Utshovঅধ্যায় 137
137.1
যুধিষ্ঠির উবাচ
কাং তু ব্রাহ্মণপূজায়াং ব্যুষ্টিং দৃষ্ট্বা জনাধিপ
কং বা কর্মোদয়ং মত্বা তানর্চসি মহামতে
137.2
ভীষ্ম উবাচ
অত্রাপ্যুদাহরন্তীমমিতিহাসং পুরাতনম্
পবনস্য চ সংবাদমর্জুনস্য চ ভারত
137.3
সহস্রভুজভৃচ্ছ্রীমান্কার্তবীর্যোঽভবত্প্রভুঃ
অস্য লোকস্য সর্বস্য মাহিষ্মত্যাং মহাবলঃ
137.4
স তু রত্নাকরবতীং সদ্বীপাং সাগরাম্বরাম্
শশাস সর্বাং পৃথিবীং হৈহয়ঃ সত্যবিক্রমঃ
137.5
স্ববিত্তং তেন দত্তং তু দত্তাত্রেয়ায় কারণে
ক্ষত্রধর্মং পুরস্কৃত্য বিনয়ং শ্রুতমেব চ
137.6
আরাধয়ামাস চ তং কৃতবীর্যাত্মজো মুনিম্
ন্যমন্ত্রয়ত সংহৃষ্টঃ স দ্বিজশ্চ বরৈস্ত্রিভিঃ
137.7
স বরৈশ্ছন্দিতস্তেন নৃপো বচনমব্রবীৎ
সহস্রবাহুর্ভূয়াং বৈ চমূমধ্যে গৃহেঽন্যথা
137.8
মম বাহুসহস্রং তু পশ্যন্তাং সৈনিকা রণে
বিক্রমেণ মহীং কৃত্স্নাং জয়েয়ং বিপুলব্রত
তাং চ ধর্মেণ সংপ্রাপ্য পালয়েয়মতন্দ্রিতঃ
137.9
চতুর্থং তু বরং যাচে ত্বামহং দ্বিজসত্তম
তং মমানুগ্রহকৃতে দাতুমর্হস্যনিন্দিত
অনুশাসন্তু মাং সন্তো মিথ্যাবৃত্তং তদাশ্রয়ম্
137.10
ইত্যুক্তঃ স দ্বিজঃ প্রাহ তথাস্ত্বিতি নরাধিপম্
এবং সমভবংস্তস্য বরাস্তে দীপ্ততেজসঃ
137.11
ততঃ স রথমাস্থায় জ্বলনার্কসমদ্যুতিঃ
অব্রবীদ্বীর্যসংমোহাত্কো ন্বস্তি সদৃশো ময়া
বীর্যধৈর্যয়শঃশৌচৈর্বিক্রমেণৌজসাপি বা
137.12
তদ্বাক্যান্তে চান্তরিক্ষে বাগুবাচাশরীরিণী
ন ত্বং মূঢ বিজানীষে ব্রাহ্মণং ক্ষত্রিয়াদ্বরম্
সহিতো ব্রাহ্মণেনেহ ক্ষত্রিয়ো রক্ষতি প্রজাঃ
137.13
অর্জুন উবাচ
কুর্যাং ভূতানি তুষ্টোঽহং ক্রুদ্ধো নাশং তথা নয়ে
কর্মণা মনসা বাচা ন মত্তোঽস্তি বরো দ্বিজঃ
137.14
পূর্বো ব্রহ্মোত্তরো বাদো দ্বিতীয়ঃ ক্ষত্রিয়োত্তরঃ
ত্বয়োক্তৌ যৌ তু তৌ হেতূ বিশেষস্ত্বত্র দৃশ্যতে
137.15
ব্রাহ্মণাঃ সংশ্রিতাঃ ক্ষত্রং ন ক্ষত্রং ব্রাহ্মণাশ্রিতম্
শ্রিতান্ব্রহ্মোপধা বিপ্রাঃ খাদন্তি ক্ষত্রিয়ান্ভুবি
137.16
ক্ষত্রিয়েষ্বাশ্রিতো ধর্মঃ প্রজানাং পরিপালনম্
ক্ষত্রাদ্বৃত্তির্ব্রাহ্মণানাং তৈঃ কথং ব্রাহ্মণো বরঃ
137.17
সর্বভূতপ্রধানাংস্তান্ভৈক্ষবৃত্তীনহং সদা
আত্মসংভাবিতান্বিপ্রান্স্থাপয়াম্যাত্মনো বশে
137.18
কথিতং হ্যনয়া সত্যং গায়ত্র্যা কন্যয়া দিবি
বিজেষ্যাম্যবশান্সর্বান্ব্রাহ্মণাংশ্চর্মবাসসঃ
137.19
ন চ মাং চ্যাবয়েদ্রাষ্ট্রাত্ত্রিষু লোকেষু কশ্চন
দেবো বা মানুষো বাপি তস্মাজ্জ্যেষ্ঠো দ্বিজাদহম্
137.20
অদ্য ব্রহ্মোত্তরং লোকং করিষ্যে ক্ষত্রিয়োত্তরম্
ন হি মে সংয়ুগে কশ্চিত্সোঢুমুত্সহতে বলম্
137.21
অর্জুনস্য বচঃ শ্রুত্বা বিত্রস্তাভূন্নিশাচরী
অথৈনমন্তরিক্ষস্থস্ততো বায়ুরভাষত
137.22
ত্যজৈনং কলুষং ভাবং ব্রাহ্মণেভ্যো নমস্কুরু
এতেষাং কুর্বতঃ পাপং রাষ্ট্রক্ষোভো হি তে ভবেৎ
137.23
অথ বা ত্বাং মহীপাল শময়িষ্যন্তি বৈ দ্বিজাঃ
নিরসিষ্যন্তি বা রাষ্ট্রাদ্ধতোত্সাহং মহাবলাঃ
137.24
তং রাজা কস্ত্বমিত্যাহ ততস্তং প্রাহ মারুতঃ
বায়ুর্বৈ দেবদূতোঽস্মি হিতং ত্বাং প্রব্রবীম্যহম্
137.25
অর্জুন উবাচ
অহো ত্বয়াদ্য বিপ্রেষু ভক্তিরাগঃ প্রদর্শিতঃ
যাদৃশং পৃথিবী ভূতং তাদৃশং ব্রূহি বৈ দ্বিজম্
137.26
বায়োর্বা সদৃশং কিংচিদ্ব্রূহি ত্বং ব্রাহ্মণোত্তমম্
অপাং বৈ সদৃশং ব্রূহি সূর্যস্য নভসোঽপি বা