অধ্যায় 149

149.1

যুধিষ্ঠির উবাচ
নাভাগধেয়ঃ প্রাপ্নোতি ধনং সুবলবানপি
ভাগধেয়ান্বিতস্ত্বর্থান্কৃশো বালশ্চ বিন্দতি

নালাভকালে লভতে প্রয়ত্নেঽপি কৃতে সতি
লাভকালেঽপ্রয়ত্নেন লভতে বিপুলং ধনম্
কৃতয়ত্নাফলাশ্চৈব দৃশ্যন্তে শতশো নরাঃ

যদি যত্নো ভবেন্মর্ত্যঃ স সর্বং ফলমাপ্নুয়াৎ
নালভ্যং চোপলভ্যেত নৃণাং ভরতসত্তম

যদা প্রয়ত্নং কৃতবান্দৃশ্যতে হ্যফলো নরঃ
মার্গন্নয়শতৈরর্থানমার্গংশ্চাপরঃ সুখী

অকার্যমসকৃত্কৃত্বা দৃশ্যন্তে হ্যধনা নরাঃ
ধনয়ুক্তাস্ত্বধর্মস্থা দৃশ্যন্তে চাপরে জনাঃ

অধীত্য নীতিং যস্মাচ্চ নীতিয়ুক্তো ন দৃশ্যতে
অনভিজ্ঞশ্চ সাচিব্যং গমিতঃ কেন হেতুনা
বিদ্যায়ুক্তো হ্যবিদ্যশ্চ ধনবান্দুর্গতস্তথা

যদি বিদ্যামুপাশ্রিত্য নরঃ সুখমবাপ্নুয়াৎ
ন বিদ্বান্বিদ্যয়া হীনং বৃত্ত্যর্থমুপসংশ্রয়েৎ

যথা পিপাসাং জয়তি পুরুষঃ প্রাপ্য বৈ জলম্
দৃষ্টার্থো বিদ্যয়াপ্যেবমবিদ্যাং প্রজহেন্নরঃ

নাপ্রাপ্তকালো ম্রিয়তে বিদ্ধঃ শরশতৈরপি
তৃণাগ্রেণাপি সংস্পৃষ্টঃ প্রাপ্তকালো ন জীবতি

ভীষ্ম উবাচ
ঈহমানঃ সমারম্ভান্যদি নাসাদয়েদ্ধনম্
উগ্রং তপঃ সমারোহেন্ন হ্যনুপ্তং প্ররোহতি

দানেন ভোগী ভবতি মেধাবী বৃদ্ধসেবয়া
অহিংসয়া চ দীর্ঘায়ুরিতি প্রাহুর্মনীষিণঃ

তস্মাদ্দদ্যান্ন যাচেত পূজয়েদ্ধার্মিকানপি
স্বাভাষী প্রিয়কৃচ্ছুদ্ধঃ সর্বসত্ত্বাবিহিংসকঃ

যদা প্রমাণপ্রভবঃ স্বভাবশ্চ সুখাসুখে
মশকীটপিপীলানাং স্থিরো ভব যুধিষ্ঠির