वां दा॒त्रं महि॑ की॒र्तेन्यं॑ भूत् पै॒द्वो वा॒जी सद॒मिद्धव्यो॑ अ॒र्यः ॥६॥

Yamashvina dadathuh shvetamashvamaghashvaya shashvadit svasti
Tad vam datram mahi kirtenyam bhut paidvo vaji sadamiddhavyo aryah

116.7

यु॒वं न॑रा स्तुव॒ते प॑ज्रि॒याय॑ क॒क्षीव॑ते अरदतं॒ पुरं॑धिम् ।
का॒रो॒त॒राच्छ॒फादश्व॑स्य॒ वृष्ण॑ः श॒तं कु॒म्भाँ अ॑सिञ्चतं॒ सुरा॑याः ॥७॥

Yuvam nara stuvate pajriyaya kakshivate aradatam purandhim
Karotarachchhaphadashvasya vrishnah shatam kumbham asinchatam surayah

116.8

हि॒मेना॒ग्निं घ्रं॒सम॑वारयेथां पितु॒मती॒मूर्ज॑मस्मा अधत्तम् ।
ऋ॒बीसे॒ अत्रि॑मश्वि॒नाव॑नीत॒मुन्नि॑न्यथु॒ः सर्व॑गणं स्व॒स्ति ॥८॥

Himenagnim ghransamavarayetham pitumatimurjamasma adhattam
Ribise atrimashvinavanitamunninyathuh sarvaganam svasti

116.9

परा॑व॒तं ना॑सत्यानुदेथामु॒च्चाबु॑ध्नं चक्रथुर्जि॒ह्मबा॑रम् ।
क्षर॒न्नापो॒ न पा॒यना॑य रा॒ये स॒हस्रा॑य॒ तृष्य॑ते॒ गोत॑मस्य ॥९॥

Paravatam nasatyanudethamuchchabudhnam chakrathurjihmabaram
Ksharannapo na payanaya raye sahasraya trishyate gotamasya

116.10

जु॒जु॒रुषो॑ नासत्यो॒त व॒व्रिं प्रामु॑ञ्चतं द्रा॒पिमि॑व॒ च्यवा॑नात् ।
प्राति॑रतं जहि॒तस्यायु॑र्द॒स्रादित् पति॑मकृणुतं क॒नीना॑म् ॥१०॥

Jujurusho nasatyota vavrim pramunchatam drapimiva chyavanat
Pratiratam jahitasyayurdasradit patimakrinutam kaninam

116.11

तद् वां नरा॒ शंस्यं॒ राध्यं॑ चाभिष्टि॒मन्ना॑सत्या॒ वरू॑थम् ।
यद् वि॒द्वांसा॑ नि॒धिमि॒वाप॑गूह्ल॒मुद् द॑र्श॒तादू॒पथु॒र्वन्द॑नाय ॥११॥

Tad vam nara shansyam radhyam chabhishtimannasatya varutham
Yad vidvansa nidhimivapaguhlamud darshatadupathurvandanaya

116.12

तद् वां नरा स॒नये॒ दंस॑ उ॒ग्रमा॒विष्कृ॑णोमि तन्य॒तुर्न वृ॒ष्टिम् ।
द॒ध्यङ् ह॒ यन्मध्वा॑थर्व॒णो वा॒मश्व॑स्य शी॒र्ष्णा प्र यदी॑मु॒वाच॑ ॥१२॥

Tad vam nara sanaye dansa ugramavishkrinomi tanyaturna vrishtim
Dadhyang ha yanmadhvatharvano vamashvasya shirshna pra yadimuvacha

116.13

अजो॑हवीन्नासत्या क॒रा वां॑ म॒हे याम॑न् पुरुभुजा॒ पुरं॑धिः ।
श्रु॒तं तच्छासु॑रिव वध्रिम॒त्या हिर॑ण्यहस्तमश्विनावदत्तम् ॥१३॥

Ajohavinnasatya kara vam mahe yaman purubhuja purandhih
Shrutam tachchhasuriva vadhrimatya hiranyahastamashvinavadattam

116.14

आ॒स्नो वृक॑स्य॒ वर्ति॑काम॒भीके॑ यु॒वं न॑रा नासत्यामुमुक्तम् ।
उ॒तो क॒विं पु॑रुभुजा यु॒वं ह॒ कृप॑माणमकृणुतं वि॒चक्षे॑ ॥१४॥

Asno vrikasya vartikamabhike yuvam nara nasatyamumuktam
Uto kavim purubhuja yuvam ha kripamanamakrinutam vichakshe

116.15

च॒रित्रं॒ हि वेरि॒वाच्छे॑दि प॒र्णमा॒जा खे॒लस्य॒ परि॑तक्म्यायाम् ।
स॒द्यो जङ्घा॒माय॑सीं वि॒श्पला॑यै॒ धने॑ हि॒ते सर्त॑वे॒ प्रत्य॑धत्तम् ॥१५॥

Charitram hi verivachchhedi parnamaja khelasya paritakmyayam
Sadyo janghamayasim vishpalayai dhane hite sartave pratyadhattam

116.16

श॒तं मे॒षान् वृ॒क्ये॑ चक्षदा॒नमृ॒ज्राश्वं॒ तं पि॒तान्धं च॑कार ।
तस्मा॑ अ॒क्षी ना॑सत्या वि॒चक्ष॒ आध॑त्तं दस्रा भिषजावन॒र्वन् ॥१६॥

Shatam meshan vrikye chakshadanamrijrashvam tam pitandham chakara
Tasma akshi nasatya vichaksha adhattam dasra bhishajavanarvan

116.17

आ वां॒ रथं॑ दुहि॒ता सूर्य॑स्य॒ कार्ष्मे॑वातिष्ठ॒दर्व॑ता॒ जय॑न्ती ।
विश्वे॑ दे॒वा अन्व॑मन्यन्त हृ॒द्भिः समु॑ श्रि॒या ना॑सत्या सचेथे ॥१७॥

A vam ratham duhita suryasya karshmevatishthadarvata jayanti
Vishve deva anvamanyanta hridbhih samu shriya nasatya sachethe

116.18

यदया॑तं॒ दिवो॑दासाय व॒र्तिर्भ॒रद्वा॑जायाश्विना॒ हय॑न्ता ।
रे॒वदु॑वाह सच॒नो रथो॑ वां वृष॒भश्च॑ शिंशु॒मार॑श्च यु॒क्ता ॥१८॥

Yadayatam divodasaya vartirbharadvajayashvina hayanta
Revaduvaha sachano ratho vam vrishabhashcha shinshumarashcha yukta

116.19

र॒यिं सु॑क्ष॒त्रं स्व॑प॒त्यमायु॑ः सु॒वीर्यं॑ नासत्या॒ वह॑न्ता ।
आ ज॒ह्नावीं॒ सम॑न॒सोप॒ वाजै॒स्त्रिरह्नो॑ भा॒गं दध॑तीमयातम् ॥१९॥

Rayim sukshatram svapatyamayuh suviryam nasatya vahanta
A jahnavim samanasopa vajaistrirahno bhagam dadhatimayatam

116.20

परि॑विष्टं जाहु॒षं वि॒श्वत॑ः सीं सु॒गेभि॒र्नक्त॑मूहथू॒ रजो॑भिः ।
वि॒भि॒न्दुना॑ नासत्या॒ रथे॑न॒ वि पर्व॑ताँ अजर॒यू अ॑यातम् ॥२०॥

Parivishtam jahusham vishvatah sim sugebhirnaktamuhathu rajobhih
Vibhinduna nasatya rathena vi parvatam ajarayu ayatam

116.21

एक॑स्या॒ वस्तो॑रावतं॒ रणा॑य॒ वश॑मश्विना स॒नये॑ स॒हस्रा॑ ।
निर॑हतं दु॒च्छुना॒ इन्द्र॑वन्ता पृथु॒श्रव॑सो वृषणा॒वरा॑तीः ॥२१॥

Ekasya vastoravatam ranaya vashamashvina sanaye sahasra
Nirahatam duchchhuna indravanta prithushravaso vrishanavaratih

116.22

श॒रस्य॑ चिदार्च॒त्कस्या॑व॒तादा नी॒चादु॒च्चा च॑क्रथु॒ः पात॑वे॒ वाः ।
श॒यवे॑ चिन्नासत्या॒ शची॑भि॒र्जसु॑रये स्त॒र्यं॑ पिप्यथु॒र्गाम् ॥२२॥

Sharasya chidarchatkasyavatada nichaduchcha chakrathuh patave vah
Shayave chinnasatya shachibhirjasuraye staryam pipyathurgam

116.23

अ॒व॒स्य॒ते स्तु॑व॒ते कृ॑ष्णि॒याय॑ ऋजूय॒ते ना॑सत्या॒ शची॑भिः ।
प॒शुं न न॒ष्टमि॑व॒ दर्श॑नाय विष्णा॒प्वं॑ ददथु॒र्विश्व॑काय ॥२३॥

Avasyate stuvate krishniyaya rijuyate nasatya shachibhih
Pashum na nashtamiva darshanaya vishnapvam dadathurvishvakaya

116.24

दश॒ रात्री॒रशि॑वेना॒ नव॒ द्यूनव॑नद्धं श्नथि॒तम॒प्स्व १न्तः ।
विप्रु॑तं रे॒भमु॒दनि॒ प्रवृ॑क्त॒मुन्नि॑न्यथु॒ः सोम॑मिव स्रु॒वेण॑ ॥२४॥

Dasha ratrirashivena nava dyunavanaddham shnathitamapsva 1ntah
Viprutam rebhamudani pravriktamunninyathuh somamiva sruvena

116.25

प्र वां॒ दंसां॑स्यश्विनाववोचम॒स्य पति॑ः स्यां सु॒गव॑ः सु॒वीर॑ः ।
उ॒त पश्य॑न्नश्नु॒वन् दी॒र्घमायु॒रस्त॑मि॒वेज्ज॑रि॒माणं॑ जगम्याम् ॥२५॥

Pra vam dansansyashvinavavochamasya patih syam sugavah suvirah
Uta pashyannashnuvan dirghamayurastamivejjarimanam jagamyam