Utshovঅধ্যায় 213
213.1
বৈশংপায়ন উবাচ
উক্তবন্তো যদা বাক্যমসকৃত্সর্ববৃষ্ণয়ঃ
ততোঽব্রবীদ্বাসুদেবো বাক্যং ধর্মার্থসংহিতম্
213.2
নাবমানং কুলস্যাস্য গুডাকেশঃ প্রয়ুক্তবান্
সংমানোঽভ্যধিকস্তেন প্রয়ুক্তোঽয়মসংশয়ম্
213.3
অর্থলুব্ধান্ন বঃ পার্থো মন্যতে সাত্বতান্সদা
স্বয়ংবরমনাধৃষ্যং মন্যতে চাপি পাণ্ডবঃ
213.4
প্রদানমপি কন্যায়াঃ পশুবত্কোঽনুমংস্যতে
বিক্রয়ং চাপ্যপত্যস্য কঃ কুর্যাত্পুরুষো ভুবি
213.5
এতান্দোষাংশ্চ কৌন্তেয়ো দৃষ্টবানিতি মে মতিঃ
অতঃ প্রসহ্য হৃতবান্কন্যাং ধর্মেণ পাণ্ডবঃ
213.6
উচিতশ্চৈব সংবন্ধঃ সুভদ্রা চ যশস্বিনী
এষ চাপীদৃশঃ পার্থঃ প্রসহ্য হৃতবানিতি
213.7
ভরতস্যান্বয়ে জাতং শংতনোশ্চ মহাত্মনঃ
কুন্তিভোজাত্মজাপুত্রং কো বুভূষেত নার্জুনম্
213.8
ন চ পশ্যামি যঃ পার্থং বিক্রমেণ পরাজয়েৎ
অপি সর্বেষু লোকেষু সেন্দ্ররুদ্রেষু মারিষ
213.9
স চ নাম রথস্তাদৃঙ্মদীয়াস্তে চ বাজিনঃ
যোদ্ধা পার্থশ্চ শীঘ্রাস্ত্রঃ কো নু তেন সমো ভবেৎ
213.10
তমনুদ্রুত্য সান্ত্বেন পরমেণ ধনংজয়ম্
নিবর্তয়ধ্বং সংহৃষ্টা মমৈষা পরমা মতিঃ
213.11
যদি নির্জিত্য বঃ পার্থো বলাদ্গচ্ছেত্স্বকং পুরম্
প্রণশ্যেদ্বো যশঃ সদ্যো ন তু সান্ত্বে পরাজয়ঃ
213.12
তচ্ছ্রুত্বা বাসুদেবস্য তথা চক্রুর্জনাধিপ
নিবৃত্তশ্চার্জুনস্তত্র বিবাহং কৃতবাংস্ততঃ
213.13
উষিত্বা তত্র কৌন্তেয়ঃ সংবত্সরপরাঃ ক্ষপাঃ
পুষ্করেষু ততঃ শিষ্টং কালং বর্তিতবান্প্রভুঃ
পূর্ণে তু দ্বাদশে বর্ষে খাণ্ডবপ্রস্থমাবিশৎ
213.14
অভিগম্য স রাজানং বিনয়েন সমাহিতঃ
অভ্যর্চ্য ব্রাহ্মণান্পার্থো দ্রৌপদীমভিজগ্মিবান্
213.15
তং দ্রৌপদী প্রত্যুবাচ প্রণয়াত্কুরুনন্দনম্
তত্রৈব গচ্ছ কৌন্তেয় যত্র সা সাত্বতাত্মজা
সুবদ্ধস্যাপি ভারস্য পূর্ববন্ধঃ শ্লথায়তে
213.16
তথা বহুবিধং কৃষ্ণাং বিলপন্তীং ধনংজয়ঃ
সান্ত্বয়ামাস ভূয়শ্চ ক্ষময়ামাস চাসকৃৎ
213.17
সুভদ্রাং ত্বরমাণশ্চ রক্তকৌশেয়বাসসম্
পার্থঃ প্রস্থাপয়ামাস কৃত্বা গোপালিকাবপুঃ
213.18
সাধিকং তেন রূপেণ শোভমানা যশস্বিনী
ভবনং শ্রেষ্ঠমাসাদ্য বীরপত্নী বরাঙ্গনা
ববন্দে পৃথুতাম্রাক্ষী পৃথাং ভদ্রা যশস্বিনী
213.19
ততোঽভিগম্য ত্বরিতা পূর্ণেন্দুসদৃশাননা
ববন্দে দ্রৌপদীং ভদ্রা প্রেষ্যাহমিতি চাব্রবীৎ
213.20
প্রত্যুত্থায় চ তাং কৃষ্ণা স্বসারং মাধবস্য তাম্
সস্বজে চাবদত্প্রীতা নিঃসপত্নোঽস্তু তে পতিঃ
তথৈব মুদিতা ভদ্রা তামুবাচৈবমস্ত্বিতি
213.21
ততস্তে হৃষ্টমনসঃ পাণ্ডবেয়া মহারথাঃ
কুন্তী চ পরমপ্রীতা বভূব জনমেজয়
213.22
শ্রুত্বা তু পুণ্ডরীকাক্ষঃ সংপ্রাপ্তং স্বপুরোত্তমম্
অর্জুনং পাণ্ডবশ্রেষ্ঠমিন্দ্রপ্রস্থগতং তদা
213.23
আজগাম বিশুদ্ধাত্মা সহ রামেণ কেশবঃ
বৃষ্ণ্যন্ধকমহামাত্রৈঃ সহ বীরৈর্মহারথৈঃ
213.24
ভ্রাতৃভিশ্চ কুমারৈশ্চ যোধৈশ্চ শতশো বৃতঃ
সৈন্যেন মহতা শৌরিরভিগুপ্তঃ পরংতপঃ
213.25
তত্র দানপতির্ধীমানাজগাম মহায়শাঃ
অক্রূরো বৃষ্ণিবীরাণাং সেনাপতিররিংদমঃ
213.26
অনাধৃষ্টির্মহাতেজা উদ্ধবশ্চ মহায়শাঃ
সাক্ষাদ্বৃহস্পতেঃ শিষ্যো মহাবুদ্ধির্মহায়শাঃ
213.27
সত্যকঃ সাত্যকিশ্চৈব কৃতবর্মা চ সাত্বতঃ
প্রদ্যুম্নশ্চৈব সাম্বশ্চ নিশঠঃ শঙ্কুরেব চ
213.28
চারুদেষ্ণশ্চ বিক্রান্তো ঝিল্লী বিপৃথুরেব চ
সারণশ্চ মহাবাহুর্গদশ্চ বিদুষাং বরঃ
213.29
এতে চান্যে চ বহবো বৃষ্ণিভোজান্ধকাস্তথা
আজগ্মুঃ খাণ্ডবপ্রস্থমাদায় হরণং বহু
213.30
ততো যুধিষ্ঠিরো রাজা শ্রুত্বা মাধবমাগতম্
প্রতিগ্রহার্থং কৃষ্ণস্য যমৌ প্রাস্থাপয়ত্তদা
213.31
তাভ্যাং প্রতিগৃহীতং তদ্বৃষ্ণিচক্রং সমৃদ্ধিমৎ
বিবেশ খাণ্ডবপ্রস্থং পতাকাধ্বজশোভিতম্
213.32
সিক্তসংমৃষ্টপন্থানং পুষ্পপ্রকরশোভিতম্
চন্দনস্য রসৈঃ শীতৈঃ পুণ্যগন্ধৈর্নিষেবিতম্
213.33
দহ্যতাগুরুণা চৈব দেশে দেশে সুগন্ধিনা
সুসংমৃষ্টজনাকীর্ণং বণিগ্ভিরুপশোভিতম্
213.34
প্রতিপেদে মহাবাহুঃ সহ রামেণ কেশবঃ
বৃষ্ণ্যন্ধকমহাভোজৈঃ সংবৃতঃ পুরুষোত্তমঃ
213.35
সংপূজ্যমানঃ পৌরৈশ্চ ব্রাহ্মণৈশ্চ সহস্রশঃ
বিবেশ ভবনং রাজ্ঞঃ পুরংদরগৃহোপমম্
213.36
যুধিষ্ঠিরস্তু রামেণ সমাগচ্ছদ্যথাবিধি
মূর্ধ্নি কেশবমাঘ্রায় পর্যষ্বজত বাহুনা
213.37
তং প্রীয়মাণং কৃষ্ণস্তু বিনয়েনাভ্যপূজয়ৎ
ভীমং চ পুরুষব্যাঘ্রং বিধিবত্প্রত্যপূজয়ৎ
213.38
তাংশ্চ বৃষ্ণ্যন্ধকশ্রেষ্ঠান্ধর্মরাজো যুধিষ্ঠিরঃ
প্রতিজগ্রাহ সত্কারৈর্যথাবিধি যথোপগম্
213.39
গুরুবত্পূজয়ামাস কাংশ্চিত্কাংশ্চিদ্বয়স্যবৎ
কাংশ্চিদভ্যবদত্প্রেম্ণা কৈশ্চিদপ্যভিবাদিতঃ
213.40
ততো দদৌ বাসুদেবো জন্যার্থে ধনমুত্তমম্
হরণং বৈ সুভদ্রায়া জ্ঞাতিদেয়ং মহায়শাঃ
213.41
রথানাং কাঞ্চনাঙ্গানাং কিঙ্কিণীজালমালিনাম্
চতুর্যুজামুপেতানাং সূতৈঃ কুশলসংমতৈঃ
সহস্রং প্রদদৌ কৃষ্ণো গবাময়ুতমেব চ
213.42
শ্রীমান্মাথুরদেশ্যানাং দোগ্ধ্রীণাং পুণ্যবর্চসাম্
বডবানাং চ শুভ্রাণাং চন্দ্রাংশুসমবর্চসাম্
দদৌ জনার্দনঃ প্রীত্যা সহস্রং হেমভূষণম্
213.43
তথৈবাশ্বতরীণাং চ দান্তানাং বাতরংহসাম্
শতান্যঞ্জনকেশীনাং শ্বেতানাং পঞ্চ পঞ্চ চ
213.44
স্নাপনোত্সাদনে চৈব সুয়ুক্তং বয়সান্বিতম্
স্ত্রীণাং সহস্রং গৌরীণাং সুবেষাণাং সুবর্চসাম্
213.45
সুবর্ণশতকণ্ঠীনামরোগাণাং সুবাসসাম্
পরিচর্যাসু দক্ষাণাং প্রদদৌ পুষ্করেক্ষণঃ
213.46
কৃতাকৃতস্য মুখ্যস্য কনকস্যাগ্নিবর্চসঃ
মনুষ্যভারান্দাশার্হো দদৌ দশ জনার্দনঃ
213.47
গজানাং তু প্রভিন্নানাং ত্রিধা প্রস্রবতাং মদম্
গিরিকূটনিকাশানাং সমরেষ্বনিবর্তিনাম্
213.48
কৢপ্তানাং পটুঘণ্টানাং বরাণাং হেমমালিনাম্
হস্ত্যারোহৈরুপেতানাং সহস্রং সাহসপ্রিয়ঃ
213.49
রামঃ পাদগ্রাহণিকং দদৌ পার্থায় লাঙ্গলী
প্রীয়মাণো হলধরঃ সংবন্ধপ্রীতিমাবহন্
213.50
স মহাধনরত্নৌঘো বস্ত্রকম্বলফেনবান্
মহাগজমহাগ্রাহঃ পতাকাশৈবলাকুলঃ
213.51
পাণ্ডুসাগরমাবিদ্ধঃ প্রবিবেশ মহানদঃ
পূর্ণমাপূরয়ংস্তেষাং দ্বিষচ্ছোকাবহোঽভবৎ
213.52
প্রতিজগ্রাহ তত্সর্বং ধর্মরাজো যুধিষ্ঠিরঃ
পূজয়ামাস তাংশ্চৈব বৃষ্ণ্যন্ধকমহারথান্
213.53
তে সমেতা মহাত্মানঃ কুরুবৃষ্ণ্যন্ধকোত্তমাঃ
বিজহ্রুরমরাবাসে নরাঃ সুকৃতিনো যথা
213.54
তত্র তত্র মহাপানৈরুত্কৃষ্টতলনাদিতৈঃ
যথায়োগং যথাপ্রীতি বিজহ্রুঃ কুরুবৃষ্ণয়ঃ
213.55
এবমুত্তমবীর্যাস্তে বিহৃত্য দিবসান্বহূন্
পূজিতাঃ কুরুভির্জগ্মুঃ পুনর্দ্বারবতীং পুরীম্
213.56
রামং পুরস্কৃত্য যয়ুর্বৃষ্ণ্যন্ধকমহারথাঃ
রত্নান্যাদায় শুভ্রাণি দত্তানি কুরুসত্তমৈঃ
213.57
বাসুদেবস্তু পার্থেন তত্রৈব সহ ভারত
উবাস নগরে রম্যে শক্রপ্রস্থে মহামনাঃ
ব্যচরদ্যমুনাকূলে পার্থেন সহ ভারত
213.58
ততঃ সুভদ্রা সৌভদ্রং কেশবস্য প্রিয়া স্বসা
জয়ন্তমিব পৌলোমী দ্যুতিমন্তমজীজনৎ
213.59
দীর্ঘবাহুং মহাসত্ত্বমৃষভাক্ষমরিংদমম্
সুভদ্রা সুষুবে বীরমভিমন্যুং নরর্ষভম্
213.60
অভীশ্চ মন্যুমাংশ্চৈব ততস্তমরিমর্দনম্
অভিমন্যুমিতি প্রাহুরার্জুনিং পুরুষর্ষভম্
213.61
স সাত্বত্যামতিরথঃ সংবভূব ধনংজয়াৎ
মখে নির্মথ্যমানাদ্বা শমীগর্ভাদ্ধুতাশনঃ
213.62
যস্মিঞ্জাতে মহাবাহুঃ কুন্তীপুত্রো যুধিষ্ঠিরঃ
অয়ুতং গা দ্বিজাতিভ্যঃ প্রাদান্নিষ্কাংশ্চ তাবতঃ
213.63
দয়িতো বাসুদেবস্য বাল্যাত্প্রভৃতি চাভবৎ
পিতৄণাং চৈব সর্বেষাং প্রজানামিব চন্দ্রমাঃ
213.64
জন্মপ্রভৃতি কৃষ্ণশ্চ চক্রে তস্য ক্রিয়াঃ শুভাঃ
স চাপি ববৃধে বালঃ শুক্লপক্ষে যথা শশী
213.65
চতুষ্পাদং দশবিধং ধনুর্বেদমরিংদমঃ
অর্জুনাদ্বেদ বেদজ্ঞাত্সকলং দিব্যমানুষম্
213.66
বিজ্ঞানেষ্বপি চাস্ত্রাণাং সৌষ্ঠবে চ মহাবলঃ
ক্রিয়াস্বপি চ সর্বাসু বিশেষানভ্যশিক্ষয়ৎ
213.67
আগমে চ প্রয়োগে চ চক্রে তুল্যমিবাত্মনঃ
তুতোষ পুত্রং সৌভদ্রং প্রেক্ষমাণো ধনংজয়ঃ
213.68
সর্বসংহননোপেতং সর্বলক্ষণলক্ষিতম্
দুর্ধর্ষমৃষভস্কন্ধং ব্যাত্তাননমিবোরগম্
213.69
সিংহদর্পং মহেষ্বাসং মত্তমাতঙ্গবিক্রমম্
মেঘদুন্দুভিনির্ঘোষং পূর্ণচন্দ্রনিভাননম্
213.70
কৃষ্ণস্য সদৃশং শৌর্যে বীর্যে রূপে তথাকৃতৌ
দদর্শ পুত্রং বীভত্সুর্মঘবানিব তং যথা
213.71
পাঞ্চাল্যপি চ পঞ্চভ্যঃ পতিভ্যঃ শুভলক্ষণা
লেভে পঞ্চ সুতান্বীরাঞ্শুভান্পঞ্চাচলানিব
213.72
যুধিষ্ঠিরাত্প্রতিবিন্ধ্যং সুতসোমং বৃকোদরাৎ
অর্জুনাচ্ছ্রুতকর্মাণং শতানীকং চ নাকুলিম্
213.73
সহদেবাচ্ছ্রুতসেনমেতান্পঞ্চ মহারথান্
পাঞ্চালী সুষুবে বীরানাদিত্যানদিতির্যথা
213.74
শাস্ত্রতঃ প্রতিবিন্ধ্যং তমূচুর্বিপ্রা যুধিষ্ঠিরম্
পরপ্রহরণজ্ঞানে প্রতিবিন্ধ্যো ভবত্বয়ম্
213.75
সুতে সোমসহস্রে তু সোমার্কসমতেজসম্
সুতসোমং মহেষ্বাসং সুষুবে ভীমসেনতঃ
213.76
শ্রুতং কর্ম মহত্কৃত্বা নিবৃত্তেন কিরীটিনা
জাতঃ পুত্রস্তবেত্যেবং শ্রুতকর্মা ততোঽভবৎ
213.77
শতানীকস্য রাজর্ষেঃ কৌরব্যঃ কুরুনন্দনঃ
চক্রে পুত্রং সনামানং নকুলঃ কীর্তিবর্ধনম্
213.78
ততস্ত্বজীজনত্কৃষ্ণা নক্ষত্রে বহ্নিদৈবতে
সহদেবাত্সুতং তস্মাচ্ছ্রুতসেনেতি তং বিদুঃ
213.79
একবর্ষান্তরাস্ত্বেব দ্রৌপদেয়া যশস্বিনঃ
অন্বজায়ন্ত রাজেন্দ্র পরস্পরহিতে রতাঃ
213.80
জাতকর্মাণ্যানুপূর্ব্যাচ্চূডোপনয়নানি চ
চকার বিধিবদ্ধৌম্যস্তেষাং ভরতসত্তম
213.81
কৃত্বা চ বেদাধ্যয়নং ততঃ সুচরিতব্রতাঃ
জগৃহুঃ সর্বমিষ্বস্ত্রমর্জুনাদ্দিব্যমানুষম্
213.82
দেবগর্ভোপমৈঃ পুত্রৈর্ব্যূঢোরস্কৈর্মহাবলৈঃ
অন্বিতা রাজশার্দূল পাণ্ডবা মুদমাপ্নুবন্