Utshovঅধ্যায় 147
147.1
বৈশংপায়ন উবাচ
ইত্যুক্তবতি বাক্যং তু কৃষ্ণে দেবকিনন্দনে
ভীষ্মং শাংতনবং ভূয়ঃ পর্যপৃচ্ছদ্যুধিষ্ঠিরঃ
147.2
নির্ণয়ে বা মহাবুদ্ধে সর্বধর্মভৃতাং বর
প্রত্যক্ষমাগমো বেতি কিং তয়োঃ কারণং ভবেৎ
147.3
ভীষ্ম উবাচ
নাস্ত্যত্র সংশয়ঃ কশ্চিদিতি মে বর্ততে মতিঃ
শৃণু বক্ষ্যামি তে প্রাজ্ঞ সম্যক্ত্বমনুপৃচ্ছসি
147.4
সংশয়ঃ সুগমো রাজন্নির্ণয়স্ত্বত্র দুর্গমঃ
দৃষ্টং শ্রুতমনন্তং হি যত্র সংশয়দর্শনম্
147.5
প্রত্যক্ষং কারণং দৃষ্টং হেতুকাঃ প্রাজ্ঞমানিনঃ
নাস্তীত্যেবং ব্যবস্যন্তি সত্যং সংশয়মেব চ
তদয়ুক্তং ব্যবস্যন্তি বালাঃ পণ্ডিতমানিনঃ
147.6
অথ চেন্মন্যসে চৈকং কারণং কিং ভবেদিতি
শক্যং দীর্ঘেণ কালেন যুক্তেনাতন্দ্রিতেন চ
প্রাণয়াত্রামনেকাং চ কল্পয়ানেন ভারত
147.7
তত্পরেণৈব নান্যেন শক্যং হ্যেতত্তু কারণম্
হেতূনামন্তমাসাদ্য বিপুলং জ্ঞানমুত্তমম্
জ্যোতিঃ সর্বস্য লোকস্য বিপুলং প্রতিপদ্যতে
147.8
তত্ত্বেনাগমনং রাজন্হেত্বন্তগমনং তথা
অগ্রাহ্যমনিবদ্ধং চ বাচঃ সংপরিবর্জনম্
147.9
যুধিষ্ঠির উবাচ
প্রত্যক্ষং লোকতঃ সিদ্ধং লোকাশ্চাগমপূর্বকাঃ
শিষ্টাচারো বহুবিধো ব্রূহি তন্মে পিতামহ
147.10
ভীষ্ম উবাচ
ধর্মস্য হ্রিয়মাণস্য বলবদ্ভির্দুরাত্মভিঃ
সংস্থা যত্নৈরপি কৃতা কালেন পরিভিদ্যতে
147.11
অধর্মা ধর্মরূপেণ তৃণৈঃ কূপা ইবাবৃতাঃ
ততস্তৈর্ভিদ্যতে বৃত্তং শৃণু চৈব যুধিষ্ঠির
147.12
অবৃত্ত্যা যে চ ভিন্দন্তি শ্রুতত্যাগপরায়ণাঃ
ধর্মবিদ্বেষিণো মন্দা ইত্যুক্তস্তেষু সংশয়ঃ
147.13
অতৃপ্যন্তস্তু সাধূনাং য এবাগমবুদ্ধয়ঃ
পরমিত্যেব সংতুষ্টাস্তানুপাস্স্ব চ পৃচ্ছ চ
147.14
কামার্থৌ পৃষ্ঠতঃ কৃত্বা লোভমোহানুসারিণৌ
ধর্ম ইত্যেব সংবুদ্ধাস্তানুপাস্স্ব চ পৃচ্ছ চ
147.15
ন তেষাং ভিদ্যতে বৃত্তং যজ্ঞস্বাধ্যায়কর্মভিঃ
আচারঃ কারণং চৈব ধর্মশ্চৈব ত্রয়ং পুনঃ
147.16
যুধিষ্ঠির উবাচ
পুনরেবেহ মে বুদ্ধিঃ সংশয়ে পরিমুহ্যতে
অপারে মার্গমাণস্য পরং তীরমপশ্যতঃ
147.17
বেদাঃ প্রত্যক্ষমাচারঃ প্রমাণং তত্ত্রয়ং যদি
পৃথক্ত্বং লভ্যতে চৈষাং ধর্মশ্চৈকস্ত্রয়ং কথম্
147.18
ভীষ্ম উবাচ
ধর্মস্য হ্রিয়মাণস্য বলবদ্ভির্দুরাত্মভিঃ
যদ্যেবং মন্যসে রাজংস্ত্রিধা ধর্মবিচারণা
147.19
এক এবেতি জানীহি ত্রিধা তস্য প্রদর্শনম্
পৃথক্ত্বে চৈব মে বুদ্ধিস্ত্রয়াণামপি বৈ তথা
147.20
উক্তো মার্গস্ত্রয়াণাং চ তত্তথৈব সমাচর
জিজ্ঞাসা তু ন কর্তব্যা ধর্মস্য পরিতর্কণাৎ
147.21
সদৈব ভরতশ্রেষ্ঠ মা তে ভূদত্র সংশয়ঃ
অন্ধো জড ইবাশঙ্কো যদ্ব্রবীমি তদাচর
147.22
অহিংসা সত্যমক্রোধো দানমেতচ্চতুষ্টয়ম্
অজাতশত্রো সেবস্ব ধর্ম এষ সনাতনঃ
147.23
ব্রাহ্মণেষু চ বৃত্তির্যা পিতৃপৈতামহোচিতা
তামন্বেহি মহাবাহো স্বর্গস্যৈতে হি দেশিকাঃ
147.24
প্রমাণমপ্রমাণং বৈ যঃ কুর্যাদবুধো নরঃ
ন স প্রমাণতামর্হো বিবাদজননো হি সঃ
147.25
ব্রাহ্মণানেব সেবস্ব সত্কৃত্য বহুমন্য চ
এতেষ্বেব ত্বিমে লোকাঃ কৃত্স্না ইতি নিবোধ তান্