UtshovChapter 138
138.1
वायुरुवाच
शृणु मूढ गुणान्कांश्चिद्ब्राह्मणानां महात्मनाम्
ये त्वया कीर्तिता राजंस्तेभ्योऽथ ब्राह्मणो वरः
Vayuruvacha
Shrinu mudha gunankanshchidbrahmananam mahatmanam
Ye tvaya kirtita rajanstebhyotha brahmano varah
138.2
त्यक्त्वा महीत्वं भूमिस्तु स्पर्धयाङ्गनृपस्य ह
नाशं जगाम तां विप्रो व्यष्टम्भयत कश्यपः
Tyaktva mahitvam bhumistu spardhayanganripasya ha
Nasham jagama tam vipro vyashtambhayata kashyapah
138.3
अक्षया ब्राह्मणा राजन्दिवि चेह च नित्यदा
अपिबत्तेजसा ह्यापः स्वयमेवाङ्गिराः पुरा
Akshaya brahmana rajandivi cheha cha nityada
Apibattejasa hyapah svayamevangirah pura
138.4
स ताः पिबन्क्षीरमिव नातृप्यत महातपाः
अपूरयन्महौघेन महीं सर्वां च पार्थिव
Sa tah pibankshiramiva natripyata mahatapah
Apurayanmahaughena mahim sarvam cha parthiva
138.5
तस्मिन्नहं च क्रुद्धे वै जगत्त्यक्त्वा ततो गतः
व्यतिष्ठमग्निहोत्रे च चिरमङ्गिरसो भयात्
Tasminnaham cha kruddhe vai jagattyaktva tato gatah
Vyatishthamagnihotre cha chiramangiraso bhayat
138.6
अभिशप्तश्च भगवान्गौतमेन पुरंदरः
अहल्यां कामयानो वै धर्मार्थं च न हिंसितः
Abhishaptashcha bhagavangautamena purandarah
Ahalyam kamayano vai dharmartham cha na hinsitah
138.7
तथा समुद्रो नृपते पूर्णो मृष्टेन वारिणा
ब्राह्मणैरभिशप्तः सँल्लवणोदः कृतो विभो
Tatha samudro nripate purno mrishtena varina
Brahmanairabhishaptah sanllavanodah krito vibho
138.8
सुवर्णवर्णो निर्धूमः संहतोर्ध्वशिखः कविः
क्रुद्धेनाङ्गिरसा शप्तो गुणैरेतैर्विवर्जितः
Suvarnavarno nirdhumah sanhatordhvashikhah kavih
Kruddhenangirasa shapto gunairetairvivarjitah
138.9
मरुतश्चूर्णितान्पश्य येऽहसन्त महोदधिम्
सुवर्णधारिणा नित्यमवशप्ता द्विजातिना
Marutashchurnitanpashya yehasanta mahodadhim
Suvarnadharina nityamavashapta dvijatina
138.10
समो न त्वं द्विजातिभ्यः श्रेष्ठं विद्धि नराधिप
गर्भस्थान्ब्राह्मणान्सम्यङ्नमस्यति किल प्रभुः
Samo na tvam dvijatibhyah shreshtham viddhi naradhipa
Garbhasthanbrahmanansamyannamasyati kila prabhuh
138.11
दण्डकानां महद्राज्यं ब्राह्मणेन विनाशितम्
तालजङ्घं महत्क्षत्रमौर्वेणैकेन नाशितम्
Dandakanam mahadrajyam brahmanena vinashitam
Talajangham mahatkshatramaurvenaikena nashitam
138.12
त्वया च विपुलं राज्यं बलं धर्मः श्रुतं तथा
दत्तात्रेयप्रसादेन प्राप्तं परमदुर्लभम्
Tvaya cha vipulam rajyam balam dharmah shrutam tatha
Dattatreyaprasadena praptam paramadurlabham
138.13
अग्निं त्वं यजसे नित्यं कस्मादर्जुन ब्राह्मणम्
स हि सर्वस्य लोकस्य हव्यवाट्किं न वेत्सि तम्
Agnim tvam yajase nityam kasmadarjuna brahmanam
Sa hi sarvasya lokasya havyavatkim na vetsi tam
138.14
अथ वा ब्राह्मणश्रेष्ठमनु भूतानुपालकम्
कर्तारं जीवलोकस्य कस्माज्जानन्विमुह्यसे
Atha va brahmanashreshthamanu bhutanupalakam
Kartaram jivalokasya kasmajjananvimuhyase
138.15
तथा प्रजापतिर्ब्रह्मा अव्यक्तः प्रभवाप्ययः
येनेदं निखिलं विश्वं जनितं स्थावरं चरम्
Tatha prajapatirbrahma avyaktah prabhavapyayah
Yenedam nikhilam vishvam janitam sthavaram charam
138.16
अण्डजातं तु ब्रह्माणं केचिदिच्छन्त्यपण्डिताः
अण्डाद्भिन्नाद्बभुः शैला दिशोऽम्भः पृथिवी दिवम्
Andajatam tu brahmanam kechidichchhantyapanditah
Andadbhinnadbabhuh shaila dishombhah prithivi divam
138.17
द्रष्टव्यं नैतदेवं हि कथं ज्यायस्तमो हि सः
स्मृतमाकाशमण्डं तु तस्माज्जातः पितामहः
Drashtavyam naitadevam hi katham jyayastamo hi sah
Smritamakashamandam tu tasmajjatah pitamahah
138.18
तिष्ठेत्कथमिति ब्रूहि न किंचिद्धि तदा भवेत्
अहंकार इति प्रोक्तः सर्वतेजोगतः प्रभुः
Tishthetkathamiti bruhi na kinchiddhi tada bhavet
Ahankara iti proktah sarvatejogatah prabhuh
138.19
नास्त्यण्डमस्ति तु ब्रह्मा स राजँल्लोकभावनः
इत्युक्तः स तदा तूष्णीमभूद्वायुस्तमब्रवीत्
Nastyandamasti tu brahma sa rajanllokabhavanah
Ityuktah sa tada tushnimabhudvayustamabravit