অধ্যায় 141

141.1

ভীষ্ম উবাচ
ইত্যুক্তস্ত্বর্জুনস্তূষ্ণীমভূদ্বায়ুস্তমব্রবীৎ
শৃণু মে হৈহয়শ্রেষ্ঠ কর্মাত্রেঃ সুমহাত্মনঃ

141.2

ঘোরে তমস্যয়ুধ্যন্ত সহিতা দেবদানবাঃ
অবিধ্যত শরৈস্তত্র স্বর্ভানুঃ সোমভাস্করৌ

141.3

অথ তে তমসা গ্রস্তা নিহন্যন্তে স্ম দানবৈঃ
দেবা নৃপতিশার্দূল সহৈব বলিভিস্তদা

141.4

অসুরৈর্বধ্যমানাস্তে ক্ষীণপ্রাণা দিবৌকসঃ
অপশ্যন্ত তপস্যন্তমত্রিং বিপ্রং মহাবনে

141.5

অথৈনমব্রুবন্দেবাঃ শান্তক্রোধং জিতেন্দ্রিয়ম্
অসুরৈরিষুভির্বিদ্ধৌ চন্দ্রাদিত্যাবিমাবুভৌ

141.6

বয়ং বধ্যামহে চাপি শত্রুভিস্তমসাবৃতে
নাধিগচ্ছাম শান্তিং চ ভয়াত্ত্রায়স্ব নঃ প্রভো

141.7

কথং রক্ষামি ভবতস্তেঽব্রুবংশ্চন্দ্রমা ভব
তিমিরঘ্নশ্চ সবিতা দস্যুহা চৈব নো ভব

141.8

এবমুক্তস্তদাত্রিস্তু তমোনুদভবচ্ছশী
অপশ্যত্সৌম্যভাবং চ সূর্যস্য প্রতিদর্শনম্

141.9

দৃষ্ট্বা নাতিপ্রভং সোমং তথা সূর্যং চ পার্থিব
প্রকাশমকরোদত্রিস্তপসা স্বেন সংয়ুগে

141.10

জগদ্বিতিমিরং চাপি প্রদীপ্তমকরোত্তদা
ব্যজয়চ্ছত্রুসংঘাংশ্চ দেবানাং স্বেন তেজসা

141.11

অত্রিণা দহ্যমানাংস্তান্দৃষ্ট্বা দেবা মহাসুরান্
পরাক্রমৈস্তেঽপি তদা ব্যত্যঘ্নন্নত্রিরক্ষিতাঃ

141.12

উদ্ভাসিতশ্চ সবিতা দেবাস্ত্রাতা হতাসুরাঃ
অত্রিণা ত্বথ সোমত্বং কৃতমুত্তমতেজসা

141.13

অদ্বিতীয়েন মুনিনা জপতা চর্মবাসসা
ফলভক্ষেণ রাজর্ষে পশ্য কর্মাত্রিণা কৃতম্

141.14

তস্যাপি বিস্তরেণোক্তং কর্মাত্রেঃ সুমহাত্মনঃ
ব্রবীম্যহং ব্রূহি বা ত্বমত্রিতঃ ক্ষত্রিয়ং বরম্

141.15

ইত্যুক্তস্ত্বর্জুনস্তূষ্ণীমভূদ্বায়ুস্তমব্রবীৎ
শৃণু রাজন্মহত্কর্ম চ্যবনস্য মহাত্মনঃ

141.16

অশ্বিনোঃ প্রতিসংশ্রুত্য চ্যবনঃ পাকশাসনম্
প্রোবাচ সহিতং দেবৈঃ সোমপাবশ্বিনৌ কুরু

141.17

ইন্দ্র উবাচ
অস্মাভির্বর্জিতাবেতৌ ভবেতাং সোমপৌ কথম্
দেবৈর্ন সংমিতাবেতৌ তস্মান্মৈবং বদস্ব নঃ

141.18

অশ্বিভ্যাং সহ নেচ্ছামঃ পাতুং সোমং মহাব্রত
পিবন্ত্বন্যে যথাকামং নাহং পাতুমিহোত্সহে

141.19

চ্যবন উবাচ
ন চেত্করিষ্যসি বচো ময়োক্তং বলসূদন
ময়া প্রমথিতঃ সদ্যঃ সোমং পাস্যসি বৈ মখে

141.20

ততঃ কর্ম সমারব্ধং হিতায় সহসাশ্বিনোঃ
চ্যবনেন ততো মন্ত্রৈরভিভূতাঃ সুরাভবন্

141.21

তত্তু কর্ম সমারব্ধং দৃষ্ট্বেন্দ্রঃ ক্রোধমূর্ছিতঃ
উদ্যম্য বিপুলং শৈলং চ্যবনং সমুপাদ্রবৎ
তথা বজ্রেণ ভগবানমর্ষাকুললোচনঃ

141.22

তমাপতন্তং দৃষ্ট্বৈব চ্যবনস্তপসান্বিতঃ
অদ্ভিঃ সিক্ত্বাস্তম্ভয়ত্তং সবজ্রং সহপর্বতম্

141.23

অথেন্দ্রস্য মহাঘোরং সোঽসৃজচ্ছত্রুমেব হ
মদং মন্ত্রাহুতিময়ং ব্যাদিতাস্যং মহামুনিঃ

141.24

তস্য দন্তসহস্রং তু বভূব শতয়োজনম্
দ্বিয়োজনশতাস্তস্য দংষ্ট্রাঃ পরমদারুণাঃ
হনুস্তস্যাভবদ্ভূমাবেকশ্চাস্যাস্পৃশদ্দিবম্

141.25

জিহ্বামূলে স্থিতাস্তস্য সর্বে দেবাঃ সবাসবাঃ
তিমেরাস্যমনুপ্রাপ্তা যথা মত্স্যা মহার্ণবে

141.26

তে সংমন্ত্র্য ততো দেবা মদস্যাস্যগতাস্তদা
অব্রুবন্সহিতাঃ শক্রং প্রণমাস্মৈ দ্বিজাতয়ে
অশ্বিভ্যাং সহ সোমং চ পিবামো বিগতজ্বরাঃ

141.27

ততঃ স প্রণতঃ শক্রশ্চকার চ্যবনস্য তৎ
চ্যবনঃ কৃতবাংস্তৌ চাপ্যশ্বিনৌ সোমপীথিনৌ

141.28

ততঃ প্রত্যাহরত্কর্ম মদং চ ব্যভজন্মুনিঃ
অক্ষেষু মৃগয়ায়াং চ পানে স্ত্রীষু চ বীর্যবান্

141.29

এতৈর্দোষৈর্নরো রাজন্ক্ষয়ং যাতি ন সংশয়ঃ
তস্মাদেতান্নরো নিত্যং দূরতঃ পরিবর্জয়েৎ

141.30

এতত্তে চ্যবনস্যাপি কর্ম রাজন্প্রকীর্তিতম্
ব্রবীম্যহং ব্রূহি বা ত্বং চ্যবনাত্ক্ষত্রিয়ং বরম্

Contains text from DharmicData, made available under the Open Database License (ODbL). Simple meanings are written by AI and can contain mistakes.