অধ্যায় 217

217.1

বৈশংপায়ন উবাচ
তৌ রথাভ্যাং নরব্যাঘ্রৌ দাবস্যোভয়তঃ স্থিতৌ
দিক্ষু সর্বাসু ভূতানাং চক্রাতে কদনং মহৎ

যত্র যত্র হি দৃশ্যন্তে প্রাণিনঃ খাণ্ডবালয়াঃ
পলায়ন্তস্তত্র তত্র তৌ বীরৌ পর্যধাবতাম্

ছিদ্রং হি ন প্রপশ্যন্তি রথয়োরাশুবিক্রমাৎ
আবিদ্ধাবিব দৃশ্যেতে রথিনৌ তৌ রথোত্তমৌ

খাণ্ডবে দহ্যমানে তু ভূতান্যথ সহস্রশঃ
উত্পেতুর্ভৈরবান্নাদান্বিনদন্তো দিশো দশ

দগ্ধৈকদেশা বহবো নিষ্টপ্তাশ্চ তথাপরে
স্ফুটিতাক্ষা বিশীর্ণাশ্চ বিপ্লুতাশ্চ বিচেতসঃ

সমালিঙ্গ্য সুতানন্যে পিতৄন্মাতৄংস্তথাপরে
ত্যক্তুং ন শেকুঃ স্নেহেন তথৈব নিধনং গতাঃ

বিকৃতৈর্দর্শনৈরন্যে সমুত্পেতুঃ সহস্রশঃ
তত্র তত্র বিঘূর্ণন্তঃ পুনরগ্নৌ প্রপেদিরে

দগ্ধপক্ষাক্ষিচরণা বিচেষ্টন্তো মহীতলে
তত্র তত্র স্ম দৃশ্যন্তে বিনশ্যন্তঃ শরীরিণঃ

জলস্থানেষু সর্বেষু ক্বাথ্যমানেষু ভারত
গতসত্ত্বাঃ স্ম দৃশ্যন্তে কূর্মমত্স্যাঃ সহস্রশঃ

শরীরৈঃ সংপ্রদীপ্তৈশ্চ দেহবন্ত ইবাগ্নয়ঃ
অদৃশ্যন্ত বনে তস্মিন্প্রাণিনঃ প্রাণসংক্ষয়ে

তাংস্তথোত্পততঃ পার্থঃ শরৈঃ সংছিদ্য খণ্ডশঃ
দীপ্যমানে ততঃ প্রাস্যত্প্রহসন্কৃষ্ণবর্ত্মনি

তে শরাচিতসর্বাঙ্গা বিনদন্তো মহারবান্
ঊর্ধ্বমুত্পত্য বেগেন নিপেতুঃ পাবকে পুনঃ

শরৈরভ্যাহতানাং চ দহ্যতাং চ বনৌকসাম্
বিরাবঃ শ্রূয়তে হ স্ম সমুদ্রস্যেব মথ্যতঃ

বহ্নেশ্চাপি প্রহৃষ্টস্য খমুত্পেতুর্মহার্চিষঃ
জনয়ামাসুরুদ্বেগং সুমহান্তং দিবৌকসাম্

ততো জগ্মুর্মহাত্মানঃ সর্ব এব দিবৌকসঃ
শরণং দেবরাজানং সহস্রাক্ষং পুরংদরম্

দেবা ঊচুঃ
কিং ন্বিমে মানবাঃ সর্বে দহ্যন্তে কৃষ্ণবর্ত্মনা
কচ্চিন্ন সংক্ষয়ঃ প্রাপ্তো লোকানামমরেশ্বর

বৈশংপায়ন উবাচ
তচ্ছ্রুত্বা বৃত্রহা তেভ্যঃ স্বয়মেবান্ববেক্ষ্য চ
খাণ্ডবস্য বিমোক্ষার্থং প্রয়য়ৌ হরিবাহনঃ

মহতা মেঘজালেন নানারূপেণ বজ্রভৃৎ
আকাশং সমবস্তীর্য প্রববর্ষ সুরেশ্বরঃ

ততোঽক্ষমাত্রা বিসৃজন্ধারাঃ শতসহস্রশঃ
অভ্যবর্ষত্সহস্রাক্ষঃ পাবকং খাণ্ডবং প্রতি

অসংপ্রাপ্তাস্তু তা ধারাস্তেজসা জাতবেদসঃ
খ এব সমশুষ্যন্ত ন কাশ্চিত্পাবকং গতাঃ

ততো নমুচিহা ক্রুদ্ধো ভৃশমর্চিষ্মতস্তদা
পুনরেবাভ্যবর্ষত্তমম্ভঃ প্রবিসৃজন্বহু

অর্চির্ধারাভিসংবদ্ধং ধূমবিদ্যুত্সমাকুলম্
বভূব তদ্বনং ঘোরং স্তনয়িত্নুসঘোষবৎ