Utshovঅধ্যায় 146
146.1
বাসুদেব উবাচ
যুধিষ্ঠির মহাবাহো মহাভাগ্যং মহাত্মনঃ
রুদ্রায় বহুরূপায় বহুনাম্নে নিবোধ মে
146.2
বদন্ত্যগ্নিং মহাদেবং তথা স্থাণুং মহেশ্বরম্
একাক্ষং ত্র্যম্বকং চৈব বিশ্বরূপং শিবং তথা
146.3
দ্বে তনূ তস্য দেবস্য বেদজ্ঞা ব্রাহ্মণা বিদুঃ
ঘোরামন্যাং শিবামন্যাং তে তনূ বহুধা পুনঃ
146.4
উগ্রা ঘোরা তনূর্যাস্য সোঽগ্নির্বিদ্যুত্স ভাস্করঃ
শিবা সৌম্যা চ যা তস্য ধর্মস্ত্বাপোঽথ চন্দ্রমাঃ
146.5
আত্মনোঽর্ধং তু তস্যাগ্নিরুচ্যতে ভরতর্ষভ
ব্রহ্মচর্যং চরত্যেষ শিবা যাস্য তনুস্তথা
146.6
যাস্য ঘোরতমা মূর্তির্জগত্সংহরতে তয়া
ঈশ্বরত্বান্মহত্ত্বাচ্চ মহেশ্বর ইতি স্মৃতঃ
146.7
যন্নির্দহতি যত্তীক্ষ্ণো যদুগ্রো যত্প্রতাপবান্
মাংসশোণিতমজ্জাদো যত্ততো রুদ্র উচ্যতে
146.8
দেবানাং সুমহান্যচ্চ যচ্চাস্য বিষয়ো মহান্
যচ্চ বিশ্বং মহত্পাতি মহাদেবস্ততঃ স্মৃতঃ
146.9
সমেধয়তি যন্নিত্যং সর্বার্থান্সর্বকর্মভিঃ
শিবমিচ্ছন্মনুষ্যাণাং তস্মাদেষ শিবঃ স্মৃতঃ
146.10
দহত্যূর্ধ্বং স্থিতো যচ্চ প্রাণোত্পত্তিঃ স্থিতিশ্চ যৎ
স্থিরলিঙ্গশ্চ যন্নিত্যং তস্মাত্স্থাণুরিতি স্মৃতঃ
146.11
যদস্য বহুধা রূপং ভূতং ভব্যং ভবত্তথা
স্থাবরং জঙ্গমং চৈব বহুরূপস্ততঃ স্মৃতঃ
146.12
ধূম্রং রূপং চ যত্তস্য ধূর্জটীত্যত উচ্যতে
বিশ্বে দেবাশ্চ যত্তস্মিন্বিশ্বরূপস্ততঃ স্মৃতঃ
146.13
সহস্রাক্ষোঽয়ুতাক্ষো বা সর্বতোক্ষিময়োঽপি বা
চক্ষুষঃ প্রভবস্তেজো নাস্ত্যন্তোঽথাস্য চক্ষুষাম্
146.14
সর্বথা যত্পশূন্পাতি তৈশ্চ যদ্রমতে পুনঃ
তেষামধিপতির্যচ্চ তস্মাত্পশুপতিঃ স্মৃতঃ
146.15
নিত্যেন ব্রহ্মচর্যেণ লিঙ্গমস্য যদা স্থিতম্
মহয়ন্ত্যস্য লোকাশ্চ মহেশ্বর ইতি স্মৃতঃ
146.16
বিগ্রহং পূজয়েদ্যো বৈ লিঙ্গং বাপি মহাত্মনঃ
লিঙ্গং পূজয়িতা নিত্যং মহতীং শ্রিয়মশ্নুতে
146.17
ঋষয়শ্চাপি দেবাশ্চ গন্ধর্বাপ্সরসস্তথা
লিঙ্গমেবার্চয়ন্তি স্ম যত্তদূর্ধ্বং সমাস্থিতম্
146.18
পূজ্যমানে ততস্তস্মিন্মোদতে স মহেশ্বরঃ
সুখং দদাতি প্রীতাত্মা ভক্তানাং ভক্তবত্সলঃ
146.19
এষ এব শ্মশানেষু দেবো বসতি নিত্যশঃ
যজন্তে তং জনাস্তত্র বীরস্থাননিষেবিণম্
146.20
বিষমস্থঃ শরীরেষু স মৃত্যুঃ প্রাণিনামিহ
স চ বায়ুঃ শরীরেষু প্রাণোঽপানঃ শরীরিণাম্
146.21
তস্য ঘোরাণি রূপাণি দীপ্তানি চ বহূনি চ
লোকে যান্যস্য পূজ্যন্তে বিপ্রাস্তানি বিদুর্বুধাঃ
146.22
নামধেয়ানি বেদেষু বহূন্যস্য যথার্থতঃ
নিরুচ্যন্তে মহত্ত্বাচ্চ বিভুত্বাত্কর্মভিস্তথা
146.23
বেদে চাস্য বিদুর্বিপ্রাঃ শতরুদ্রীয়মুত্তমম্
ব্যাসাদনন্তরং যচ্চাপ্যুপস্থানং মহাত্মনঃ
146.24
প্রদাতা সর্বলোকানাং বিশ্বং চাপ্যুচ্যতে মহৎ
জ্যেষ্ঠভূতং বদন্ত্যেনং ব্রাহ্মণা ঋষয়োঽপরে
146.25
প্রথমো হ্যেষ দেবানাং মুখাদগ্নিরজায়ত
গ্রহৈর্বহুবিধৈঃ প্রাণান্সংরুদ্ধানুত্সৃজত্যপি
146.26
স মোচয়তি পুণ্যাত্মা শরণ্যঃ শরণাগতান্
আয়ুরারোগ্যমৈশ্বর্যং বিত্তং কামাংশ্চ পুষ্কলান্
146.27
স দদাতি মনুষ্যেভ্যঃ স এবাক্ষিপতে পুনঃ
শক্রাদিষু চ দেবেষু তস্য চৈশ্বর্যমুচ্যতে
146.28
স এবাভ্যধিকো নিত্যং ত্রৈলোক্যস্য শুভাশুভে
ঐশ্বর্যাচ্চৈব কামানামীশ্বরঃ পুনরুচ্যতে
146.29
মহেশ্বরশ্চ লোকানাং মহতামীশ্বরশ্চ সঃ
বহুভির্বিবিধৈ রূপৈর্বিশ্বং ব্যাপ্তমিদং জগৎ
তস্য দেবস্য যদ্বক্ত্রং সমুদ্রে বডবামুখম্