UtshovChapter 213
213.1
वैशंपायन उवाच
उक्तवन्तो यदा वाक्यमसकृत्सर्ववृष्णयः
ततोऽब्रवीद्वासुदेवो वाक्यं धर्मार्थसंहितम्
Vaishampayana uvacha
Uktavanto yada vakyamasakritsarvavrishnayah
Tatobravidvasudevo vakyam dharmarthasanhitam
213.2
नावमानं कुलस्यास्य गुडाकेशः प्रयुक्तवान्
संमानोऽभ्यधिकस्तेन प्रयुक्तोऽयमसंशयम्
Navamanam kulasyasya gudakeshah prayuktavan
Sammanobhyadhikastena prayuktoyamasanshayam
213.3
अर्थलुब्धान्न वः पार्थो मन्यते सात्वतान्सदा
स्वयंवरमनाधृष्यं मन्यते चापि पाण्डवः
Arthalubdhanna vah partho manyate satvatansada
Svayanvaramanadhrishyam manyate chapi pandavah
213.4
प्रदानमपि कन्यायाः पशुवत्कोऽनुमंस्यते
विक्रयं चाप्यपत्यस्य कः कुर्यात्पुरुषो भुवि
Pradanamapi kanyayah pashuvatkonumansyate
Vikrayam chapyapatyasya kah kuryatpurusho bhuvi
213.5
एतान्दोषांश्च कौन्तेयो दृष्टवानिति मे मतिः
अतः प्रसह्य हृतवान्कन्यां धर्मेण पाण्डवः
Etandoshanshcha kaunteyo drishtavaniti me matih
Atah prasahya hritavankanyam dharmena pandavah
213.6
उचितश्चैव संबन्धः सुभद्रा च यशस्विनी
एष चापीदृशः पार्थः प्रसह्य हृतवानिति
Uchitashchaiva sambandhah subhadra cha yashasvini
Esha chapidrishah parthah prasahya hritavaniti
213.7
भरतस्यान्वये जातं शंतनोश्च महात्मनः
कुन्तिभोजात्मजापुत्रं को बुभूषेत नार्जुनम्
Bharatasyanvaye jatam shantanoshcha mahatmanah
Kuntibhojatmajaputram ko bubhusheta narjunam
213.8
न च पश्यामि यः पार्थं विक्रमेण पराजयेत्
अपि सर्वेषु लोकेषु सेन्द्ररुद्रेषु मारिष
Na cha pashyami yah partham vikramena parajayet
Api sarveshu lokeshu sendrarudreshu marisha
213.9
स च नाम रथस्तादृङ्मदीयास्ते च वाजिनः
योद्धा पार्थश्च शीघ्रास्त्रः को नु तेन समो भवेत्
Sa cha nama rathastadrinmadiyaste cha vajinah
Yoddha parthashcha shighrastrah ko nu tena samo bhavet
213.10
तमनुद्रुत्य सान्त्वेन परमेण धनंजयम्
निवर्तयध्वं संहृष्टा ममैषा परमा मतिः
Tamanudrutya santvena paramena dhananjayam
Nivartayadhvam sanhrishta mamaisha parama matih
213.11
यदि निर्जित्य वः पार्थो बलाद्गच्छेत्स्वकं पुरम्
प्रणश्येद्वो यशः सद्यो न तु सान्त्वे पराजयः
Yadi nirjitya vah partho baladgachchhetsvakam puram
Pranashyedvo yashah sadyo na tu santve parajayah
213.12
तच्छ्रुत्वा वासुदेवस्य तथा चक्रुर्जनाधिप
निवृत्तश्चार्जुनस्तत्र विवाहं कृतवांस्ततः
Tachchhrutva vasudevasya tatha chakrurjanadhipa
Nivrittashcharjunastatra vivaham kritavanstatah
213.13
उषित्वा तत्र कौन्तेयः संवत्सरपराः क्षपाः
पुष्करेषु ततः शिष्टं कालं वर्तितवान्प्रभुः
पूर्णे तु द्वादशे वर्षे खाण्डवप्रस्थमाविशत्
Ushitva tatra kaunteyah sanvatsaraparah kshapah
Pushkareshu tatah shishtam kalam vartitavanprabhuh
Purne tu dvadashe varshe khandavaprasthamavishat
213.14
अभिगम्य स राजानं विनयेन समाहितः
अभ्यर्च्य ब्राह्मणान्पार्थो द्रौपदीमभिजग्मिवान्
Abhigamya sa rajanam vinayena samahitah
Abhyarchya brahmananpartho draupadimabhijagmivan
213.15
तं द्रौपदी प्रत्युवाच प्रणयात्कुरुनन्दनम्
तत्रैव गच्छ कौन्तेय यत्र सा सात्वतात्मजा
सुबद्धस्यापि भारस्य पूर्वबन्धः श्लथायते
Tam draupadi pratyuvacha pranayatkurunandanam
Tatraiva gachchha kaunteya yatra sa satvatatmaja
Subaddhasyapi bharasya purvabandhah shlathayate
213.16
तथा बहुविधं कृष्णां विलपन्तीं धनंजयः
सान्त्वयामास भूयश्च क्षमयामास चासकृत्
Tatha bahuvidham krishnam vilapantim dhananjayah
Santvayamasa bhuyashcha kshamayamasa chasakrit
213.17
सुभद्रां त्वरमाणश्च रक्तकौशेयवाससम्
पार्थः प्रस्थापयामास कृत्वा गोपालिकावपुः
Subhadram tvaramanashcha raktakausheyavasasam
Parthah prasthapayamasa kritva gopalikavapuh
213.18
साधिकं तेन रूपेण शोभमाना यशस्विनी
भवनं श्रेष्ठमासाद्य वीरपत्नी वराङ्गना
ववन्दे पृथुताम्राक्षी पृथां भद्रा यशस्विनी
Sadhikam tena rupena shobhamana yashasvini
Bhavanam shreshthamasadya virapatni varangana
Vavande prithutamrakshi pritham bhadra yashasvini
213.19
ततोऽभिगम्य त्वरिता पूर्णेन्दुसदृशानना
ववन्दे द्रौपदीं भद्रा प्रेष्याहमिति चाब्रवीत्
Tatobhigamya tvarita purnendusadrishanana
Vavande draupadim bhadra preshyahamiti chabravit
213.20
प्रत्युत्थाय च तां कृष्णा स्वसारं माधवस्य ताम्
सस्वजे चावदत्प्रीता निःसपत्नोऽस्तु ते पतिः
तथैव मुदिता भद्रा तामुवाचैवमस्त्विति
Pratyutthaya cha tam krishna svasaram madhavasya tam
Sasvaje chavadatprita nihsapatnostu te patih
Tathaiva mudita bhadra tamuvachaivamastviti
213.21
ततस्ते हृष्टमनसः पाण्डवेया महारथाः
कुन्ती च परमप्रीता बभूव जनमेजय
Tataste hrishtamanasah pandaveya maharathah
Kunti cha paramaprita babhuva janamejaya
213.22
श्रुत्वा तु पुण्डरीकाक्षः संप्राप्तं स्वपुरोत्तमम्
अर्जुनं पाण्डवश्रेष्ठमिन्द्रप्रस्थगतं तदा
Shrutva tu pundarikakshah sampraptam svapurottamam
Arjunam pandavashreshthamindraprasthagatam tada
213.23
आजगाम विशुद्धात्मा सह रामेण केशवः
वृष्ण्यन्धकमहामात्रैः सह वीरैर्महारथैः
Ajagama vishuddhatma saha ramena keshavah
Vrishnyandhakamahamatraih saha virairmaharathaih
213.24
भ्रातृभिश्च कुमारैश्च योधैश्च शतशो वृतः
सैन्येन महता शौरिरभिगुप्तः परंतपः
Bhratribhishcha kumaraishcha yodhaishcha shatasho vritah
Sainyena mahata shaurirabhiguptah parantapah
213.25
तत्र दानपतिर्धीमानाजगाम महायशाः
अक्रूरो वृष्णिवीराणां सेनापतिररिंदमः
Tatra danapatirdhimanajagama mahayashah
Akruro vrishniviranam senapatirarindamah
213.26
अनाधृष्टिर्महातेजा उद्धवश्च महायशाः
साक्षाद्बृहस्पतेः शिष्यो महाबुद्धिर्महायशाः
Anadhrishtirmahateja uddhavashcha mahayashah
Sakshadbrihaspateh shishyo mahabuddhirmahayashah
213.27
सत्यकः सात्यकिश्चैव कृतवर्मा च सात्वतः
प्रद्युम्नश्चैव साम्बश्च निशठः शङ्कुरेव च
Satyakah satyakishchaiva kritavarma cha satvatah
Pradyumnashchaiva sambashcha nishathah shankureva cha
213.28
चारुदेष्णश्च विक्रान्तो झिल्ली विपृथुरेव च
सारणश्च महाबाहुर्गदश्च विदुषां वरः
Charudeshnashcha vikranto jhilli viprithureva cha
Saranashcha mahabahurgadashcha vidusham varah
213.29
एते चान्ये च बहवो वृष्णिभोजान्धकास्तथा
आजग्मुः खाण्डवप्रस्थमादाय हरणं बहु
Ete chanye cha bahavo vrishnibhojandhakastatha
Ajagmuh khandavaprasthamadaya haranam bahu
213.30
ततो युधिष्ठिरो राजा श्रुत्वा माधवमागतम्
प्रतिग्रहार्थं कृष्णस्य यमौ प्रास्थापयत्तदा
Tato yudhishthiro raja shrutva madhavamagatam
Pratigrahartham krishnasya yamau prasthapayattada
213.31
ताभ्यां प्रतिगृहीतं तद्वृष्णिचक्रं समृद्धिमत्
विवेश खाण्डवप्रस्थं पताकाध्वजशोभितम्
Tabhyam pratigrihitam tadvrishnichakram samriddhimat
Vivesha khandavaprastham patakadhvajashobhitam
213.32
सिक्तसंमृष्टपन्थानं पुष्पप्रकरशोभितम्
चन्दनस्य रसैः शीतैः पुण्यगन्धैर्निषेवितम्
Siktasammrishtapanthanam pushpaprakarashobhitam
Chandanasya rasaih shitaih punyagandhairnishevitam
213.33
दह्यतागुरुणा चैव देशे देशे सुगन्धिना
सुसंमृष्टजनाकीर्णं वणिग्भिरुपशोभितम्
Dahyataguruna chaiva deshe deshe sugandhina
Susammrishtajanakirnam vanigbhirupashobhitam
213.34
प्रतिपेदे महाबाहुः सह रामेण केशवः
वृष्ण्यन्धकमहाभोजैः संवृतः पुरुषोत्तमः
Pratipede mahabahuh saha ramena keshavah
Vrishnyandhakamahabhojaih sanvritah purushottamah
213.35
संपूज्यमानः पौरैश्च ब्राह्मणैश्च सहस्रशः
विवेश भवनं राज्ञः पुरंदरगृहोपमम्
Sampujyamanah pauraishcha brahmanaishcha sahasrashah
Vivesha bhavanam ragyah purandaragrihopamam
213.36
युधिष्ठिरस्तु रामेण समागच्छद्यथाविधि
मूर्ध्नि केशवमाघ्राय पर्यष्वजत बाहुना
Yudhishthirastu ramena samagachchhadyathavidhi
Murdhni keshavamaghraya paryashvajata bahuna
213.37
तं प्रीयमाणं कृष्णस्तु विनयेनाभ्यपूजयत्
भीमं च पुरुषव्याघ्रं विधिवत्प्रत्यपूजयत्
Tam priyamanam krishnastu vinayenabhyapujayat
Bhimam cha purushavyaghram vidhivatpratyapujayat
213.38
तांश्च वृष्ण्यन्धकश्रेष्ठान्धर्मराजो युधिष्ठिरः
प्रतिजग्राह सत्कारैर्यथाविधि यथोपगम्
Tanshcha vrishnyandhakashreshthandharmarajo yudhishthirah
Pratijagraha satkarairyathavidhi yathopagam
213.39
गुरुवत्पूजयामास कांश्चित्कांश्चिद्वयस्यवत्
कांश्चिदभ्यवदत्प्रेम्णा कैश्चिदप्यभिवादितः
Guruvatpujayamasa kanshchitkanshchidvayasyavat
Kanshchidabhyavadatpremna kaishchidapyabhivaditah
213.40
ततो ददौ वासुदेवो जन्यार्थे धनमुत्तमम्
हरणं वै सुभद्राया ज्ञातिदेयं महायशाः
Tato dadau vasudevo janyarthe dhanamuttamam
Haranam vai subhadraya gyatideyam mahayashah
213.41
रथानां काञ्चनाङ्गानां किङ्किणीजालमालिनाम्
चतुर्युजामुपेतानां सूतैः कुशलसंमतैः
सहस्रं प्रददौ कृष्णो गवामयुतमेव च
Rathanam kanchananganam kinkinijalamalinam
Chaturyujamupetanam sutaih kushalasammataih
Sahasram pradadau krishno gavamayutameva cha
213.42
श्रीमान्माथुरदेश्यानां दोग्ध्रीणां पुण्यवर्चसाम्
वडवानां च शुभ्राणां चन्द्रांशुसमवर्चसाम्
ददौ जनार्दनः प्रीत्या सहस्रं हेमभूषणम्
Shrimanmathuradeshyanam dogdhrinam punyavarchasam
Vadavanam cha shubhranam chandranshusamavarchasam
Dadau janardanah pritya sahasram hemabhushanam
213.43
तथैवाश्वतरीणां च दान्तानां वातरंहसाम्
शतान्यञ्जनकेशीनां श्वेतानां पञ्च पञ्च च
Tathaivashvatarinam cha dantanam vataranhasam
Shatanyanjanakeshinam shvetanam pancha pancha cha
213.44
स्नापनोत्सादने चैव सुयुक्तं वयसान्वितम्
स्त्रीणां सहस्रं गौरीणां सुवेषाणां सुवर्चसाम्
Snapanotsadane chaiva suyuktam vayasanvitam
Strinam sahasram gaurinam suveshanam suvarchasam
213.45
सुवर्णशतकण्ठीनामरोगाणां सुवाससाम्
परिचर्यासु दक्षाणां प्रददौ पुष्करेक्षणः
Suvarnashatakanthinamaroganam suvasasam
Paricharyasu dakshanam pradadau pushkarekshanah
213.46
कृताकृतस्य मुख्यस्य कनकस्याग्निवर्चसः
मनुष्यभारान्दाशार्हो ददौ दश जनार्दनः
Kritakritasya mukhyasya kanakasyagnivarchasah
Manushyabharandasharho dadau dasha janardanah
213.47
गजानां तु प्रभिन्नानां त्रिधा प्रस्रवतां मदम्
गिरिकूटनिकाशानां समरेष्वनिवर्तिनाम्
Gajanam tu prabhinnanam tridha prasravatam madam
Girikutanikashanam samareshvanivartinam
213.48
कॢप्तानां पटुघण्टानां वराणां हेममालिनाम्
हस्त्यारोहैरुपेतानां सहस्रं साहसप्रियः
Kliptanam patughantanam varanam hemamalinam
Hastyarohairupetanam sahasram sahasapriyah
213.49
रामः पादग्राहणिकं ददौ पार्थाय लाङ्गली
प्रीयमाणो हलधरः संबन्धप्रीतिमावहन्
Ramah padagrahanikam dadau parthaya langali
Priyamano haladharah sambandhapritimavahan
213.50
स महाधनरत्नौघो वस्त्रकम्बलफेनवान्
महागजमहाग्राहः पताकाशैवलाकुलः
Sa mahadhanaratnaugho vastrakambalaphenavan
Mahagajamahagrahah patakashaivalakulah
213.51
पाण्डुसागरमाविद्धः प्रविवेश महानदः
पूर्णमापूरयंस्तेषां द्विषच्छोकावहोऽभवत्
Pandusagaramaviddhah pravivesha mahanadah
Purnamapurayanstesham dvishachchhokavahobhavat
213.52
प्रतिजग्राह तत्सर्वं धर्मराजो युधिष्ठिरः
पूजयामास तांश्चैव वृष्ण्यन्धकमहारथान्
Pratijagraha tatsarvam dharmarajo yudhishthirah
Pujayamasa tanshchaiva vrishnyandhakamaharathan
213.53
ते समेता महात्मानः कुरुवृष्ण्यन्धकोत्तमाः
विजह्रुरमरावासे नराः सुकृतिनो यथा
Te sameta mahatmanah kuruvrishnyandhakottamah
Vijahruramaravase narah sukritino yatha
213.54
तत्र तत्र महापानैरुत्कृष्टतलनादितैः
यथायोगं यथाप्रीति विजह्रुः कुरुवृष्णयः
Tatra tatra mahapanairutkrishtatalanaditaih
Yathayogam yathapriti vijahruh kuruvrishnayah
213.55
एवमुत्तमवीर्यास्ते विहृत्य दिवसान्बहून्
पूजिताः कुरुभिर्जग्मुः पुनर्द्वारवतीं पुरीम्
Evamuttamaviryaste vihritya divasanbahun
Pujitah kurubhirjagmuh punardvaravatim purim
213.56
रामं पुरस्कृत्य ययुर्वृष्ण्यन्धकमहारथाः
रत्नान्यादाय शुभ्राणि दत्तानि कुरुसत्तमैः
Ramam puraskritya yayurvrishnyandhakamaharathah
Ratnanyadaya shubhrani dattani kurusattamaih
213.57
वासुदेवस्तु पार्थेन तत्रैव सह भारत
उवास नगरे रम्ये शक्रप्रस्थे महामनाः
व्यचरद्यमुनाकूले पार्थेन सह भारत
Vasudevastu parthena tatraiva saha bharata
Uvasa nagare ramye shakraprasthe mahamanah
Vyacharadyamunakule parthena saha bharata
213.58
ततः सुभद्रा सौभद्रं केशवस्य प्रिया स्वसा
जयन्तमिव पौलोमी द्युतिमन्तमजीजनत्
Tatah subhadra saubhadram keshavasya priya svasa
Jayantamiva paulomi dyutimantamajijanat
213.59
दीर्घबाहुं महासत्त्वमृषभाक्षमरिंदमम्
सुभद्रा सुषुवे वीरमभिमन्युं नरर्षभम्
Dirghabahum mahasattvamrishabhakshamarindamam
Subhadra sushuve viramabhimanyum nararshabham
213.60
अभीश्च मन्युमांश्चैव ततस्तमरिमर्दनम्
अभिमन्युमिति प्राहुरार्जुनिं पुरुषर्षभम्
Abhishcha manyumanshchaiva tatastamarimardanam
Abhimanyumiti prahurarjunim purusharshabham
213.61
स सात्वत्यामतिरथः संबभूव धनंजयात्
मखे निर्मथ्यमानाद्वा शमीगर्भाद्धुताशनः
Sa satvatyamatirathah sambabhuva dhananjayat
Makhe nirmathyamanadva shamigarbhaddhutashanah
213.62
यस्मिञ्जाते महाबाहुः कुन्तीपुत्रो युधिष्ठिरः
अयुतं गा द्विजातिभ्यः प्रादान्निष्कांश्च तावतः
Yasminjate mahabahuh kuntiputro yudhishthirah
Ayutam ga dvijatibhyah pradannishkanshcha tavatah
213.63
दयितो वासुदेवस्य बाल्यात्प्रभृति चाभवत्
पितॄणां चैव सर्वेषां प्रजानामिव चन्द्रमाः
Dayito vasudevasya balyatprabhriti chabhavat
Pitrinam chaiva sarvesham prajanamiva chandramah
213.64
जन्मप्रभृति कृष्णश्च चक्रे तस्य क्रियाः शुभाः
स चापि ववृधे बालः शुक्लपक्षे यथा शशी
Janmaprabhriti krishnashcha chakre tasya kriyah shubhah
Sa chapi vavridhe balah shuklapakshe yatha shashi
213.65
चतुष्पादं दशविधं धनुर्वेदमरिंदमः
अर्जुनाद्वेद वेदज्ञात्सकलं दिव्यमानुषम्
Chatushpadam dashavidham dhanurvedamarindamah
Arjunadveda vedagyatsakalam divyamanusham
213.66
विज्ञानेष्वपि चास्त्राणां सौष्ठवे च महाबलः
क्रियास्वपि च सर्वासु विशेषानभ्यशिक्षयत्
Vigyaneshvapi chastranam saushthave cha mahabalah
Kriyasvapi cha sarvasu visheshanabhyashikshayat
213.67
आगमे च प्रयोगे च चक्रे तुल्यमिवात्मनः
तुतोष पुत्रं सौभद्रं प्रेक्षमाणो धनंजयः
Agame cha prayoge cha chakre tulyamivatmanah
Tutosha putram saubhadram prekshamano dhananjayah
213.68
सर्वसंहननोपेतं सर्वलक्षणलक्षितम्
दुर्धर्षमृषभस्कन्धं व्यात्ताननमिवोरगम्
Sarvasanhananopetam sarvalakshanalakshitam
Durdharshamrishabhaskandham vyattananamivoragam
213.69
सिंहदर्पं महेष्वासं मत्तमातङ्गविक्रमम्
मेघदुन्दुभिनिर्घोषं पूर्णचन्द्रनिभाननम्
Sinhadarpam maheshvasam mattamatangavikramam
Meghadundubhinirghosham purnachandranibhananam
213.70
कृष्णस्य सदृशं शौर्ये वीर्ये रूपे तथाकृतौ
ददर्श पुत्रं बीभत्सुर्मघवानिव तं यथा
Krishnasya sadrisham shaurye virye rupe tathakritau
Dadarsha putram bibhatsurmaghavaniva tam yatha
213.71
पाञ्चाल्यपि च पञ्चभ्यः पतिभ्यः शुभलक्षणा
लेभे पञ्च सुतान्वीराञ्शुभान्पञ्चाचलानिव
Panchalyapi cha panchabhyah patibhyah shubhalakshana
Lebhe pancha sutanviranshubhanpanchachalaniva
213.72
युधिष्ठिरात्प्रतिविन्ध्यं सुतसोमं वृकोदरात्
अर्जुनाच्छ्रुतकर्माणं शतानीकं च नाकुलिम्
Yudhishthiratprativindhyam sutasomam vrikodarat
Arjunachchhrutakarmanam shatanikam cha nakulim
213.73
सहदेवाच्छ्रुतसेनमेतान्पञ्च महारथान्
पाञ्चाली सुषुवे वीरानादित्यानदितिर्यथा
Sahadevachchhrutasenametanpancha maharathan
Panchali sushuve viranadityanaditiryatha
213.74
शास्त्रतः प्रतिविन्ध्यं तमूचुर्विप्रा युधिष्ठिरम्
परप्रहरणज्ञाने प्रतिविन्ध्यो भवत्वयम्
Shastratah prativindhyam tamuchurvipra yudhishthiram
Parapraharanagyane prativindhyo bhavatvayam
213.75
सुते सोमसहस्रे तु सोमार्कसमतेजसम्
सुतसोमं महेष्वासं सुषुवे भीमसेनतः
Sute somasahasre tu somarkasamatejasam
Sutasomam maheshvasam sushuve bhimasenatah
213.76
श्रुतं कर्म महत्कृत्वा निवृत्तेन किरीटिना
जातः पुत्रस्तवेत्येवं श्रुतकर्मा ततोऽभवत्
Shrutam karma mahatkritva nivrittena kiritina
Jatah putrastavetyevam shrutakarma tatobhavat
213.77
शतानीकस्य राजर्षेः कौरव्यः कुरुनन्दनः
चक्रे पुत्रं सनामानं नकुलः कीर्तिवर्धनम्
Shatanikasya rajarsheh kauravyah kurunandanah
Chakre putram sanamanam nakulah kirtivardhanam
213.78
ततस्त्वजीजनत्कृष्णा नक्षत्रे वह्निदैवते
सहदेवात्सुतं तस्माच्छ्रुतसेनेति तं विदुः
Tatastvajijanatkrishna nakshatre vahnidaivate
Sahadevatsutam tasmachchhrutaseneti tam viduh
213.79
एकवर्षान्तरास्त्वेव द्रौपदेया यशस्विनः
अन्वजायन्त राजेन्द्र परस्परहिते रताः
Ekavarshantarastveva draupadeya yashasvinah
Anvajayanta rajendra parasparahite ratah
213.80
जातकर्माण्यानुपूर्व्याच्चूडोपनयनानि च
चकार विधिवद्धौम्यस्तेषां भरतसत्तम
Jatakarmanyanupurvyachchudopanayanani cha
Chakara vidhivaddhaumyastesham bharatasattama
213.81
कृत्वा च वेदाध्ययनं ततः सुचरितव्रताः
जगृहुः सर्वमिष्वस्त्रमर्जुनाद्दिव्यमानुषम्
Kritva cha vedadhyayanam tatah sucharitavratah
Jagrihuh sarvamishvastramarjunaddivyamanusham
213.82
देवगर्भोपमैः पुत्रैर्व्यूढोरस्कैर्महाबलैः
अन्विता राजशार्दूल पाण्डवा मुदमाप्नुवन्
Devagarbhopamaih putrairvyudhoraskairmahabalaih
Anvita rajashardula pandava mudamapnuvan