অধ্যায় 138

138.1

বায়ুরুবাচ
শৃণু মূঢ গুণান্কাংশ্চিদ্ব্রাহ্মণানাং মহাত্মনাম্
যে ত্বয়া কীর্তিতা রাজংস্তেভ্যোঽথ ব্রাহ্মণো বরঃ

ত্যক্ত্বা মহীত্বং ভূমিস্তু স্পর্ধয়াঙ্গনৃপস্য হ
নাশং জগাম তাং বিপ্রো ব্যষ্টম্ভয়ত কশ্যপঃ

অক্ষয়া ব্রাহ্মণা রাজন্দিবি চেহ চ নিত্যদা
অপিবত্তেজসা হ্যাপঃ স্বয়মেবাঙ্গিরাঃ পুরা

স তাঃ পিবন্ক্ষীরমিব নাতৃপ্যত মহাতপাঃ
অপূরয়ন্মহৌঘেন মহীং সর্বাং চ পার্থিব

তস্মিন্নহং চ ক্রুদ্ধে বৈ জগত্ত্যক্ত্বা ততো গতঃ
ব্যতিষ্ঠমগ্নিহোত্রে চ চিরমঙ্গিরসো ভয়াৎ

অভিশপ্তশ্চ ভগবান্গৌতমেন পুরংদরঃ
অহল্যাং কাময়ানো বৈ ধর্মার্থং চ ন হিংসিতঃ

তথা সমুদ্রো নৃপতে পূর্ণো মৃষ্টেন বারিণা
ব্রাহ্মণৈরভিশপ্তঃ সঁল্লবণোদঃ কৃতো বিভো

সুবর্ণবর্ণো নির্ধূমঃ সংহতোর্ধ্বশিখঃ কবিঃ
ক্রুদ্ধেনাঙ্গিরসা শপ্তো গুণৈরেতৈর্বিবর্জিতঃ

মরুতশ্চূর্ণিতান্পশ্য যেঽহসন্ত মহোদধিম্
সুবর্ণধারিণা নিত্যমবশপ্তা দ্বিজাতিনা

সমো ন ত্বং দ্বিজাতিভ্যঃ শ্রেষ্ঠং বিদ্ধি নরাধিপ
গর্ভস্থান্ব্রাহ্মণান্সম্যঙ্নমস্যতি কিল প্রভুঃ

দণ্ডকানাং মহদ্রাজ্যং ব্রাহ্মণেন বিনাশিতম্
তালজঙ্ঘং মহত্ক্ষত্রমৌর্বেণৈকেন নাশিতম্

ত্বয়া চ বিপুলং রাজ্যং বলং ধর্মঃ শ্রুতং তথা
দত্তাত্রেয়প্রসাদেন প্রাপ্তং পরমদুর্লভম্

অগ্নিং ত্বং যজসে নিত্যং কস্মাদর্জুন ব্রাহ্মণম্
স হি সর্বস্য লোকস্য হব্যবাট্কিং ন বেত্সি তম্

অথ বা ব্রাহ্মণশ্রেষ্ঠমনু ভূতানুপালকম্
কর্তারং জীবলোকস্য কস্মাজ্জানন্বিমুহ্যসে

তথা প্রজাপতির্ব্রহ্মা অব্যক্তঃ প্রভবাপ্যয়ঃ
যেনেদং নিখিলং বিশ্বং জনিতং স্থাবরং চরম্

অণ্ডজাতং তু ব্রহ্মাণং কেচিদিচ্ছন্ত্যপণ্ডিতাঃ
অণ্ডাদ্ভিন্নাদ্বভুঃ শৈলা দিশোঽম্ভঃ পৃথিবী দিবম্

দ্রষ্টব্যং নৈতদেবং হি কথং জ্যায়স্তমো হি সঃ
স্মৃতমাকাশমণ্ডং তু তস্মাজ্জাতঃ পিতামহঃ

তিষ্ঠেত্কথমিতি ব্রূহি ন কিংচিদ্ধি তদা ভবেৎ
অহংকার ইতি প্রোক্তঃ সর্বতেজোগতঃ প্রভুঃ

নাস্ত্যণ্ডমস্তি তু ব্রহ্মা স রাজঁল্লোকভাবনঃ
ইত্যুক্তঃ স তদা তূষ্ণীমভূদ্বায়ুস্তমব্রবীৎ