Utshovঅধ্যায় 214
214.1
বৈশংপায়ন উবাচ
ইন্দ্রপ্রস্থে বসন্তস্তে জঘ্নুরন্যান্নরাধিপান্
শাসনাদ্ধৃতরাষ্ট্রস্য রাজ্ঞঃ শাংতনবস্য চ
214.2
আশ্রিত্য ধর্মরাজানং সর্বলোকোঽবসত্সুখম্
পুণ্যলক্ষণকর্মাণং স্বদেহমিব দেহিনঃ
214.3
স সমং ধর্মকামার্থান্সিষেবে ভরতর্ষভঃ
ত্রীনিবাত্মসমান্বন্ধূন্বন্ধুমানিব মানয়ন্
214.4
তেষাং সমবিভক্তানাং ক্ষিতৌ দেহবতামিব
বভৌ ধর্মার্থকামানাং চতুর্থ ইব পার্থিবঃ
214.5
অধ্যেতারং পরং বেদাঃ প্রয়োক্তারং মহাধ্বরাঃ
রক্ষিতারং শুভং বর্ণা লেভিরে তং জনাধিপম্
214.6
অধিষ্ঠানবতী লক্ষ্মীঃ পরায়ণবতী মতিঃ
বন্ধুমানখিলো ধর্মস্তেনাসীত্পৃথিবীক্ষিতা
214.7
ভ্রাতৃভিঃ সহিতো রাজা চতুর্ভিরধিকং বভৌ
প্রয়ুজ্যমানৈর্বিততো বেদৈরিব মহাধ্বরঃ
214.8
তং তু ধৌম্যাদয়ো বিপ্রাঃ পরিবার্যোপতস্থিরে
বৃহস্পতিসমা মুখ্যাঃ প্রজাপতিমিবামরাঃ
214.9
ধর্মরাজে অতিপ্রীত্যা পূর্ণচন্দ্র ইবামলে
প্রজানাং রেমিরে তুল্যং নেত্রাণি হৃদয়ানি চ
214.10
ন তু কেবলদৈবেন প্রজা ভাবেন রেমিরে
যদ্বভূব মনঃকান্তং কর্মণা স চকার তৎ
214.11
ন হ্যয়ুক্তং ন চাসত্যং নানৃতং ন চ বিপ্রিয়ম্
ভাষিতং চারুভাষস্য জজ্ঞে পার্থস্য ধীমতঃ
214.12
স হি সর্বস্য লোকস্য হিতমাত্মন এব চ
চিকীর্ষুঃ সুমহাতেজা রেমে ভরতসত্তমঃ
214.13
তথা তু মুদিতাঃ সর্বে পাণ্ডবা বিগতজ্বরাঃ
অবসন্পৃথিবীপালাংস্ত্রাসয়ন্তঃ স্বতেজসা
214.14
ততঃ কতিপয়াহস্য বীভত্সুঃ কৃষ্ণমব্রবীৎ
উষ্ণানি কৃষ্ণ বর্তন্তে গচ্ছামো যমুনাং প্রতি
214.15
সুহৃজ্জনবৃতাস্তত্র বিহৃত্য মধুসূদন
সায়াহ্নে পুনরেষ্যামো রোচতাং তে জনার্দন
214.16
বাসুদেব উবাচ
কুন্তীমাতর্মমাপ্যেতদ্রোচতে যদ্বয়ং জলে
সুহৃজ্জনবৃতাঃ পার্থ বিহরেম যথাসুখম্
214.17
বৈশংপায়ন উবাচ
আমন্ত্র্য ধর্মরাজানমনুজ্ঞাপ্য চ ভারত
জগ্মতুঃ পার্থগোবিন্দৌ সুহৃজ্জনবৃতৌ ততঃ
214.18
বিহারদেশং সংপ্রাপ্য নানাদ্রুমবদুত্তমম্
গৃহৈরুচ্চাবচৈর্যুক্তং পুরংদরগৃহোপমম্
214.19
ভক্ষ্যৈর্ভোজ্যৈশ্চ পেয়ৈশ্চ রসবদ্ভির্মহাধনৈঃ
মাল্যৈশ্চ বিবিধৈর্যুক্তং যুক্তং বার্ষ্ণেয়পার্থয়োঃ
214.20
আবিবেশতুরাপূর্ণং রত্নৈরুচ্চাবচৈঃ শুভৈঃ
যথোপজোষং সর্বশ্চ জনশ্চিক্রীড ভারত
214.21
বনে কাশ্চিজ্জলে কাশ্চিত্কাশ্চিদ্বেশ্মসু চাঙ্গনাঃ
যথাদেশং যথাপ্রীতি চিক্রীডুঃ কৃষ্ণপার্থয়োঃ
214.22
দ্রৌপদী চ সুভদ্রা চ বাসাংস্যাভরণানি চ
প্রয়চ্ছেতাং মহার্হাণি স্ত্রীণাং তে স্ম মদোত্কটে
214.23
কাশ্চিত্প্রহৃষ্টা ননৃতুশ্চুক্রুশুশ্চ তথাপরাঃ
জহসুশ্চাপরা নার্যঃ পপুশ্চান্যা বরাসবম্
214.24
রুরুদুশ্চাপরাস্তত্র প্রজঘ্নুশ্চ পরস্পরম্
মন্ত্রয়ামাসুরন্যাশ্চ রহস্যানি পরস্পরম্
214.25
বেণুবীণামৃদঙ্গানাং মনোজ্ঞানাং চ সর্বশঃ
শব্দেনাপূর্যতে হ স্ম তদ্বনং সুসমৃদ্ধিমৎ
214.26
তস্মিংস্তথা বর্তমানে কুরুদাশার্হনন্দনৌ
সমীপে জগ্মতুঃ কংচিদুদ্দেশং সুমনোহরম্
214.27
তত্র গত্বা মহাত্মানৌ কৃষ্ণৌ পরপুরংজয়ৌ
মহার্হাসনয়ো রাজংস্ততস্তৌ সংনিষীদতুঃ
214.28
তত্র পূর্বব্যতীতানি বিক্রান্তানি রতানি চ
বহূনি কথয়িত্বা তৌ রেমাতে পার্থমাধবৌ
214.29
তত্রোপবিষ্টৌ মুদিতৌ নাকপৃষ্ঠেঽশ্বিনাবিব
অভ্যগচ্ছত্তদা বিপ্রো বাসুদেবধনংজয়ৌ
214.30
বৃহচ্ছালপ্রতীকাশঃ প্রতপ্তকনকপ্রভঃ
হরিপিঙ্গো হরিশ্মশ্রুঃ প্রমাণায়ামতঃ সমঃ
214.31
তরুণাদিত্যসংকাশঃ কৃষ্ণবাসা জটাধরঃ
পদ্মপত্রাননঃ পিঙ্গস্তেজসা প্রজ্বলন্নিব
214.32
উপসৃষ্টং তু তং কৃষ্ণৌ ভ্রাজমানং দ্বিজোত্তমম্
অর্জুনো বাসুদেবশ্চ তূর্ণমুত্পত্য তস্থতুঃ