UtshovChapter 148
148.1
युधिष्ठिर उवाच
ये च धर्ममसूयन्ति ये चैनं पर्युपासते
ब्रवीतु भगवानेतत्क्व ते गच्छन्ति तादृशाः
Yudhishthira uvacha
Ye cha dharmamasuyanti ye chainam paryupasate
Bravitu bhagavanetatkva te gachchhanti tadrishah
148.2
भीष्म उवाच
रजसा तमसा चैव समवस्तीर्णचेतसः
नरकं प्रतिपद्यन्ते धर्मविद्वेषिणो नराः
Bhishma uvacha
Rajasa tamasa chaiva samavastirnachetasah
Narakam pratipadyante dharmavidveshino narah
148.3
ये तु धर्मं महाराज सततं पर्युपासते
सत्यार्जवपराः सन्तस्ते वै स्वर्गभुजो नराः
Ye tu dharmam maharaja satatam paryupasate
Satyarjavaparah santaste vai svargabhujo narah
148.4
धर्म एव रतिस्तेषामाचार्योपासनाद्भवेत्
देवलोकं प्रपद्यन्ते ये धर्मं पर्युपासते
Dharma eva ratisteshamacharyopasanadbhavet
Devalokam prapadyante ye dharmam paryupasate
148.5
मनुष्या यदि वा देवाः शरीरमुपताप्य वै
धर्मिणः सुखमेधन्ते लोभद्वेषविवर्जिताः
Manushya yadi va devah shariramupatapya vai
Dharminah sukhamedhante lobhadveshavivarjitah
148.6
प्रथमं ब्रह्मणः पुत्रं धर्ममाहुर्मनीषिणः
धर्मिणः पर्युपासन्ते फलं पक्वमिवाशयः
Prathamam brahmanah putram dharmamahurmanishinah
Dharminah paryupasante phalam pakvamivashayah
148.7
युधिष्ठिर उवाच
असतां कीदृशं रूपं साधवः किं च कुर्वते
ब्रवीतु मे भवानेतत्सन्तोऽसन्तश्च कीदृशाः
Yudhishthira uvacha
Asatam kidrisham rupam sadhavah kim cha kurvate
Bravitu me bhavanetatsantosantashcha kidrishah
148.8
भीष्म उवाच
दुराचाराश्च दुर्धर्षा दुर्मुखाश्चाप्यसाधवः
साधवः शीलसंपन्नाः शिष्टाचारस्य लक्षणम्
Bhishma uvacha
Duracharashcha durdharsha durmukhashchapyasadhavah
Sadhavah shilasampannah shishtacharasya lakshanam
148.9
राजमार्गे गवां मध्ये गोष्ठमध्ये च धर्मिणः
नोपसेवन्ति राजेन्द्र सर्गं मूत्रपुरीषयोः
Rajamarge gavam madhye goshthamadhye cha dharminah
Nopasevanti rajendra sargam mutrapurishayoh
148.10
पञ्चानामशनं दत्त्वा शेषमश्नन्ति साधवः
न जल्पन्ति च भुञ्जाना न निद्रान्त्यार्द्रपाणयः
Panchanamashanam dattva sheshamashnanti sadhavah
Na jalpanti cha bhunjana na nidrantyardrapanayah
148.11
चित्रभानुमनड्वाहं देवं गोष्ठं चतुष्पथम्
ब्राह्मणं धार्मिकं चैत्यं ते कुर्वन्ति प्रदक्षिणम्
Chitrabhanumanadvaham devam goshtham chatushpatham
Brahmanam dharmikam chaityam te kurvanti pradakshinam
148.12
वृद्धानां भारतप्तानां स्त्रीणां बालातुरस्य च
ब्राह्मणानां गवां राज्ञां पन्थानं ददते च ते
Vriddhanam bharataptanam strinam balaturasya cha
Brahmananam gavam ragyam panthanam dadate cha te
148.13
अतिथीनां च सर्वेषां प्रेष्याणां स्वजनस्य च
तथा शरणकामानां गोप्ता स्यात्स्वागतप्रदः
Atithinam cha sarvesham preshyanam svajanasya cha
Tatha sharanakamanam gopta syatsvagatapradah
148.14
सायं प्रातर्मनुष्याणामशनं देवनिर्मितम्
नान्तरा भोजनं दृष्टमुपवासविधिर्हि सः
Sayam pratarmanushyanamashanam devanirmitam
Nantara bhojanam drishtamupavasavidhirhi sah
148.15
होमकाले यथा वह्निः कालमेव प्रतीक्षते
ऋतुकाले तथा नारी ऋतुमेव प्रतीक्षते
न चान्यां गच्छते यस्तु ब्रह्मचर्यं हि तत्स्मृतम्
Homakale yatha vahnih kalameva pratikshate
Ritukale tatha nari ritumeva pratikshate
Na chanyam gachchhate yastu brahmacharyam hi tatsmritam
148.16
अमृतं ब्राह्मणा गाव इत्येतत्त्रयमेकतः
तस्माद्गोब्राह्मणं नित्यमर्चयेत यथाविधि
Amritam brahmana gava ityetattrayamekatah
Tasmadgobrahmanam nityamarchayeta yathavidhi
148.17
यजुषा संस्कृतं मांसमुपभुञ्जन्न दुष्यति
पृष्ठमांसं वृथामांसं पुत्रमांसं च तत्समम्
Yajusha sanskritam mansamupabhunjanna dushyati
Prishthamansam vrithamansam putramansam cha tatsamam
148.18
स्वदेशे परदेशे वाप्यतिथिं नोपवासयेत्
कर्म वै सफलं कृत्वा गुरूणां प्रतिपादयेत्
Svadeshe paradeshe vapyatithim nopavasayet
Karma vai saphalam kritva gurunam pratipadayet
148.19
गुरुभ्य आसनं देयमभिवाद्याभिपूज्य च
गुरूनभ्यर्च्य वर्धन्ते आयुषा यशसा श्रिया
Gurubhya asanam deyamabhivadyabhipujya cha
Gurunabhyarchya vardhante ayusha yashasa shriya
148.20
वृद्धान्नातिवदेज्जातु न च संप्रेषयेदपि
नासीनः स्यात्स्थितेष्वेवमायुरस्य न रिष्यते
Vriddhannativadejjatu na cha sampreshayedapi
Nasinah syatsthiteshvevamayurasya na rishyate
148.21
न नग्नामीक्षते नारीं न विद्वान्पुरुषानपि
मैथुनं सततं गुप्तमाहारं च समाचरेत्
Na nagnamikshate narim na vidvanpurushanapi
Maithunam satatam guptamaharam cha samacharet
148.22
तीर्थानां गुरवस्तीर्थं शुचीनां हृदयं शुचि
दर्शनानां परं ज्ञानं संतोषः परमं सुखम्
Tirthanam guravastirtham shuchinam hridayam shuchi
Darshananam param gyanam santoshah paramam sukham
148.23
सायं प्रातश्च वृद्धानां शृणुयात्पुष्कला गिरः
श्रुतमाप्नोति हि नरः सततं वृद्धसेवया
Sayam pratashcha vriddhanam shrinuyatpushkala girah
Shrutamapnoti hi narah satatam vriddhasevaya
148.24
स्वाध्याये भोजने चैव दक्षिणं पाणिमुद्धरेत्
यच्छेद्वाङ्मनसी नित्यमिन्द्रियाणां च विभ्रमम्
Svadhyaye bhojane chaiva dakshinam panimuddharet
Yachchhedvanmanasi nityamindriyanam cha vibhramam
148.25
संस्कृतं पायसं नित्यं यवागूं कृसरं हविः
अष्टकाः पितृदैवत्या वृद्धानामभिपूजनम्
Sanskritam payasam nityam yavagum krisaram havih
Ashtakah pitridaivatya vriddhanamabhipujanam
148.26
श्मश्रुकर्मणि मङ्गल्यं क्षुतानामभिनन्दनम्
व्याधितानां च सर्वेषामायुषः प्रतिनन्दनम्
Shmashrukarmani mangalyam kshutanamabhinandanam
Vyadhitanam cha sarveshamayushah pratinandanam
148.27
न जातु त्वमिति ब्रूयादापन्नोऽपि महत्तरम्
त्वंकारो वा वधो वेति विद्वत्सु न विशिष्यते
अवराणां समानानां शिष्याणां च समाचरेत्
Na jatu tvamiti bruyadapannopi mahattaram
Tvankaro va vadho veti vidvatsu na vishishyate
Avaranam samananam shishyanam cha samacharet
148.28
पापमाचक्षते नित्यं हृदयं पापकर्मिणाम्
ज्ञानपूर्वं विनश्यन्ति गूहमाना महाजने
Papamachakshate nityam hridayam papakarminam
Gyanapurvam vinashyanti guhamana mahajane
148.29
ज्ञानपूर्वं कृतं कर्म च्छादयन्ते ह्यसाधवः
न मां मनुष्याः पश्यन्ति न मां पश्यन्ति देवताः
पापेनाभिहतः पापः पापमेवाभिजायते
Gyanapurvam kritam karma chchhadayante hyasadhavah
Na mam manushyah pashyanti na mam pashyanti devatah
Papenabhihatah papah papamevabhijayate
148.30
यथा वार्धुषिको वृद्धिं देहभेदे प्रतीक्षते
धर्मेणापिहितं पापं धर्ममेवाभिवर्धयेत्
Yatha vardhushiko vriddhim dehabhede pratikshate
Dharmenapihitam papam dharmamevabhivardhayet
148.31
यथा लवणमम्भोभिराप्लुतं प्रविलीयते
प्रायश्चित्तहतं पापं तथा सद्यः प्रणश्यति
Yatha lavanamambhobhiraplutam praviliyate
Prayashchittahatam papam tatha sadyah pranashyati
148.32
तस्मात्पापं न गूहेत गूहमानं विवर्धते
कृत्वा तु साधुष्वाख्येयं ते तत्प्रशमयन्त्युत
Tasmatpapam na guheta guhamanam vivardhate
Kritva tu sadhushvakhyeyam te tatprashamayantyuta
148.33
आशया संचितं द्रव्यं यत्काले नोपभुज्यते
अन्ये चैतत्प्रपद्यन्ते वियोगे तस्य देहिनः
Ashaya sanchitam dravyam yatkale nopabhujyate
Anye chaitatprapadyante viyoge tasya dehinah
148.34
मानसं सर्वभूतानां धर्ममाहुर्मनीषिणः
तस्मात्सर्वाणि भूतानि धर्ममेव समासते
Manasam sarvabhutanam dharmamahurmanishinah
Tasmatsarvani bhutani dharmameva samasate
148.35
एक एव चरेद्धर्मं न धर्मध्वजिको भवेत्
धर्मवाणिजका ह्येते ये धर्ममुपभुञ्जते
Eka eva chareddharmam na dharmadhvajiko bhavet
Dharmavanijaka hyete ye dharmamupabhunjate
148.36
अर्चेद्देवानदम्भेन सेवेतामायया गुरून्
निधिं निदध्यात्पारत्र्यं यात्रार्थं दानशब्दितम्
Archeddevanadambhena sevetamayaya gurun
Nidhim nidadhyatparatryam yatrartham danashabditam