Utshovঅধ্যায় 139
139.1
বায়ুরুবাচ
ইমাং ভূমিং ব্রাহ্মণেভ্যো দিত্সুর্বৈ দক্ষিণাং পুরা
অঙ্গো নাম নৃপো রাজংস্ততশ্চিন্তাং মহী যয়ৌ
139.2
ধারণীং সর্বভূতানাময়ং প্রাপ্য বরো নৃপঃ
কথমিচ্ছতি মাং দাতুং দ্বিজেভ্যো ব্রহ্মণঃ সুতাম্
139.3
সাহং ত্যক্ত্বা গমিষ্যামি ভূমিত্বং ব্রহ্মণঃ পদম্
অয়ং সরাষ্ট্রো নৃপতির্মা ভূদিতি ততোঽগমৎ
139.4
ততস্তাং কশ্যপো দৃষ্ট্বা ব্রজন্তীং পৃথিবীং তদা
প্রবিবেশ মহীং সদ্যো মুক্ত্বাত্মানং সমাহিতঃ
139.5
রুদ্ধা সা সর্বতো জজ্ঞে তৃণৌষধিসমন্বিতা
ধর্মোত্তরা নষ্টভয়া ভূমিরাসীত্ততো নৃপ
139.6
এবং বর্ষসহস্রাণি দিব্যানি বিপুলব্রতঃ
ত্রিংশতং কশ্যপো রাজন্ভূমিরাসীদতন্দ্রিতঃ
139.7
অথাগম্য মহারাজ নমস্কৃত্য চ কশ্যপম্
পৃথিবী কাশ্যপী জজ্ঞে সুতা তস্য মহাত্মনঃ
139.8
এষ রাজন্নীদৃশো বৈ ব্রাহ্মণঃ কশ্যপোঽভবৎ
অন্যং প্রব্রূহি বাপি ত্বং কশ্যপাত্ক্ষত্রিয়ং বরম্
139.9
তূষ্ণীং বভূব নৃপতিঃ পবনস্ত্বব্রবীত্পুনঃ
শৃণু রাজন্নুতথ্যস্য জাতস্যাঙ্গিরসে কুলে
139.10
ভদ্রা সোমস্য দুহিতা রূপেণ পরমা মতা
তস্যাস্তুল্যং পতিং সোম উতথ্যং সমপশ্যত
139.11
সা চ তীব্রং তপস্তেপে মহাভাগা যশস্বিনী
উতথ্যং তু মহাভাগং তত্কৃতেঽবরয়ত্তদা
139.12
তত আহূয় সোতথ্যং দদাবত্র যশস্বিনীম্
ভার্যার্থে স চ জগ্রাহ বিধিবদ্ভূরিদক্ষিণ
139.13
তাং ত্বকাময়ত শ্রীমান্বরুণঃ পূর্বমেব হ
স চাগম্য বনপ্রস্থং যমুনায়াং জহার তাম্
139.14
জলেশ্বরস্তু হৃত্বা তামনয়ত্স্বপুরং প্রতি
পরমাদ্ভুতসংকাশং ষট্সহস্রশতহ্রদম্
139.15
ন হি রম্যতরং কিংচিত্তস্মাদন্যত্পুরোত্তমম্
প্রাসাদৈরপ্সরোভিশ্চ দিব্যৈঃ কামৈশ্চ শোভিতম্
তত্র দেবস্তয়া সার্ধং রেমে রাজঞ্জলেশ্বরঃ
139.16
অথাখ্যাতমুতথ্যায় ততঃ পত্ন্যবমর্দনম্
139.17
তচ্ছ্রুত্বা নারদাত্সর্বমুতথ্যো নারদং তদা
প্রোবাচ গচ্ছ ব্রূহি ত্বং বরুণং পরুষং বচঃ
মদ্বাক্যান্মুঞ্চ মে ভার্যাং কস্মাদ্বা হৃতবানসি
139.18
লোকপালোঽসি লোকানাং ন লোকস্য বিলোপকঃ
সোমেন দত্তা ভার্যা মে ত্বয়া চাপহৃতাদ্য বৈ
139.19
ইত্যুক্তো বচনাত্তস্য নারদেন জলেশ্বরঃ
মুঞ্চ ভার্যামুতথ্যস্যেত্যথ তং বরুণোঽব্রবীৎ
মমৈষা সুপ্রিয়া ভার্যা নৈনামুত্স্রষ্টুমুত্সহে
139.20
ইত্যুক্তো বরুণেনাথ নারদঃ প্রাপ্য তং মুনিম্
উতথ্যমব্রবীদ্বাক্যং নাতিহৃষ্টমনা ইব
139.21
গলে গৃহীত্বা ক্ষিপ্তোঽস্মি বরুণেন মহামুনে
ন প্রয়চ্ছতি তে ভার্যাং যত্তে কার্যং কুরুষ্ব তৎ
139.22
নারদস্য বচঃ শ্রুত্বা ক্রুদ্ধঃ প্রাজ্বলদঙ্গিরাঃ
অপিবত্তেজসা বারি বিষ্টভ্য সুমহাতপাঃ
139.23
পীয়মানে চ সর্বস্মিংস্তোয়ে বৈ সলিলেশ্বরঃ
সুহৃদ্ভিঃ ক্ষিপ্যমাণোঽপি নৈবামুঞ্চত তাং তদা
139.24
ততঃ ক্রুদ্ধোঽব্রবীদ্ভূমিমুতথ্যো ব্রাহ্মণোত্তমঃ
দর্শয়স্ব স্থলং ভদ্রে ষট্সহস্রশতহ্রদম্
139.25
ততস্তদিরিণং জাতং সমুদ্রশ্চাপসর্পিতঃ
তস্মাদ্দেশান্নদীং চৈব প্রোবাচাসৌ দ্বিজোত্তমঃ
139.26
অদৃশ্যা গচ্ছ ভীরু ত্বং সরস্বতি মরুং প্রতি
অপুণ্য এষ ভবতু দেশস্ত্যক্তস্ত্বয়া শুভে
139.27
তস্মিন্সংচূর্ণিতে দেশে ভদ্রামাদায় বারিপঃ
অদদাচ্ছরণং গত্বা ভার্যামাঙ্গিরসায় বৈ
139.28
প্রতিগৃহ্য তু তাং ভার্যামুতথ্যঃ সুমনাভবৎ
মুমোচ চ জগদ্দুঃখাদ্বরুণং চৈব হৈহয়
139.29
ততঃ স লব্ধ্বা তাং ভার্যাং বরুণং প্রাহ ধর্মবিৎ
উতথ্যঃ সুমহাতেজা যত্তচ্ছৃণু নরাধিপ
139.30
ময়ৈষা তপসা প্রাপ্তা ক্রোশতস্তে জলাধিপ
ইত্যুক্ত্বা তামুপাদায় স্বমেব ভবনং যয়ৌ
139.31
এষ রাজন্নীদৃশো বৈ উতথ্যো ব্রাহ্মণর্ষভঃ
ব্রবীম্যহং ব্রূহি বা ত্বমুতথ্যাত্ক্ষত্রিয়ং বরম্