Utshovঅধ্যায় 143
143.1
যুধিষ্ঠির উবাচ
ব্রাহ্মণানর্চসে রাজন্সততং সংশিতব্রতান্
কং তু কর্মোদয়ং দৃষ্ট্বা তানর্চসি নরাধিপ
143.2
কাং বা ব্রাহ্মণপূজায়াং ব্যুষ্টিং দৃষ্ট্বা মহাব্রত
তানর্চসি মহাবাহো সর্বমেতদ্বদস্ব মে
143.3
ভীষ্ম উবাচ
এষ তে কেশবঃ সর্বমাখ্যাস্যতি মহামতিঃ
ব্যুষ্টিং ব্রাহ্মণপূজায়াং দৃষ্টব্যুষ্টির্মহাব্রতঃ
143.4
বলং শ্রোত্রে বাঙ্মনশ্চক্ষুষী চ; জ্ঞানং তথা ন বিশুদ্ধং মমাদ্য
দেহন্যাসো নাতিচিরান্মতো মে; ন চাতিতূর্ণং সবিতাদ্য যাতি
143.5
উক্তা ধর্মা যে পুরাণে মহান্তো; ব্রাহ্মণানাং ক্ষত্রিয়াণাং বিশাং চ
পৌরাণং যে দণ্ডমুপাসতে চ; শেষং কৃষ্ণাদুপশিক্ষস্ব পার্থ
143.6
অহং হ্যেনং বেদ্মি তত্ত্বেন কৃষ্ণং; যোঽয়ং হি যচ্চাস্য বলং পুরাণম্
অমেয়াত্মা কেশবঃ কৌরবেন্দ্র; সোঽয়ং ধর্মং বক্ষ্যতি সংশয়েষু
143.7
কৃষ্ণঃ পৃথ্বীমসৃজত্খং দিবং চ; বরাহোঽয়ং ভীমবলঃ পুরাণঃ
অস্য চাধোঽথান্তরিক্ষং দিবং চ; দিশশ্চতস্রঃ প্রদিশশ্চতস্রঃ
সৃষ্টিস্তথৈবেয়মনুপ্রসূতা; স নির্মমে বিশ্বমিদং পুরাণম্
143.8
অস্য নাভ্যাং পুষ্করং সংপ্রসূতং; যত্রোত্পন্নঃ স্বয়মেবামিতৌজাঃ
যেনাচ্ছিন্নং তত্তমঃ পার্থ ঘোরং; যত্তত্তিষ্ঠত্যর্ণবং তর্জয়ানম্
143.9
কৃতে যুগে ধর্ম আসীত্সমগ্র;স্ত্রেতাকালে জ্ঞানমনুপ্রপন্নঃ
বলং ত্বাসীদ্দ্বাপরে পার্থ কৃষ্ণঃ; কলাবধর্মঃ ক্ষিতিমাজগাম
143.10
স পূর্বদেবো নিজঘান দৈত্যা;ন্স পূর্বদেবশ্চ বভূব সম্রাট্
স ভূতানাং ভাবনো ভূতভব্যঃ; স বিশ্বস্যাস্য জগতশ্চাপি গোপ্তা
143.11
যদা ধর্মো গ্লায়তি বৈ সুরাণাং; তদা কৃষ্ণো জায়তে মানুষেষু
ধর্মে স্থিত্বা স তু বৈ ভাবিতাত্মা; পরাংশ্চ লোকানপরাংশ্চ যাতি
143.12
ত্যাজ্যাংস্ত্যক্ত্বাথাসুরাণাং বধায়; কার্যাকার্যে কারণং চৈব পার্থ
কৃতং করিষ্যত্ক্রিয়তে চ দেবো; মুহুঃ সোমং বিদ্ধি চ শক্রমেতম্
143.13
স বিশ্বকর্মা স চ বিশ্বরূপঃ; স বিশ্বভৃদ্বিশ্বসৃগ্বিশ্বজিচ্চ
স শূলভৃচ্ছোণিতভৃত্করাল;স্তং কর্মভির্বিদিতং বৈ স্তুবন্তি
143.14
তং গন্ধর্বা অপ্সরসশ্চ নিত্য;মুপতিষ্ঠন্তে বিবুধানাং শতানি
তং রাক্ষসাশ্চ পরিসংবহন্তে; রায়স্পোষঃ স বিজিগীষুরেকঃ
143.15
তমধ্বরে শংসিতারঃ স্তুবন্তি; রথংতরে সামগাশ্চ স্তুবন্তি
তং ব্রাহ্মণা ব্রহ্মমন্ত্রৈঃ স্তুবন্তি; তস্মৈ হবিরধ্বর্যবঃ কল্পয়ন্তি
143.16
স পৌরাণীং ব্রহ্মগুহাং প্রবিষ্টো; মহীসত্রং ভারতাগ্রে দদর্শ
স চৈব গামুদ্দধারাগ্র্যকর্মা; বিক্ষোভ্য দৈত্যানুরগান্দানবাংশ্চ
143.17
তস্য ভক্ষান্বিবিধান্বেদয়ন্তি; তমেবাজৌ বাহনং বেদয়ন্তি
তস্যান্তরিক্ষং পৃথিবী দিবং চ; সর্বং বশে তিষ্ঠতি শাশ্বতস্য
143.18
স কুম্ভরেতাঃ সসৃজে পুরাণং; যত্রোত্পন্নমৃষিমাহুর্বসিষ্ঠম্
স মাতরিশ্বা বিভুরশ্ববাজী; স রশ্মিমান্সবিতা চাদিদেবঃ
143.19
তেনাসুরা বিজিতাঃ সর্ব এব; তস্য বিক্রান্তৈর্বিজিতানীহ ত্রীণি
স দেবানাং মানুষাণাং পিতৄণাং; তমেবাহুর্যজ্ঞবিদাং বিতানম্
143.20
স এব কালং বিভজন্নুদেতি; তস্যোত্তরং দক্ষিণং চায়নে দ্বে
তস্যৈবোর্ধ্বং তির্যগধশ্চরন্তি; গভস্তয়ো মেদিনীং তাপয়ন্তঃ
143.21
তং ব্রাহ্মণা বেদবিদো জুষন্তি; তস্যাদিত্যো ভামুপয়ুজ্য ভাতি
স মাসি মাস্যধ্বরকৃদ্বিধত্তে; তমধ্বরে বেদবিদঃ পঠন্তি
143.22
স একয়ুক্চক্রমিদং ত্রিনাভি; সপ্তাশ্বয়ুক্তং বহতে বৈ ত্রিধামা
মহাতেজাঃ সর্বগঃ সর্বসিংহঃ; কৃষ্ণো লোকান্ধারয়তে তথৈকঃ
অশ্নন্ননশ্নংশ্চ তথৈব ধীরঃ; কৃষ্ণং সদা পার্থ কর্তারমেহি
143.23
স একদা কক্ষগতো মহাত্মা; তৃপ্তো বিভুঃ খাণ্ডবে ধূমকেতুঃ
স রাক্ষসানুরগাংশ্চাবজিত্য; সর্বত্রগঃ সর্বমগ্নৌ জুহোতি
143.24
স এবাশ্বঃ শ্বেতমশ্বং প্রয়চ্ছ;ত্স এবাশ্বানথ সর্বাংশ্চকার
ত্রিবন্ধুরস্তস্য রথস্ত্রিচক্র;স্ত্রিবৃচ্ছিরাশ্চতুরস্রশ্চ তস্য
143.25
স বিহায়ো ব্যদধাত্পঞ্চনাভিঃ; স নির্মমে গাং দিবমন্তরিক্ষম্
এবং রম্যানসৃজত্পর্বতাংশ্চ; হৃষীকেশোঽমিতদীপ্তাগ্নিতেজাঃ
143.26
স লঙ্ঘয়ন্বৈ সরিতো জিঘাংস;ন্স তং বজ্রং প্রহরন্তং নিরাস
স মহেন্দ্রঃ স্তূয়তে বৈ মহাধ্বরে; বিপ্রৈরেকো ঋক্সহস্রৈঃ পুরাণৈঃ
143.27
দুর্বাসা বৈ তেন নান্যেন শক্যো; গৃহে রাজন্বাসয়িতুং মহৌজাঃ
তমেবাহুরৃষিমেকং পুরাণং; স বিশ্বকৃদ্বিদধাত্যাত্মভাবান্
143.28
বেদাংশ্চ যো বেদয়তেঽধিদেবো; বিধীংশ্চ যশ্চাশ্রয়তে পুরাণান্
কামে বেদে লৌকিকে যত্ফলং চ; বিষ্বক্সেনে সর্বমেতত্প্রতীহি
143.29
জ্যোতীংষি শুক্লানি চ সর্বলোকে; ত্রয়ো লোকা লোকপালাস্ত্রয়শ্চ
ত্রয়োঽগ্নয়ো ব্যাহৃতয়শ্চ তিস্রঃ; সর্বে দেবা দেবকীপুত্র এব
143.30
সংবত্সরঃ স ঋতুঃ সোঽর্ধমাসঃ; সোঽহোরাত্রঃ স কলা বৈ স কাষ্ঠাঃ
মাত্রা মুহূর্তাশ্চ লবাঃ ক্ষণাশ্চ; বিষ্বক্সেনে সর্বমেতত্প্রতীহি
143.31
চন্দ্রাদিত্যৌ গ্রহনক্ষত্রতারাঃ; সর্বাণি দর্শান্যথ পৌর্ণমাস্যঃ
নক্ষত্রয়োগা ঋতবশ্চ পার্থ; বিষ্বক্সেনাত্সর্বমেতত্প্রসূতম্
143.32
রুদ্রাদিত্যা বসবোঽথাশ্বিনৌ চ; সাধ্যা বিশ্বে মরুতাং ষড্গণাশ্চ
প্রজাপতির্দেবমাতাদিতিশ্চ; সর্বে কৃষ্ণাদৃষয়শ্চৈব সপ্ত
143.33
বায়ুর্ভূত্বা বিক্ষিপতে চ বিশ্ব;মগ্নির্ভূত্বা দহতে বিশ্বরূপঃ
আপো ভূত্বা মজ্জয়তে চ সর্বং; ব্রহ্মা ভূত্বা সৃজতে বিশ্বসংঘান্
143.34
বেদ্যং চ যদ্বেদয়তে চ বেদা;ন্বিধিশ্চ যশ্চাশ্রয়তে বিধেয়ান্
ধর্মে চ বেদে চ বলে চ সর্বং; চরাচরং কেশবং ত্বং প্রতীহি
143.35
জ্যোতির্ভূতঃ পরমোঽসৌ পুরস্তা;ত্প্রকাশয়ন্প্রভয়া বিশ্বরূপঃ
অপঃ সৃষ্ট্বা হ্যাত্মভূরাত্ময়োনিঃ; পুরাকরোত্সর্বমেবাথ বিশ্বম্
143.36
ঋতূনুত্পাতান্বিবিধান্যদ্ভুতানি; মেঘান্বিদ্যুত্সর্বমৈরাবতং চ
সর্বং কৃষ্ণাত্স্থাবরং জঙ্গমং চ; বিশ্বাখ্যাতাদ্বিষ্ণুমেনং প্রতীহি
143.37
বিশ্বাবাসং নির্গুণং বাসুদেবং; সংকর্ষণং জীবভূতং বদন্তি
ততঃ প্রদ্যুম্নমনিরুদ্ধং চতুর্থ;মাজ্ঞাপয়ত্যাত্ময়োনির্মহাত্মা
143.38
স পঞ্চধা পঞ্চজনোপপন্নং; সংচোদয়ন্বিশ্বমিদং সিসৃক্ষুঃ
ততশ্চকারাবনিমারুতৌ চ; খং জ্যোতিরাপশ্চ তথৈব পার্থ
143.39
স স্থাবরং জঙ্গমং চৈবমেত;চ্চতুর্বিধং লোকমিমং চ কৃত্বা
ততো ভূমিং ব্যদধাত্পঞ্চবীজাং; দ্যৌঃ পৃথিব্যাং ধাস্যতি ভূরি বারি
তেন বিশ্বং কৃতমেতদ্ধি রাজ;ন্স জীবয়ত্যাত্মনৈবাত্ময়োনিঃ
143.40
ততো দেবানসুরান্মানুষাংশ্চ; লোকানৃষীংশ্চাথ পিতৄন্প্রজাশ্চ
সমাসেন বিবিধান্প্রাণিলোকা;ন্সর্বান্সদা ভূতপতিঃ সিসৃক্ষুঃ
143.41
শুভাশুভং স্থাবরং জঙ্গমং চ; বিষ্বক্সেনাত্সর্বমেতত্প্রতীহি
যদ্বর্ততে যচ্চ ভবিষ্যতীহ; সর্বমেতত্কেশবং ত্বং প্রতীহি
143.42
মৃত্যুশ্চৈব প্রাণিনামন্তকালে; সাক্ষাত্কৃষ্ণঃ শাশ্বতো ধর্মবাহঃ
ভূতং চ যচ্চেহ ন বিদ্ম কিংচি;দ্বিষ্বক্সেনাত্সর্বমেতত্প্রতীহি
143.43
যত্প্রশস্তং চ লোকেষু পুণ্যং যচ্চ শুভাশুভম্
তত্সর্বং কেশবোঽচিন্ত্যো বিপরীতমতো ভবেৎ
143.44
এতাদৃশঃ কেশবোঽয়ং স্বয়ংভূ;র্নারায়ণঃ পরমশ্চাব্যয়শ্চ
মধ্যং চাস্য জগতস্তস্থুষশ্চ; সর্বেষাং ভূতানাং প্রভবশ্চাপ্যয়শ্চ