অধ্যায় 136

136.1

যুধিষ্ঠির উবাচ
কে পূজ্যাঃ কে নমস্কার্যাঃ কথং বর্তেত কেষু চ
কিমাচারঃ কীদৃশেষু পিতামহ ন রিষ্যতে

ভীষ্ম উবাচ
ব্রাহ্মণানাং পরিভবঃ সাদয়েদপি দেবতাঃ
ব্রাহ্মণানাং নমস্কর্তা যুধিষ্ঠির ন রিষ্যতে

তে পূজ্যাস্তে নমস্কার্যা বর্তেথাস্তেষু পুত্রবৎ
তে হি লোকানিমান্সর্বান্ধারয়ন্তি মনীষিণঃ

ব্রাহ্মণাঃ সর্বলোকানাং মহান্তো ধর্মসেতবঃ
ধনত্যাগাভিরামাশ্চ বাক্সংয়মরতাশ্চ যে

রমণীয়াশ্চ ভূতানাং নিধানং চ ধৃতব্রতাঃ
প্রণেতারশ্চ লোকানাং শাস্ত্রাণাং চ যশস্বিনঃ

তপো যেষাং ধনং নিত্যং বাক্চৈব বিপুলং বলম্
প্রভবশ্চাপি ধর্মাণাং ধর্মজ্ঞাঃ সূক্ষ্মদর্শিনঃ

ধর্মকামাঃ স্থিতা ধর্মে সুকৃতৈর্ধর্মসেতবঃ
যানুপাশ্রিত্য জীবন্তি প্রজাঃ সর্বাশ্চতুর্বিধাঃ

পন্থানঃ সর্বনেতারো যজ্ঞবাহাঃ সনাতনাঃ
পিতৃপৈতামহীং গুর্বীমুদ্বহন্তি ধুরং সদা

ধুরি যে নাবসীদন্তি বিষমে সদ্গবা ইব
পিতৃদেবাতিথিমুখা হব্যকব্যাগ্রভোজিনঃ

ভোজনাদেব যে লোকাংস্ত্রায়ন্তে মহতো ভয়াৎ
দীপাঃ সর্বস্য লোকস্য চক্ষুশ্চক্ষুষ্মতামপি

সর্বশিল্পাদিনিধয়ো নিপুণাঃ সূক্ষ্মদর্শিনঃ
গতিজ্ঞাঃ সর্বভূতানামধ্যাত্মগতিচিন্তকাঃ

আদিমধ্যাবসানানাং জ্ঞাতারশ্ছিন্নসংশয়াঃ
পরাবরবিশেষজ্ঞা গন্তারঃ পরমাং গতিম্

বিমুক্তা ধুতপাপ্মানো নির্দ্বংদ্বা নিষ্পরিগ্রহাঃ
মানার্হা মানিতা নিত্যং জ্ঞানবিদ্ভির্মহাত্মভিঃ

চন্দনে মলপঙ্কে চ ভোজনেঽভোজনে সমাঃ
সমং যেষাং দুকূলং চ শাণক্ষৌমাজিনানি চ

তিষ্ঠেয়ুরপ্যভুঞ্জানা বহূনি দিবসান্যপি
শোষয়েয়ুশ্চ গাত্রাণি স্বাধ্যায়ৈঃ সংয়তেন্দ্রিয়াঃ

অদৈবং দৈবতং কুর্যুর্দৈবতং চাপ্যদৈবতম্
লোকানন্যান্সৃজেয়ুশ্চ লোকপালাংশ্চ কোপিতাঃ

অপেয়ঃ সাগরো যেষামভিশাপান্মহাত্মনাম্
যেষাং কোপাগ্নিরদ্যাপি দণ্ডকে নোপশাম্যতি

দেবানামপি যে দেবাঃ কারণং কারণস্য চ
প্রমাণস্য প্রমাণং চ কস্তানভিভবেদ্বুধঃ

যেষাং বৃদ্ধশ্চ বালশ্চ সর্বঃ সংমানমর্হতি
তপোবিদ্যাবিশেষাত্তু মানয়ন্তি পরস্পরম্

অবিদ্বান্ব্রাহ্মণো দেবঃ পাত্রং বৈ পাবনং মহৎ
বিদ্বান্ভূয়স্তরো দেবঃ পূর্ণসাগরসংনিভঃ

অবিদ্বাংশ্চৈব বিদ্বাংশ্চ ব্রাহ্মণো দৈবতং মহৎ
প্রণীতশ্চাপ্রণীতশ্চ যথাগ্নির্দৈবতং মহৎ

শ্মশানে হ্যপি তেজস্বী পাবকো নৈব দুষ্যতি
হবির্যজ্ঞেষু চ বহন্ভূয় এবাভিশোভতে

এবং যদ্যপ্যনিষ্টেষু বর্ততে সর্বকর্মসু
সর্বথা ব্রাহ্মণো মান্যো দৈবতং বিদ্ধি তত্পরম্