অধ্যায় 215

215.1

বৈশংপায়ন উবাচ
সোঽব্রবীদর্জুনং চৈব বাসুদেবং চ সাত্বতম্
লোকপ্রবীরৌ তিষ্ঠন্তৌ খাণ্ডবস্য সমীপতঃ

ব্রাহ্মণো বহুভোক্তাস্মি ভুঞ্জেঽপরিমিতং সদা
ভিক্ষে বার্ষ্ণেয়পার্থৌ বামেকাং তৃপ্তিং প্রয়চ্ছতাম্

এবমুক্তৌ তমব্রূতাং ততস্তৌ কৃষ্ণপাণ্ডবৌ
কেনান্নেন ভবাংস্তৃপ্যেত্তস্যান্নস্য যতাবহে

এবমুক্তঃ স ভগবানব্রবীত্তাবুভৌ ততঃ
ভাষমাণৌ তদা বীরৌ কিমন্নং ক্রিয়তামিতি

নাহমন্নং বুভুক্ষে বৈ পাবকং মাং নিবোধতম্
যদন্নমনুরূপং মে তদ্যুবাং সংপ্রয়চ্ছতম্

ইদমিন্দ্রঃ সদা দাবং খাণ্ডবং পরিরক্ষতি
তং ন শক্নোম্যহং দগ্ধুং রক্ষ্যমাণং মহাত্মনা

বসত্যত্র সখা তস্য তক্ষকঃ পন্নগঃ সদা
সগণস্তত্কৃতে দাবং পরিরক্ষতি বজ্রভৃৎ

তত্র ভূতান্যনেকানি রক্ষ্যন্তে স্ম প্রসঙ্গতঃ
তং দিধক্ষুর্ন শক্নোমি দগ্ধুং শক্রস্য তেজসা

স মাং প্রজ্বলিতং দৃষ্ট্বা মেঘাম্ভোভিঃ প্রবর্ষতি
ততো দগ্ধুং ন শক্নোমি দিধক্ষুর্দাবমীপ্সিতম্

স যুবাভ্যাং সহায়াভ্যামস্ত্রবিদ্ভ্যাং সমাগতঃ
দহেয়ং খাণ্ডবং দাবমেতদন্নং বৃতং ময়া

যুবাং হ্যুদকধারাস্তা ভূতানি চ সমন্ততঃ
উত্তমাস্ত্রবিদৌ সম্যক্সর্বতো বারয়িষ্যথঃ

এবমুক্তে প্রত্যুবাচ বীভত্সুর্জাতবেদসম্
দিধক্ষুং খাণ্ডবং দাবমকামস্য শতক্রতোঃ

উত্তমাস্ত্রাণি মে সন্তি দিব্যানি চ বহূনি চ
যৈরহং শক্নুয়াং যোদ্ধুমপি বজ্রধরান্বহূন্

ধনুর্মে নাস্তি ভগবন্বাহুবীর্যেণ সংমিতম্
কুর্বতঃ সমরে যত্নং বেগং যদ্বিষহেত মে

শরৈশ্চ মেঽর্থো বহুভিরক্ষয়ৈঃ ক্ষিপ্রমস্যতঃ
ন হি বোঢুং রথঃ শক্তঃ শরান্মম যথেপ্সিতান্

অশ্বাংশ্চ দিব্যানিচ্ছেয়ং পাণ্ডুরান্বাতরংহসঃ
রথং চ মেঘনির্ঘোষং সূর্যপ্রতিমতেজসম্

তথা কৃষ্ণস্য বীর্যেণ নায়ুধং বিদ্যতে সমম্
যেন নাগান্পিশাচাংশ্চ নিহন্যান্মাধবো রণে

উপায়ং কর্মণঃ সিদ্ধৌ ভগবন্বক্তুমর্হসি
নিবারয়েয়ং যেনেন্দ্রং বর্ষমাণং মহাবনে

পৌরুষেণ তু যত্কার্যং তত্কর্তারৌ স্ব পাবক
করণানি সমর্থানি ভগবন্দাতুমর্হসি