Utshovঅধ্যায় 140
140.1
ভীষ্ম উবাচ
ইত্যুক্তঃ স তদা তূষ্ণীমভূদ্বায়ুস্ততোঽব্রবীৎ
শৃণু রাজন্নগস্ত্যস্য মাহাত্ম্যং ব্রাহ্মণস্য হ
140.2
অসুরৈর্নির্জিতা দেবা নিরুত্সাহাশ্চ তে কৃতাঃ
যজ্ঞাশ্চৈষাং হৃতাঃ সর্বে পিতৃভ্যশ্চ স্বধা তথা
140.3
কর্মেজ্যা মানবানাং চ দানবৈর্হৈহয়র্ষভ
ভ্রষ্টৈশ্বর্যাস্ততো দেবাশ্চেরুঃ পৃথ্বীমিতি শ্রুতিঃ
140.4
ততঃ কদাচিত্তে রাজন্দীপ্তমাদিত্যবর্চসম্
দদৃশুস্তেজসা যুক্তমগস্ত্যং বিপুলব্রতম্
140.5
অভিবাদ্য চ তং দেবা দৃষ্ট্বা চ যশসা বৃতম্
ইদমূচুর্মহাত্মানং বাক্যং কালে জনাধিপ
140.6
দানবৈর্যুধি ভগ্নাঃ স্ম তথৈশ্বর্যাচ্চ ভ্রংশিতাঃ
তদস্মান্নো ভয়াত্তীব্রাত্ত্রাহি ত্বং মুনিপুংগব
140.7
ইত্যুক্তঃ স তদা দেবৈরগস্ত্যঃ কুপিতোঽভবৎ
প্রজজ্বাল চ তেজস্বী কালাগ্নিরিব সংক্ষয়ে
140.8
তেন দীপ্তাংশুজালেন নির্দগ্ধা দানবাস্তদা
অন্তরিক্ষান্মহারাজ ন্যপতন্ত সহস্রশঃ
140.9
দহ্যমানাস্তু তে দৈত্যাস্তস্যাগস্ত্যস্য তেজসা
উভৌ লোকৌ পরিত্যজ্য যয়ুঃ কাষ্ঠাং স্ম দক্ষিণাম্
140.10
বলিস্তু যজতে যজ্ঞমশ্বমেধং মহীং গতঃ
যেঽন্যে স্বস্থা মহীস্থাশ্চ তে ন দগ্ধা মহাসুরাঃ
140.11
ততো লোকাঃ পুনঃ প্রাপ্তাঃ সুরৈঃ শান্তং চ তদ্রজঃ
অথৈনমব্রুবন্দেবা ভূমিষ্ঠানসুরাঞ্জহি
140.12
ইত্যুক্ত আহ দেবান্স ন শক্নোমি মহীগতান্
দগ্ধুং তপো হি ক্ষীয়েন্মে ধক্ষ্যামীতি চ পার্থিব
140.13
এবং দগ্ধা ভগবতা দানবাঃ স্বেন তেজসা
অগস্ত্যেন তদা রাজংস্তপসা ভাবিতাত্মনা
140.14
ঈদৃশশ্চাপ্যগস্ত্যো হি কথিতস্তে ময়ানঘ
ব্রবীম্যহং ব্রূহি বা ত্বমগস্ত্যাত্ক্ষত্রিয়ং বরম্
140.15
ইত্যুক্তঃ স তদা তূষ্ণীমভূদ্বায়ুস্ততোঽব্রবীৎ
শৃণু রাজন্বসিষ্ঠস্য মুখ্যং কর্ম যশস্বিনঃ
140.16
আদিত্যাঃ সত্রমাসন্ত সরো বৈ মানসং প্রতি
বসিষ্ঠং মনসা গত্বা শ্রুত্বা তত্রাস্য গোচরম্
140.17
যজমানাংস্তু তান্দৃষ্ট্বা ব্যগ্রান্দীক্ষানুকর্শিতান্
হন্তুমিচ্ছন্তি শৈলাভাঃ খলিনো নাম দানবাঃ
140.18
অদূরাত্তু ততস্তেষাং ব্রহ্মদত্তবরং সরঃ
হতা হতা বৈ তে তত্র জীবন্ত্যাপ্লুত্য দানবাঃ
140.19
তে প্রগৃহ্য মহাঘোরান্পর্বতান্পরিঘান্দ্রুমান্
বিক্ষোভয়ন্তঃ সলিলমুত্থিতাঃ শতয়োজনম্
140.20
অভ্যদ্রবন্ত দেবাংস্তে সহস্রাণি দশৈব হ
ততস্তৈরর্দিতা দেবাঃ শরণং বাসবং যয়ুঃ
140.21
স চ তৈর্ব্যথিতঃ শক্রো বসিষ্ঠং শরণং যয়ৌ
ততোঽভয়ং দদৌ তেভ্যো বসিষ্ঠো ভগবানৃষিঃ
140.22
তথা তান্দুঃখিতাঞ্জানন্নানৃশংস্যপরো মুনিঃ
অয়ত্নেনাদহত্সর্বান্খলিনঃ স্বেন তেজসা
140.23
কৈলাসং প্রস্থিতাং চাপি নদীং গঙ্গাং মহাতপাঃ
আনয়ত্তত্সরো দিব্যং তয়া ভিন্নং চ তত্সরঃ
140.24
সরো ভিন্নং তয়া নদ্যা সরয়ূঃ সা ততোঽভবৎ
হতাশ্চ খলিনো যত্র স দেশঃ খলিনোঽভবৎ
140.25
এবং সেন্দ্রা বসিষ্ঠেন রক্ষিতাস্ত্রিদিবৌকসঃ
ব্রহ্মদত্তবরাশ্চৈব হতা দৈত্যা মহাত্মনা
140.26
এতত্কর্ম বসিষ্ঠস্য কথিতং তে ময়ানঘ
ব্রবীম্যহং ব্রূহি বা ত্বং বসিষ্ঠাত্ক্ষত্রিয়ং বরম্