Utshovঅধ্যায় 144
144.1
যুধিষ্ঠির উবাচ
ব্রূহি ব্রাহ্মণপূজায়াং ব্যুষ্টিং ত্বং মধুসূদন
বেত্তা ত্বমস্য চার্থস্য বেদ ত্বাং হি পিতামহঃ
144.2
বাসুদেব উবাচ
শৃণুষ্বাবহিতো রাজন্দ্বিজানাং ভরতর্ষভ
যথাতত্ত্বেন বদতো গুণান্মে কুরুসত্তম
144.3
প্রদ্যুম্নঃ পরিপপ্রচ্ছ ব্রাহ্মণৈঃ পরিকোপিতঃ
কিং ফলং ব্রাহ্মণেষ্বস্তি পূজায়াং মধুসূদন
ঈশ্বরস্য সতস্তস্য ইহ চৈব পরত্র চ
144.4
সদা দ্বিজাতীন্সংপূজ্য কিং ফলং তত্র মানদ
এতদ্ব্রূহি পিতঃ সর্বং সুমহান্সংশয়োঽত্র মে
144.5
ইত্যুক্তবচনস্তেন প্রদ্যুম্নেন তদা ত্বহম্
প্রত্যব্রুবং মহারাজ যত্তচ্ছৃণু সমাহিতঃ
144.6
ব্যুষ্টিং ব্রাহ্মণপূজায়াং রৌক্মিণেয় নিবোধ মে
এতে হি সোমরাজান ঈশ্বরাঃ সুখদুঃখয়োঃ
144.7
অস্মিঁল্লোকে রৌক্মিণেয় তথামুষ্মিংশ্চ পুত্রক
ব্রাহ্মণপ্রমুখং সৌখ্যং ন মেঽত্রাস্তি বিচারণা
144.8
ব্রাহ্মণপ্রমুখং বীর্যমায়ুঃ কীর্তির্যশো বলম্
লোকা লোকেশ্বরাশ্চৈব সর্বে ব্রাহ্মণপূর্বকাঃ
144.9
তত্কথং নাদ্রিয়েয়ং বৈ ঈশ্বরোঽস্মীতি পুত্রক
মা তে মন্যুর্মহাবাহো ভবত্বত্র দ্বিজান্প্রতি
144.10
ব্রাহ্মণো হি মহদ্ভূতমস্মিঁল্লোকে পরত্র চ
ভস্ম কুর্যুর্জগদিদং ক্রুদ্ধাঃ প্রত্যক্ষদর্শিনঃ
144.11
অন্যানপি সৃজেয়ুশ্চ লোকাঁল্লোকেশ্বরাংস্তথা
কথং তেষু ন বর্তেয় সম্যগ্জ্ঞানাত্সুতেজসঃ
144.12
অবসন্মদ্গৃহে তাত ব্রাহ্মণো হরিপিঙ্গলঃ
চীরবাসা বিল্বদণ্ডী দীর্ঘশ্মশ্রুনখাদিমান্
দীর্ঘেভ্যশ্চ মনুষ্যেভ্যঃ প্রমাণাদধিকো ভুবি
144.13
স স্ম সংচরতে লোকান্যে দিব্যা যে চ মানুষাঃ
ইমা গাথা গায়মানশ্চত্বরেষু সভাসু চ
144.14
দুর্বাসসং বাসয়েত্কো ব্রাহ্মণং সত্কৃতং গৃহে
পরিভাষাং চ মে শ্রুত্বা কো নু দদ্যাত্প্রতিশ্রয়ম্
যো মাং কশ্চিদ্বাসয়েত ন স মাং কোপয়েদিহ
144.15
তং স্ম নাদ্রিয়তে কশ্চিত্ততোঽহং তমবাসয়ম্
144.16
স স্ম ভুঙ্ক্তে সহস্রাণাং বহূনামন্নমেকদা
একদা স্মাল্পকং ভুঙ্ক্তে ন বৈতি চ পুনর্গৃহান্
144.17
অকস্মাচ্চ প্রহসতি তথাকস্মাত্প্ররোদিতি
ন চাস্য বয়সা তুল্যঃ পৃথিব্যামভবত্তদা
144.18
সোঽস্মদাবসথং গত্বা শয্যাশ্চাস্তরণানি চ
কন্যাশ্চালংকৃতা দগ্ধ্বা ততো ব্যপগতঃ স্বয়ম্
144.19
অথ মামব্রবীদ্ভূয়ঃ স মুনিঃ সংশিতব্রতঃ
কৃষ্ণ পায়সমিচ্ছামি ভোক্তুমিত্যেব সত্বরঃ
144.20
সদৈব তু ময়া তস্য চিত্তজ্ঞেন গৃহে জনঃ
সর্বাণ্যেবান্নপানানি ভক্ষ্যাশ্চোচ্চাবচাস্তথা
ভবন্তু সত্কৃতানীতি পূর্বমেব প্রচোদিতঃ
144.21
ততোঽহং জ্বলমানং বৈ পায়সং প্রত্যবেদয়ম্
তদ্ভুক্ত্বৈব তু স ক্ষিপ্রং ততো বচনমব্রবীৎ
ক্ষিপ্রমঙ্গানি লিম্পস্ব পায়সেনেতি স স্ম হ
144.22
অবিমৃশ্যৈব চ ততঃ কৃতবানস্মি তত্তথা
তেনোচ্ছিষ্টেন গাত্রাণি শিরশ্চৈবাভ্যমৃক্ষয়ম্
144.23
স দদর্শ তদাভ্যাশে মাতরং তে শুভাননাম্
তামপি স্ময়মানঃ স পায়সেনাভ্যলেপয়ৎ
144.24
মুনিঃ পায়সদিগ্ধাঙ্গীং রথে তূর্ণময়োজয়ৎ
তমারুহ্য রথং চৈব নির্যয়ৌ স গৃহান্মম
144.25
অগ্নিবর্ণো জ্বলন্ধীমান্স দ্বিজো রথধুর্যবৎ
প্রতোদেনাতুদদ্বালাং রুক্মিণীং মম পশ্যতঃ
144.26
ন চ মে স্তোকমপ্যাসীদ্দুঃখমীর্ষ্যাকৃতং তদা
ততঃ স রাজমার্গেণ মহতা নির্যয়ৌ বহিঃ
144.27
তদ্দৃষ্ট্বা মহদাশ্চর্যং দাশার্হা জাতমন্যবঃ
তত্রাজল্পন্মিথঃ কেচিত্সমাভাষ্য পরস্পরম্
144.28
ব্রাহ্মণা এব জায়েরন্নান্যো বর্ণঃ কথংচন
কো হ্যেনং রথমাস্থায় জীবেদন্যঃ পুমানিহ
144.29
আশীবিষবিষং তীক্ষ্ণং ততস্তীক্ষ্ণতরং বিষম্
ব্রহ্মাশীবিষদগ্ধস্য নাস্তি কশ্চিচ্চিকিত্সকঃ
144.30
তস্মিন্ব্রজতি দুর্ধর্ষে প্রাস্খলদ্রুক্মিণী পথি
তাং নামর্ষয়ত শ্রীমাংস্ততস্তূর্ণমচোদয়ৎ
144.31
ততঃ পরমসংক্রুদ্ধো রথাত্প্রস্কন্দ্য স দ্বিজঃ
পদাতিরুত্পথেনৈব প্রাধাবদ্দক্ষিণামুখঃ
144.32
তমুত্পথেন ধাবন্তমন্বধাবং দ্বিজোত্তমম্
তথৈব পায়সাদিগ্ধঃ প্রসীদ ভগবন্নিতি
144.33
ততো বিলোক্য তেজস্বী ব্রাহ্মণো মামুবাচ হ
জিতঃ ক্রোধস্ত্বয়া কৃষ্ণ প্রকৃত্যৈব মহাভুজ
144.34
ন তেঽপরাধমিহ বৈ দৃষ্টবানস্মি সুব্রত
প্রীতোঽস্মি তব গোবিন্দ বৃণু কামান্যথেপ্সিতান্
প্রসন্নস্য চ মে তাত পশ্য ব্যুষ্টির্যথাবিধা
144.35
যাবদেব মনুষ্যাণামন্নে ভাবো ভবিষ্যতি
যথৈবান্নে তথা তেষাং ত্বয়ি ভাবো ভবিষ্যতি
144.36
যাবচ্চ পুণ্যা লোকেষু ত্বয়ি কীর্তির্ভবিষ্যতি
ত্রিষু লোকেষু তাবচ্চ বৈশিষ্ট্যং প্রতিপত্স্যসে
সুপ্রিয়ঃ সর্বলোকস্য ভবিষ্যসি জনার্দন
144.37
যত্তে ভিন্নং চ দগ্ধং চ যচ্চ কিংচিদ্বিনাশিতম্
সর্বং তথৈব দ্রষ্টাসি বিশিষ্টং বা জনার্দন
144.38
যাবদেতত্প্রলিপ্তং তে গাত্রেষু মধুসূদন
অতো মৃত্যুভয়ং নাস্তি যাবদিচ্ছা তবাচ্যুত
144.39
ন তু পাদতলে লিপ্তে কস্মাত্তে পুত্রকাদ্য বৈ
নৈতন্মে প্রিয়মিত্যেব স মাং প্রীতোঽব্রবীত্তদা
ইত্যুক্তোঽহং শরীরং স্বমপশ্যং শ্রীসমায়ুতম্
144.40
রুক্মিণীং চাব্রবীত্প্রীতঃ সর্বস্ত্রীণাং বরং যশঃ
কীর্তিং চানুত্তমাং লোকে সমবাপ্স্যসি শোভনে
144.41
ন ত্বাং জরা বা রোগো বা বৈবর্ণ্যং চাপি ভামিনি
স্প্রক্ষ্যন্তি পুণ্যগন্ধা চ কৃষ্ণমারাধয়িষ্যসি
144.42
ষোডশানাং সহস্রাণাং বধূনাং কেশবস্য হ
বরিষ্ঠা সহলোক্যা চ কেশবস্য ভবিষ্যসি
144.43
তব মাতরমিত্যুক্ত্বা ততো মাং পুনরব্রবীৎ
প্রস্থিতঃ সুমহাতেজা দুর্বাসা বহ্নিবজ্জ্বলন্
144.44
এষৈব তে বুদ্ধিরস্তু ব্রাহ্মণান্প্রতি কেশব
ইত্যুক্ত্বা স তদা পুত্র তত্রৈবান্তরধীয়ত
144.45
তস্মিন্নন্তর্হিতে চাহমুপাংশুব্রতমাদিশম্
যত্কিংচিদ্ব্রাহ্মণো ব্রূয়াত্সর্বং কুর্যামিতি প্রভো
144.46
এতদ্ব্রতমহং কৃত্বা মাত্রা তে সহ পুত্রক
ততঃ পরমহৃষ্টাত্মা প্রাবিশং গৃহমেব চ
144.47
প্রবিষ্টমাত্রশ্চ গৃহে সর্বং পশ্যামি তন্নবম্
যদ্ভিন্নং যচ্চ বৈ দগ্ধং তেন বিপ্রেণ পুত্রক
144.48
ততোঽহং বিস্ময়ং প্রাপ্তঃ সর্বং দৃষ্ট্বা নবং দৃঢম্
অপূজয়ং চ মনসা রৌক্মিণেয় দ্বিজং তদা
144.49
ইত্যহং রৌক্মিণেয়স্য পৃচ্ছতো ভরতর্ষভ
মাহাত্ম্যং দ্বিজমুখ্যস্য সর্বমাখ্যাতবাংস্তদা
144.50
তথা ত্বমপি কৌন্তেয় ব্রাহ্মণান্সততং প্রভো
পূজয়স্ব মহাভাগান্বাগ্ভির্দানৈশ্চ নিত্যদা
144.51
এবং ব্যুষ্টিমহং প্রাপ্তো ব্রাহ্মণানাং প্রসাদজাম্
যচ্চ মামাহ ভীষ্মোঽয়ং তত্সত্যং ভরতর্ষভ