Utshovঅধ্যায় 216
216.1
বৈশংপায়ন উবাচ
এবমুক্তস্তু ভগবান্ধূমকেতুর্হুতাশনঃ
চিন্তয়ামাস বরুণং লোকপালং দিদৃক্ষয়া
আদিত্যমুদকে দেবং নিবসন্তং জলেশ্বরম্
216.2
স চ তচ্চিন্তিতং জ্ঞাত্বা দর্শয়ামাস পাবকম্
তমব্রবীদ্ধূমকেতুঃ প্রতিপূজ্য জলেশ্বরম্
চতুর্থং লোকপালানাং রক্ষিতারং মহেশ্বরম্
216.3
সোমেন রাজ্ঞা যদ্দত্তং ধনুশ্চৈবেষুধী চ তে
তত্প্রয়চ্ছোভয়ং শীঘ্রং রথং চ কপিলক্ষণম্
216.4
কার্যং হি সুমহত্পার্থো গাণ্ডীবেন করিষ্যতি
চক্রেণ বাসুদেবশ্চ তন্মদর্থে প্রদীয়তাম্
দদানীত্যেব বরুণঃ পাবকং প্রত্যভাষত
216.5
ততোঽদ্ভুতং মহাবীর্যং যশঃকীর্তিবিবর্ধনম্
সর্বশস্ত্রৈরনাধৃষ্যং সর্বশস্ত্রপ্রমাথি চ
সর্বায়ুধমহামাত্রং পরসেনাপ্রধর্ষণম্
216.6
একং শতসহস্রেণ সংমিতং রাষ্ট্রবর্ধনম্
চিত্রমুচ্চাবচৈর্বর্ণৈঃ শোভিতং শ্লক্ষ্ণমব্রণম্
216.7
দেবদানবগন্ধর্বৈঃ পূজিতং শাশ্বতীঃ সমাঃ
প্রাদাদ্বৈ ধনুরত্নং তদক্ষয্যৌ চ মহেষুধী
216.8
রথং চ দিব্যাশ্বয়ুজং কপিপ্রবরকেতনম্
উপেতং রাজতৈরশ্বৈর্গান্ধর্বৈর্হেমমালিভিঃ
পাণ্ডুরাভ্রপ্রতীকাশৈর্মনোবায়ুসমৈর্জবে
216.9
সর্বোপকরণৈর্যুক্তমজয্যং দেবদানবৈঃ
ভানুমন্তং মহাঘোষং সর্বভূতমনোহরম্
216.10
সসর্জ যত্স্বতপসা ভৌবনো ভুবনপ্রভুঃ
প্রজাপতিরনির্দেশ্যং যস্য রূপং রবেরিব
216.11
যং স্ম সোমঃ সমারুহ্য দানবানজয়ত্প্রভুঃ
নগমেঘপ্রতীকাশং জ্বলন্তমিব চ শ্রিয়া
216.12
আশ্রিতা তং রথশ্রেষ্ঠং শক্রায়ুধসমা শুভা
তাপনীয়া সুরুচিরা ধ্বজয়ষ্টিরনুত্তমা
216.13
তস্যাং তু বানরো দিব্যঃ সিংহশার্দূললক্ষণঃ
বিনর্দন্নিব তত্রস্থঃ সংস্থিতো মূর্ধ্ন্যশোভত
216.14
ধ্বজে ভূতানি তত্রাসন্বিবিধানি মহান্তি চ
নাদেন রিপুসৈন্যানাং যেষাং সংজ্ঞা প্রণশ্যতি
216.15
স তং নানাপতাকাভিঃ শোভিতং রথমুত্তমম্
প্রদক্ষিণমুপাবৃত্য দৈবতেভ্যঃ প্রণম্য চ
216.16
সংনদ্ধঃ কবচী খড্গী বদ্ধগোধাঙ্গুলিত্রবান্
আরুরোহ রথং পার্থো বিমানং সুকৃতী যথা
216.17
তচ্চ দিব্যং ধনুঃশ্রেষ্ঠং ব্রহ্মণা নির্মিতং পুরা
গাণ্ডীবমুপসংগৃহ্য বভূব মুদিতোঽর্জুনঃ
216.18
হুতাশনং নমস্কৃত্য ততস্তদপি বীর্যবান্
জগ্রাহ বলমাস্থায় জ্যয়া চ যুয়ুজে ধনুঃ
216.19
মৌর্ব্যাং তু যুজ্যমানায়াং বলিনা পাণ্ডবেন হ
যেঽশৃণ্বন্কূজিতং তত্র তেষাং বৈ ব্যথিতং মনঃ
216.20
লব্ধ্বা রথং ধনুশ্চৈব তথাক্ষয্যৌ মহেষুধী
বভূব কল্যঃ কৌন্তেয়ঃ প্রহৃষ্টঃ সাহ্যকর্মণি
216.21
বজ্রনাভং ততশ্চক্রং দদৌ কৃষ্ণায় পাবকঃ
আগ্নেয়মস্ত্রং দয়িতং স চ কল্যোঽভবত্তদা
216.22
অব্রবীত্পাবকশ্চৈনমেতেন মধুসূদন
অমানুষানপি রণে বিজেষ্যসি ন সংশয়ঃ
216.23
অনেন ত্বং মনুষ্যাণাং দেবানামপি চাহবে
রক্ষঃপিশাচদৈত্যানাং নাগানাং চাধিকঃ সদা
ভবিষ্যসি ন সংদেহঃ প্রবরারিনিবর্হণে
216.24
ক্ষিপ্তং ক্ষিপ্তং রণে চৈতত্ত্বয়া মাধব শত্রুষু
হত্বাপ্রতিহতং সংখ্যে পাণিমেষ্যতি তে পুনঃ
216.25
বরুণশ্চ দদৌ তস্মৈ গদামশনিনিঃস্বনাম্
দৈত্যান্তকরণীং ঘোরাং নাম্না কৌমোদকীং হরেঃ
216.26
ততঃ পাবকমব্রূতাং প্রহৃষ্টৌ কৃষ্ণপাণ্ডবৌ
কৃতাস্ত্রৌ শস্ত্রসংপন্নৌ রথিনৌ ধ্বজিনাবপি
216.27
কল্যৌ স্বো ভগবন্যোদ্ধুমপি সর্বৈঃ সুরাসুরৈঃ
কিং পুনর্বজ্রিণৈকেন পন্নগার্থে যুয়ুত্সুনা
216.28
অর্জুন উবাচ
চক্রমস্ত্রং চ বার্ষ্ণেয়ো বিসৃজন্যুধি বীর্যবান্
ত্রিষু লোকেষু তন্নাস্তি যন্ন জীয়াজ্জনার্দনঃ
216.29
গাণ্ডীবং ধনুরাদায় তথাক্ষয্যৌ মহেষুধী
অহমপ্যুত্সহে লোকান্বিজেতুং যুধি পাবক
216.30
সর্বতঃ পরিবার্যৈনং দাবেন মহতা প্রভো
কামং সংপ্রজ্বলাদ্যৈব কল্যৌ স্বঃ সাহ্যকর্মণি
216.31
বৈশংপায়ন উবাচ
এবমুক্তঃ স ভগবান্দাশার্হেণার্জুনেন চ
তৈজসং রূপমাস্থায় দাবং দগ্ধুং প্রচক্রমে
216.32
সর্বতঃ পরিবার্যাথ সপ্তার্চির্জ্বলনস্তদা
দদাহ খাণ্ডবং ক্রুদ্ধো যুগান্তমিব দর্শয়ন্
216.33
পরিগৃহ্য সমাবিষ্টস্তদ্বনং ভরতর্ষভ
মেঘস্তনিতনির্ঘোষং সর্বভূতানি নির্দহন্
216.34
দহ্যতস্তস্য বিবভৌ রূপং দাবস্য ভারত
মেরোরিব নগেন্দ্রস্য কাঞ্চনস্য মহাদ্যুতেঃ