Utshovঅধ্যায় 218
218.1
বৈশংপায়ন উবাচ
তস্যাভিবর্ষতো বারি পাণ্ডবঃ প্রত্যবারয়ৎ
শরবর্ষেণ বীভত্সুরুত্তমাস্ত্রাণি দর্শয়ন্
218.2
শরৈঃ সমন্ততঃ সর্বং খাণ্ডবং চাপি পাণ্ডবঃ
ছাদয়ামাস তদ্বর্ষমপকৃষ্য ততো বনাৎ
218.3
ন চ স্ম কিংচিচ্ছক্নোতি ভূতং নিশ্চরিতুং ততঃ
সংছাদ্যমানে খগমৈরস্যতা সব্যসাচিনা
218.4
তক্ষকস্তু ন তত্রাসীত্সর্পরাজো মহাবলঃ
দহ্যমানে বনে তস্মিন্কুরুক্ষেত্রেঽভবত্তদা
218.5
অশ্বসেনস্তু তত্রাসীত্তক্ষকস্য সুতো বলী
স যত্নমকরোত্তীব্রং মোক্ষার্থং হব্যবাহনাৎ
218.6
ন শশাক বিনির্গন্তুং কৌন্তেয়শরপীডিতঃ
মোক্ষয়ামাস তং মাতা নিগীর্য ভুজগাত্মজা
218.7
তস্য পূর্বং শিরো গ্রস্তং পুচ্ছমস্য নিগীর্যতে
ঊর্ধ্বমাচক্রমে সা তু পন্নগী পুত্রগৃদ্ধিনী
218.8
তস্যাস্তীক্ষ্ণেন ভল্লেন পৃথুধারেণ পাণ্ডবঃ
শিরশ্চিচ্ছেদ গচ্ছন্ত্যাস্তামপশ্যত্সুরেশ্বরঃ
218.9
তং মুমোচয়িষুর্বজ্রী বাতবর্ষেণ পাণ্ডবম্
মোহয়ামাস তত্কালমশ্বসেনস্ত্বমুচ্যত
218.10
তাং চ মায়াং তদা দৃষ্ট্বা ঘোরাং নাগেন বঞ্চিতঃ
দ্বিধা ত্রিধা চ চিচ্ছেদ খগতানেব ভারত
218.11
শশাপ তং চ সংক্রুদ্ধো বীভত্সুর্জিহ্মগামিনম্
পাবকো বাসুদেবশ্চ অপ্রতিষ্ঠো ভবেদিতি
218.12
ততো জিষ্ণুঃ সহস্রাক্ষং খং বিতত্যেষুভিঃ শিতৈঃ
যোধয়ামাস সংক্রুদ্ধো বঞ্চনাং তামনুস্মরন্
218.13
দেবরাডপি তং দৃষ্ট্বা সংরব্ধমিব ফল্গুনম্
স্বমস্ত্রমসৃজদ্দীপ্তং যত্ততানাখিলং নভঃ
218.14
ততো বায়ুর্মহাঘোষঃ ক্ষোভয়ন্সর্বসাগরান্
বিয়ত্স্থোঽজনয়ন্মেঘাঞ্জলধারামুচোঽঽকুলান্
218.15
তদ্বিঘাতার্থমসৃজদর্জুনোঽপ্যস্ত্রমুত্তমম্
বায়ব্যমেবাভিমন্ত্র্য প্রতিপত্তিবিশারদঃ
218.16
তেনেন্দ্রাশনিমেঘানাং বীর্যৌজস্তদ্বিনাশিতম্
জলধারাশ্চ তাঃ শোষং জগ্মুর্নেশুশ্চ বিদ্যুতঃ
218.17
ক্ষণেন চাভবদ্ব্যোম সংপ্রশান্তরজস্তমঃ
সুখশীতানিলগুণং প্রকৃতিস্থার্কমণ্ডলম্
218.18
নিষ্প্রতীকারহৃষ্টশ্চ হুতভুগ্বিবিধাকৃতিঃ
প্রজজ্বালাতুলার্চিষ্মান্স্বনাদৈঃ পূরয়ঞ্জগৎ
218.19
কৃষ্ণাভ্যাং রক্ষিতং দৃষ্ট্বা তং চ দাবমহংকৃতাঃ
সমুত্পেতুরথাকাশং সুপর্ণাদ্যাঃ পতত্রিণঃ
218.20
গরুডা বজ্রসদৃশৈঃ পক্ষতুণ্ডনখৈস্তথা
প্রহর্তুকামাঃ সংপেতুরাকাশাত্কৃষ্ণপাণ্ডবৌ
218.21
তথৈবোরগসংঘাতাঃ পাণ্ডবস্য সমীপতঃ
উত্সৃজন্তো বিষং ঘোরং নিশ্চেরুর্জ্বলিতাননাঃ
218.22
তাংশ্চকর্ত শরৈঃ পার্থঃ সরোষান্দৃশ্য খেচরান্
বিবশাশ্চাপতন্দীপ্তং দেহাভাবায় পাবকম্
218.23
ততঃ সুরাঃ সগন্ধর্বা যক্ষরাক্ষসপন্নগাঃ
উত্পেতুর্নাদমতুলমুত্সৃজন্তো রণার্থিণঃ
218.24
অয়ঃকণপচক্রাশ্মভুশুণ্ড্যুদ্যতবাহবঃ
কৃষ্ণপার্থৌ জিঘাংসন্তঃ ক্রোধসংমূর্চ্ছিতৌজসঃ
218.25
তেষামভিব্যাহরতাং শস্ত্রবর্ষং চ মুঞ্চতাম্
প্রমমাথোত্তমাঙ্গানি বীভত্সুর্নিশিতৈঃ শরৈঃ
218.26
কৃষ্ণশ্চ সুমহাতেজাশ্চক্রেণারিনিহা তদা
দৈত্যদানবসংঘানাং চকার কদনং মহৎ
218.27
অথাপরে শরৈর্বিদ্ধাশ্চক্রবেগেরিতাস্তদা
বেলামিব সমাসাদ্য ব্যাতিষ্ঠন্ত মহৌজসঃ
218.28
ততঃ শক্রোঽভিসংক্রুদ্ধস্ত্রিদশানাং মহেশ্বরঃ
পাণ্ডুরং গজমাস্থায় তাবুভৌ সমভিদ্রবৎ
218.29
অশনিং গৃহ্য তরসা বজ্রমস্ত্রমবাসৃজৎ
হতাবেতাবিতি প্রাহ সুরানসুরসূদনঃ
218.30
ততঃ সমুদ্যতাং দৃষ্ট্বা দেবেন্দ্রেণ মহাশনিম্
জগৃহুঃ সর্বশস্ত্রাণি স্বানি স্বানি সুরাস্তদা
218.31
কালদণ্ডং যমো রাজা শিবিকাং চ ধনেশ্বরঃ
পাশং চ বরুণস্তত্র বিচক্রং চ তথা শিবঃ
218.32
ওষধীর্দীপ্যমানাশ্চ জগৃহাতেঽশ্বিনাবপি
জগৃহে চ ধনুর্ধাতা মুসলং চ জয়স্তথা
218.33
পর্বতং চাপি জগ্রাহ ক্রুদ্ধস্ত্বষ্টা মহাবলঃ
অংশস্তু শক্তিং জগ্রাহ মৃত্যুর্দেবঃ পরশ্বধম্
218.34
প্রগৃহ্য পরিঘং ঘোরং বিচচারার্যমা অপি
মিত্রশ্চ ক্ষুরপর্যন্তং চক্রং গৃহ্য ব্যতিষ্ঠত
218.35
পূষা ভগশ্চ সংক্রুদ্ধঃ সবিতা চ বিশাং পতে
আত্তকার্মুকনিস্ত্রিংশাঃ কৃষ্ণপার্থাবভিদ্রুতাঃ
218.36
রুদ্রাশ্চ বসবশ্চৈব মরুতশ্চ মহাবলাঃ
বিশ্বেদেবাস্তথা সাধ্যা দীপ্যমানাঃ স্বতেজসা
218.37
এতে চান্যে চ বহবো দেবাস্তৌ পুরুষোত্তমৌ
কৃষ্ণপার্থৌ জিঘাংসন্তঃ প্রতীয়ুর্বিবিধায়ুধাঃ
218.38
তত্রাদ্ভুতান্যদৃশ্যন্ত নিমিত্তানি মহাহবে
যুগান্তসমরূপাণি ভূতোত্সাদায় ভারত
218.39
তথা তু দৃষ্ট্বা সংরব্ধং শক্রং দেবৈঃ সহাচ্যুতৌ
অভীতৌ যুধি দুর্ধর্ষৌ তস্থতুঃ সজ্জকার্মুকৌ
218.40
আগতাংশ্চৈব তান্দৃষ্ট্বা দেবানেকৈকশস্ততঃ
ন্যবারয়েতাং সংক্রুদ্ধৌ বাণৈর্বজ্রোপমৈস্তদা
218.41
অসকৃদ্ভগ্নসংকল্পাঃ সুরাশ্চ বহুশঃ কৃতাঃ
ভয়াদ্রণং পরিত্যজ্য শক্রমেবাভিশিশ্রিয়ুঃ
218.42
দৃষ্ট্বা নিবারিতান্দেবান্মাধবেনার্জুনেন চ
আশ্চর্যমগমংস্তত্র মুনয়ো দিবি বিষ্ঠিতাঃ
218.43
শক্রশ্চাপি তয়োর্বীর্যমুপলভ্যাসকৃদ্রণে
বভূব পরমপ্রীতো ভূয়শ্চৈতাবয়োধয়ৎ
218.44
ততোঽশ্মবর্ষং সুমহদ্ব্যসৃজত্পাকশাসনঃ
ভূয় এব তদা বীর্যং জিজ্ঞাসুঃ সব্যসাচিনঃ
তচ্ছরৈরর্জুনো বর্ষং প্রতিজঘ্নেঽত্যমর্ষণঃ
218.45
বিফলং ক্রিয়মাণং তত্সংপ্রেক্ষ্য চ শতক্রতুঃ
ভূয়ঃ সংবর্ধয়ামাস তদ্বর্ষং দেবরাডথ
218.46
সোঽশ্মবর্ষং মহাবেগৈরিষুভিঃ পাকশাসনিঃ
বিলয়ং গময়ামাস হর্ষয়ন্পিতরং তদা
218.47
সমুত্পাট্য তু পাণিভ্যাং মন্দরাচ্ছিখরং মহৎ
সদ্রুমং ব্যসৃজচ্ছক্রো জিঘাংসুঃ পাণ্ডুনন্দনম্
218.48
ততোঽর্জুনো বেগবদ্ভির্জ্বলিতাগ্রৈরজিহ্মগৈঃ
বাণৈর্বিধ্বংসয়ামাস গিরেঃ শৃঙ্গং সহস্রধা
218.49
গিরের্বিশীর্যমাণস্য তস্য রূপং তদা বভৌ
সার্কচন্দ্রগ্রহস্যেব নভসঃ প্রবিশীর্যতঃ
218.50
তেনাবাক্পততা দাবে শৈলেন মহতা ভৃশম্
ভূয় এব হতাস্তত্র প্রাণিনঃ খাণ্ডবালয়াঃ