অধ্যায় 142

142.1

ভীষ্ম উবাচ
তূষ্ণীমাসীদর্জুনস্তু পবনস্ত্বব্রবীত্পুনঃ
শৃণু মে ব্রাহ্মণেষ্বেব মুখ্যং কর্ম জনাধিপ

মদস্যাস্যমনুপ্রাপ্তা যদা সেন্দ্রা দিবৌকসঃ
তদেয়ং চ্যবনেনেহ হৃতা তেষাং বসুংধরা

উভৌ লোকৌ হৃতৌ মত্বা তে দেবা দুঃখিতাভবন্
শোকার্তাশ্চ মহাত্মানং ব্রহ্মাণং শরণং যয়ুঃ

দেবা ঊচুঃ
মদাস্যব্যতিষিক্তানামস্মাকং লোকপূজিত
চ্যবনেন হৃতা ভূমিঃ কপৈশ্চাপি দিবং প্রভো

ব্রহ্মোবাচ
গচ্ছধ্বং শরণং বিপ্রানাশু সেন্দ্রা দিবৌকসঃ
প্রসাদ্য তানুভৌ লোকাববাপ্স্যথ যথা পুরা

তে যয়ুঃ শরণং বিপ্রাংস্ত ঊচুঃ কাঞ্জয়ামহে
ইত্যুক্তাস্তে দ্বিজান্প্রাহুর্জয়তেহ কপানিতি
ভূগতান্হি বিজেতারো বয়মিত্যেব পার্থিব

ততঃ কর্ম সমারব্ধং ব্রাহ্মণৈঃ কপনাশনম্
তচ্ছ্রুত্বা প্রেষিতো দূতো ব্রাহ্মণেভ্যো ধনী কপৈঃ

স চ তান্ব্রাহ্মণানাহ ধনী কপবচো যথা
ভবদ্ভিঃ সদৃশাঃ সর্বে কপাঃ কিমিহ বর্ততে

সর্বে বেদবিদঃ প্রাজ্ঞাঃ সর্বে চ ক্রতুয়াজিনঃ
সর্বে সত্যব্রতাশ্চৈব সর্বে তুল্যা মহর্ষিভিঃ

শ্রীশ্চৈব রমতে তেষু ধারয়ন্তি শ্রিয়ং চ তে
বৃথা দারান্ন গচ্ছন্তি বৃথামাংসং ন ভুঞ্জতে

দীপ্তমগ্নিং জুহ্বতি চ গুরূণাং বচনে স্থিতাঃ
সর্বে চ নিয়তাত্মানো বালানাং সংবিভাগিনঃ

উপেত্য শকটৈর্যান্তি ন সেবন্তি রজস্বলাম্
অভুক্তবত্সু নাশ্নন্তি দিবা চৈব ন শেরতে

এতৈশ্চান্যৈশ্চ বহুভির্গুণৈর্যুক্তান্কথং কপান্
বিজেষ্যথ নিবর্তধ্বং নিবৃত্তানাং শুভং হি বঃ

ব্রাহ্মণা ঊচুঃ
কপান্বয়ং বিজেষ্যামো যে দেবাস্তে বয়ং স্মৃতাঃ
তস্মাদ্বধ্যাঃ কপাস্মাকং ধনিন্যাহি যথাগতম্

ধনী গত্বা কপানাহ ন বো বিপ্রাঃ প্রিয়ংকরাঃ
গৃহীত্বাস্ত্রাণ্যথো বিপ্রান্কপাঃ সর্বে সমাদ্রবন্

সমুদগ্রধ্বজান্দৃষ্ট্বা কপান্সর্বে দ্বিজাতয়ঃ
ব্যসৃজঞ্জ্বলিতানগ্নীন্কপানাং প্রাণনাশনান্

ব্রহ্মসৃষ্টা হব্যভুজঃ কপান্ভুক্ত্বা সনাতনাঃ
নভসীব যথাভ্রাণি ব্যরাজন্ত নরাধিপ
প্রশশংসুর্দ্বিজাংশ্চৈব ব্রহ্মাণং চ যশস্বিনম্

তেষাং তেজস্তথা বীর্যং দেবানাং ববৃধে ততঃ
অবাপ্নুবংশ্চামরত্বং ত্রিষু লোকেষু পূজিতম্

ইত্যুক্তবচনং বায়ুমর্জুনঃ প্রত্যভাষত
প্রতিপূজ্য মহাবাহো যত্তচ্ছৃণু নরাধিপ

জীবাম্যহং ব্রাহ্মণার্থে সর্বথা সততং প্রভো
ব্রহ্মণে ব্রাহ্মণেভ্যশ্চ প্রণমামি চ নিত্যশঃ

দত্তাত্রেয়প্রসাদাচ্চ ময়া প্রাপ্তমিদং যশঃ
লোকে চ পরমা কীর্তির্ধর্মশ্চ চরিতো মহান্

অহো ব্রাহ্মণকর্মাণি যথা মারুত তত্ত্বতঃ
ত্বয়া প্রোক্তানি কার্ত্স্ন্যেন শ্রুতানি প্রয়তেন হ

বায়ুরুবাচ
ব্রাহ্মণান্ক্ষত্রধর্মেণ পালয়স্বেন্দ্রিয়াণি চ
ভৃগুভ্যস্তে ভয়ং ঘোরং তত্তু কালাদ্ভবিষ্যতি