Utshovঅধ্যায় 145
145.1
যুধিষ্ঠির উবাচ
দুর্বাসসঃ প্রসাদাত্তে যত্তদা মধুসূদন
অবাপ্তমিহ বিজ্ঞানং তন্মে ব্যাখ্যাতুমর্হসি
145.2
মহাভাগ্যং চ যত্তস্য নামানি চ মহাত্মনঃ
তত্ত্বতো জ্ঞাতুমিচ্ছামি সর্বং মতিমতাং বর
145.3
বাসুদেব উবাচ
হন্ত তে কথয়িষ্যামি নমস্কৃত্বা কপর্দিনে
যদবাপ্তং মহারাজ শ্রেয়ো যচ্চার্জিতং যশঃ
145.4
প্রয়তঃ প্রাতরুত্থায় যদধীয়ে বিশাং পতে
প্রাঞ্জলিঃ শতরুদ্রীয়ং তন্মে নিগদতঃ শৃণু
145.5
প্রজাপতিস্তত্সসৃজে তপসোঽন্তে মহাতপাঃ
শংকরস্ত্বসৃজত্তাত প্রজাঃ স্থাবরজঙ্গমাঃ
145.6
নাস্তি কিংচিত্পরং ভূতং মহাদেবাদ্বিশাং পতে
ইহ ত্রিষ্বপি লোকেষু ভূতানাং প্রভবো হি সঃ
145.7
ন চৈবোত্সহতে স্থাতুং কশ্চিদগ্রে মহাত্মনঃ
ন হি ভূতং সমং তেন ত্রিষু লোকেষু বিদ্যতে
145.8
গন্ধেনাপি হি সংগ্রামে তস্য ক্রুদ্ধস্য শত্রবঃ
বিসংজ্ঞা হতভূয়িষ্ঠা বেপন্তি চ পতন্তি চ
145.9
ঘোরং চ নিনদং তস্য পর্জন্যনিনদোপমম্
শ্রুত্বা বিদীর্যেদ্ধৃদয়ং দেবানামপি সংয়ুগে
145.10
যাংশ্চ ঘোরেণ রূপেণ পশ্যেত্ক্রুদ্ধঃ পিনাকধৃক্
ন সুরা নাসুরা লোকে ন গন্ধর্বা ন পন্নগাঃ
কুপিতে সুখমেধন্তে তস্মিন্নপি গুহাগতাঃ
145.11
প্রজাপতেশ্চ দক্ষস্য যজতো বিততে ক্রতৌ
বিব্যাধ কুপিতো যজ্ঞং নির্ভয়স্তু ভবস্তদা
ধনুষা বাণমুত্সৃজ্য সঘোষং বিননাদ চ
145.12
তে ন শর্ম কুতঃ শান্তিং বিষাদং লেভিরে সুরাঃ
বিদ্রুতে সহসা যজ্ঞে কুপিতে চ মহেশ্বরে
145.13
তেন জ্যাতলঘোষেণ সর্বে লোকাঃ সমাকুলাঃ
বভূবুরবশাঃ পার্থ বিষেদুশ্চ সুরাসুরাঃ
145.14
আপশ্চুক্ষুভিরে চৈব চকম্পে চ বসুংধরা
ব্যদ্রবন্গিরয়শ্চাপি দ্যৌঃ পফাল চ সর্বশঃ
145.15
অন্ধেন তমসা লোকাঃ প্রাবৃতা ন চকাশিরে
প্রনষ্টা জ্যোতিষাং ভাশ্চ সহ সূর্যেণ ভারত
145.16
ভৃশং ভীতাস্ততঃ শান্তিং চক্রুঃ স্বস্ত্যয়নানি চ
ঋষয়ঃ সর্বভূতানামাত্মনশ্চ হিতৈষিণঃ
145.17
ততঃ সোঽভ্যদ্রবদ্দেবান্ক্রুদ্ধো রৌদ্রপরাক্রমঃ
ভগস্য নয়নে ক্রুদ্ধঃ প্রহারেণ ব্যশাতয়ৎ
145.18
পূষাণং চাভিদুদ্রাব পরেণ বপুষান্বিতঃ
পুরোডাশং ভক্ষয়তো দশনান্বৈ ব্যশাতয়ৎ
145.19
ততঃ প্রণেমুর্দেবাস্তে বেপমানাঃ স্ম শংকরম্
পুনশ্চ সংদধে রুদ্রো দীপ্তং সুনিশিতং শরম্
145.20
রুদ্রস্য বিক্রমং দৃষ্ট্বা ভীতা দেবাঃ সহর্ষিভিঃ
ততঃ প্রসাদয়ামাসুঃ শর্বং তে বিবুধোত্তমাঃ
145.21
জেপুশ্চ শতরুদ্রীয়ং দেবাঃ কৃত্বাঞ্জলিং ততঃ
সংস্তূয়মানস্ত্রিদশৈঃ প্রসসাদ মহেশ্বরঃ
145.22
রুদ্রস্য ভাগং যজ্ঞে চ বিশিষ্টং তে ত্বকল্পয়ন্
ভয়েন ত্রিদশা রাজঞ্শরণং চ প্রপেদিরে
145.23
তেন চৈবাতিকোপেন স যজ্ঞঃ সংধিতোঽভবৎ
যদ্যচ্চাপি হতং তত্র তত্তথৈব প্রদীয়তে
145.24
অসুরাণাং পুরাণ্যাসংস্ত্রীণি বীর্যবতাং দিবি
আয়সং রাজতং চৈব সৌবর্ণমপরং তথা
145.25
নাশকত্তানি মঘবা ভেত্তুং সর্বায়ুধৈরপি
অথ সর্বেঽমরা রুদ্রং জগ্মুঃ শরণমর্দিতাঃ
145.26
তত ঊচুর্মহাত্মানো দেবাঃ সর্বে সমাগতাঃ
রুদ্র রৌদ্রা ভবিষ্যন্তি পশবঃ সর্বকর্মসু
জহি দৈত্যান্সহ পুরৈর্লোকাংস্ত্রায়স্ব মানদ
145.27
স তথোক্তস্তথেত্যুক্ত্বা বিষ্ণুং কৃত্বা শরোত্তমম্
শল্যমগ্নিং তথা কৃত্বা পুঙ্খং বৈবস্বতং যমম্
বেদান্কৃত্বা ধনুঃ সর্বাঞ্জ্যাং চ সাবিত্রিমুত্তমাম্
145.28
দেবান্রথবরং কৃত্বা বিনিয়ুজ্য চ সর্বশঃ
ত্রিপর্বণা ত্রিশল্যেন তেন তানি বিভেদ সঃ
145.29
শরেণাদিত্যবর্ণেন কালাগ্নিসমতেজসা
তেঽসুরাঃ সপুরাস্তত্র দগ্ধা রুদ্রেণ ভারত
145.30
তং চৈবাঙ্কগতং দৃষ্ট্বা বালং পঞ্চশিখং পুনঃ
উমা জিজ্ঞাসমানা বৈ কোঽয়মিত্যব্রবীত্তদা
145.31
অসূয়তশ্চ শক্রস্য বজ্রেণ প্রহরিষ্যতঃ
সবজ্রং স্তম্ভয়ামাস তং বাহুং পরিঘোপমম্
145.32
ন সংবুবুধিরে চৈনং দেবাস্তং ভুবনেশ্বরম্
সপ্রজাপতয়ঃ সর্বে তস্মিন্মুমুহুরীশ্বরে
145.33
ততো ধ্যাত্বাথ ভগবান্ব্রহ্মা তমমিতৌজসম্
অয়ং শ্রেষ্ঠ ইতি জ্ঞাত্বা ববন্দে তমুমাপতিম্
145.34
ততঃ প্রসাদয়ামাসুরুমাং রুদ্রং চ তে সুরাঃ
বভূব স তদা বাহুর্বলহন্তুর্যথা পুরা
145.35
স চাপি ব্রাহ্মণো ভূত্বা দুর্বাসা নাম বীর্যবান্
দ্বারবত্যাং মম গৃহে চিরং কালমুপাবসৎ
145.36
বিপ্রকারান্প্রয়ুঙ্ক্তে স্ম সুবহূন্মম বেশ্মনি
তানুদারতয়া চাহমক্ষমং তস্য দুঃসহম্
145.37
স দেবেন্দ্রশ্চ বায়ুশ্চ সোঽশ্বিনৌ স চ বিদ্যুতঃ
স চন্দ্রমাঃ স চেশানঃ স সূর্যো বরুণশ্চ সঃ
145.38
স কালঃ সোঽন্তকো মৃত্যুঃ স তমো রাত্র্যহানি চ
মাসার্ধমাসা ঋতবঃ সংধ্যে সংবত্সরশ্চ সঃ
145.39
স ধাতা স বিধাতা চ বিশ্বকর্মা স সর্ববিৎ
নক্ষত্রাণি দিশশ্চৈব প্রদিশোঽথ গ্রহাস্তথা
বিশ্বমূর্তিরমেয়াত্মা ভগবানমিতদ্যুতিঃ
145.40
একধা চ দ্বিধা চৈব বহুধা চ স এব চ
শতধা সহস্রধা চৈব তথা শতসহস্রধা
145.41
ঈদৃশঃ স মহাদেবো ভূয়শ্চ ভগবানতঃ
ন হি শক্যা গুণা বক্তুমপি বর্ষশতৈরপি