Utshovঅধ্যায় 148
148.1
যুধিষ্ঠির উবাচ
যে চ ধর্মমসূয়ন্তি যে চৈনং পর্যুপাসতে
ব্রবীতু ভগবানেতত্ক্ব তে গচ্ছন্তি তাদৃশাঃ
148.2
ভীষ্ম উবাচ
রজসা তমসা চৈব সমবস্তীর্ণচেতসঃ
নরকং প্রতিপদ্যন্তে ধর্মবিদ্বেষিণো নরাঃ
148.3
যে তু ধর্মং মহারাজ সততং পর্যুপাসতে
সত্যার্জবপরাঃ সন্তস্তে বৈ স্বর্গভুজো নরাঃ
148.4
ধর্ম এব রতিস্তেষামাচার্যোপাসনাদ্ভবেৎ
দেবলোকং প্রপদ্যন্তে যে ধর্মং পর্যুপাসতে
148.5
মনুষ্যা যদি বা দেবাঃ শরীরমুপতাপ্য বৈ
ধর্মিণঃ সুখমেধন্তে লোভদ্বেষবিবর্জিতাঃ
148.6
প্রথমং ব্রহ্মণঃ পুত্রং ধর্মমাহুর্মনীষিণঃ
ধর্মিণঃ পর্যুপাসন্তে ফলং পক্বমিবাশয়ঃ
148.7
যুধিষ্ঠির উবাচ
অসতাং কীদৃশং রূপং সাধবঃ কিং চ কুর্বতে
ব্রবীতু মে ভবানেতত্সন্তোঽসন্তশ্চ কীদৃশাঃ
148.8
ভীষ্ম উবাচ
দুরাচারাশ্চ দুর্ধর্ষা দুর্মুখাশ্চাপ্যসাধবঃ
সাধবঃ শীলসংপন্নাঃ শিষ্টাচারস্য লক্ষণম্
148.9
রাজমার্গে গবাং মধ্যে গোষ্ঠমধ্যে চ ধর্মিণঃ
নোপসেবন্তি রাজেন্দ্র সর্গং মূত্রপুরীষয়োঃ
148.10
পঞ্চানামশনং দত্ত্বা শেষমশ্নন্তি সাধবঃ
ন জল্পন্তি চ ভুঞ্জানা ন নিদ্রান্ত্যার্দ্রপাণয়ঃ
148.11
চিত্রভানুমনড্বাহং দেবং গোষ্ঠং চতুষ্পথম্
ব্রাহ্মণং ধার্মিকং চৈত্যং তে কুর্বন্তি প্রদক্ষিণম্
148.12
বৃদ্ধানাং ভারতপ্তানাং স্ত্রীণাং বালাতুরস্য চ
ব্রাহ্মণানাং গবাং রাজ্ঞাং পন্থানং দদতে চ তে
148.13
অতিথীনাং চ সর্বেষাং প্রেষ্যাণাং স্বজনস্য চ
তথা শরণকামানাং গোপ্তা স্যাত্স্বাগতপ্রদঃ
148.14
সায়ং প্রাতর্মনুষ্যাণামশনং দেবনির্মিতম্
নান্তরা ভোজনং দৃষ্টমুপবাসবিধির্হি সঃ
148.15
হোমকালে যথা বহ্নিঃ কালমেব প্রতীক্ষতে
ঋতুকালে তথা নারী ঋতুমেব প্রতীক্ষতে
ন চান্যাং গচ্ছতে যস্তু ব্রহ্মচর্যং হি তত্স্মৃতম্
148.16
অমৃতং ব্রাহ্মণা গাব ইত্যেতত্ত্রয়মেকতঃ
তস্মাদ্গোব্রাহ্মণং নিত্যমর্চয়েত যথাবিধি
148.17
যজুষা সংস্কৃতং মাংসমুপভুঞ্জন্ন দুষ্যতি
পৃষ্ঠমাংসং বৃথামাংসং পুত্রমাংসং চ তত্সমম্
148.18
স্বদেশে পরদেশে বাপ্যতিথিং নোপবাসয়েৎ
কর্ম বৈ সফলং কৃত্বা গুরূণাং প্রতিপাদয়েৎ
148.19
গুরুভ্য আসনং দেয়মভিবাদ্যাভিপূজ্য চ
গুরূনভ্যর্চ্য বর্ধন্তে আয়ুষা যশসা শ্রিয়া
148.20
বৃদ্ধান্নাতিবদেজ্জাতু ন চ সংপ্রেষয়েদপি
নাসীনঃ স্যাত্স্থিতেষ্বেবমায়ুরস্য ন রিষ্যতে
148.21
ন নগ্নামীক্ষতে নারীং ন বিদ্বান্পুরুষানপি
মৈথুনং সততং গুপ্তমাহারং চ সমাচরেৎ
148.22
তীর্থানাং গুরবস্তীর্থং শুচীনাং হৃদয়ং শুচি
দর্শনানাং পরং জ্ঞানং সংতোষঃ পরমং সুখম্
148.23
সায়ং প্রাতশ্চ বৃদ্ধানাং শৃণুয়াত্পুষ্কলা গিরঃ
শ্রুতমাপ্নোতি হি নরঃ সততং বৃদ্ধসেবয়া
148.24
স্বাধ্যায়ে ভোজনে চৈব দক্ষিণং পাণিমুদ্ধরেৎ
যচ্ছেদ্বাঙ্মনসী নিত্যমিন্দ্রিয়াণাং চ বিভ্রমম্
148.25
সংস্কৃতং পায়সং নিত্যং যবাগূং কৃসরং হবিঃ
অষ্টকাঃ পিতৃদৈবত্যা বৃদ্ধানামভিপূজনম্
148.26
শ্মশ্রুকর্মণি মঙ্গল্যং ক্ষুতানামভিনন্দনম্
ব্যাধিতানাং চ সর্বেষামায়ুষঃ প্রতিনন্দনম্
148.27
ন জাতু ত্বমিতি ব্রূয়াদাপন্নোঽপি মহত্তরম্
ত্বংকারো বা বধো বেতি বিদ্বত্সু ন বিশিষ্যতে
অবরাণাং সমানানাং শিষ্যাণাং চ সমাচরেৎ
148.28
পাপমাচক্ষতে নিত্যং হৃদয়ং পাপকর্মিণাম্
জ্ঞানপূর্বং বিনশ্যন্তি গূহমানা মহাজনে
148.29
জ্ঞানপূর্বং কৃতং কর্ম চ্ছাদয়ন্তে হ্যসাধবঃ
ন মাং মনুষ্যাঃ পশ্যন্তি ন মাং পশ্যন্তি দেবতাঃ
পাপেনাভিহতঃ পাপঃ পাপমেবাভিজায়তে
148.30
যথা বার্ধুষিকো বৃদ্ধিং দেহভেদে প্রতীক্ষতে
ধর্মেণাপিহিতং পাপং ধর্মমেবাভিবর্ধয়েৎ
148.31
যথা লবণমম্ভোভিরাপ্লুতং প্রবিলীয়তে
প্রায়শ্চিত্তহতং পাপং তথা সদ্যঃ প্রণশ্যতি
148.32
তস্মাত্পাপং ন গূহেত গূহমানং বিবর্ধতে
কৃত্বা তু সাধুষ্বাখ্যেয়ং তে তত্প্রশময়ন্ত্যুত
148.33
আশয়া সংচিতং দ্রব্যং যত্কালে নোপভুজ্যতে
অন্যে চৈতত্প্রপদ্যন্তে বিয়োগে তস্য দেহিনঃ
148.34
মানসং সর্বভূতানাং ধর্মমাহুর্মনীষিণঃ
তস্মাত্সর্বাণি ভূতানি ধর্মমেব সমাসতে
148.35
এক এব চরেদ্ধর্মং ন ধর্মধ্বজিকো ভবেৎ
ধর্মবাণিজকা হ্যেতে যে ধর্মমুপভুঞ্জতে
148.36
অর্চেদ্দেবানদম্ভেন সেবেতামায়য়া গুরূন্
নিধিং নিদধ্যাত্পারত্র্যং যাত্রার্থং দানশব্দিতম্