Utshovঅধ্যায় 219
219.1
বৈশংপায়ন উবাচ
তথা শৈলনিপাতেন ভীষিতাঃ খাণ্ডবালয়াঃ
দানবা রাক্ষসা নাগাস্তরক্ষ্বৃক্ষবনৌকসঃ
দ্বিপাঃ প্রভিন্নাঃ শার্দূলাঃ সিংহাঃ কেসরিণস্তথা
219.2
মৃগাশ্চ মহিষাশ্চৈব শতশঃ পক্ষিণস্তথা
সমুদ্বিগ্না বিসসৃপুস্তথান্যা ভূতজাতয়ঃ
219.3
তং দাবং সমুদীক্ষন্তঃ কৃষ্ণৌ চাভ্যুদ্যতায়ুধৌ
উত্পাতনাদশব্দেন সংত্রাসিত ইবাভবন্
219.4
স্বতেজোভাস্বরং চক্রমুত্সসর্জ জনার্দনঃ
তেন তা জাতয়ঃ ক্ষুদ্রাঃ সদানবনিশাচরাঃ
নিকৃত্তাঃ শতশঃ সর্বা নিপেতুরনলং ক্ষণাৎ
219.5
অদৃশ্যন্রাক্ষসাস্তত্র কৃষ্ণচক্রবিদারিতাঃ
বসারুধিরসংপৃক্তাঃ সংধ্যায়ামিব তোয়দাঃ
219.6
পিশাচান্পক্ষিণো নাগান্পশূংশ্চাপি সহস্রশঃ
নিঘ্নংশ্চরতি বার্ষ্ণেয়ঃ কালবত্তত্র ভারত
219.7
ক্ষিপ্তং ক্ষিপ্তং হি তচ্চক্রং কৃষ্ণস্যামিত্রঘাতিনঃ
হত্বানেকানি সত্ত্বানি পাণিমেতি পুনঃ পুনঃ
219.8
তথা তু নিঘ্নতস্তস্য সর্বসত্ত্বানি ভারত
বভূব রূপমত্যুগ্রং সর্বভূতাত্মনস্তদা
219.9
সমেতানাং চ দেবানাং দানবানাং চ সর্বশঃ
বিজেতা নাভবত্কশ্চিত্কৃষ্ণপাণ্ডবয়োর্মৃধে
219.10
তয়োর্বলাত্পরিত্রাতুং তং দাবং তু যদা সুরাঃ
নাশক্নুবঞ্শময়িতুং তদাভূবন্পরাঙ্মুখাঃ
219.11
শতক্রতুশ্চ সংপ্রেক্ষ্য বিমুখান্দেবতাগণান্
বভূবাবস্থিতঃ প্রীতঃ প্রশংসন্কৃষ্ণপাণ্ডবৌ
219.12
নিবৃত্তেষু তু দেবেষু বাগুবাচাশরীরিণী
শতক্রতুমভিপ্রেক্ষ্য মহাগম্ভীরনিঃস্বনা
219.13
ন তে সখা সংনিহিতস্তক্ষকঃ পন্নগোত্তমঃ
দাহকালে খাণ্ডবস্য কুরুক্ষেত্রং গতো হ্যসৌ
219.14
ন চ শক্যৌ ত্বয়া জেতুং যুদ্ধেঽস্মিন্সমবস্থিতৌ
বাসুদেবার্জুনৌ শক্র নিবোধেদং বচো মম
219.15
নরনারায়ণৌ দেবৌ তাবেতৌ বিশ্রুতৌ দিবি
ভবানপ্যভিজানাতি যদ্বীর্যৌ যত্পরাক্রমৌ
219.16
নৈতৌ শক্যৌ দুরাধর্ষৌ বিজেতুমজিতৌ যুধি
অপি সর্বেষু লোকেষু পুরাণাবৃষিসত্তমৌ
219.17
পূজনীয়তমাবেতাবপি সর্বৈঃ সুরাসুরৈঃ
সয়ক্ষরক্ষোগন্ধর্বনরকিংনরপন্নগৈঃ
219.18
তস্মাদিতঃ সুরৈঃ সার্ধং গন্তুমর্হসি বাসব
দিষ্টং চাপ্যনুপশ্যৈতত্খাণ্ডবস্য বিনাশনম্
219.19
ইতি বাচমভিশ্রুত্য তথ্যমিত্যমরেশ্বরঃ
কোপামর্ষৌ সমুত্সৃজ্য সংপ্রতস্থে দিবং তদা
219.20
তং প্রস্থিতং মহাত্মানং সমবেক্ষ্য দিবৌকসঃ
ত্বরিতাঃ সহিতা রাজন্ননুজগ্মুঃ শতক্রতুম্
219.21
দেবরাজং তদা যান্তং সহ দেবৈরুদীক্ষ্য তু
বাসুদেবার্জুনৌ বীরৌ সিংহনাদং বিনেদতুঃ
219.22
দেবরাজে গতে রাজন্প্রহৃষ্টৌ কৃষ্ণপাণ্ডবৌ
নির্বিশঙ্কং পুনর্দাবং দাহয়ামাসতুস্তদা
219.23
স মারুত ইবাভ্রাণি নাশয়িত্বার্জুনঃ সুরান্
ব্যধমচ্ছরসংপাতৈঃ প্রাণিনঃ খাণ্ডবালয়ান্
219.24
ন চ স্ম কিংচিচ্ছক্নোতি ভূতং নিশ্চরিতুং ততঃ
সংছিদ্যমানমিষুভিরস্যতা সব্যসাচিনা
219.25
নাশকংস্তত্র ভূতানি মহান্ত্যপি রণেঽর্জুনম্
নিরীক্ষিতুমমোঘেষুং করিষ্যন্তি কুতো রণম্
219.26
শতেনৈকং চ বিব্যাধ শতং চৈকেন পত্রিণা
ব্যসবস্তেঽপতন্নগ্নৌ সাক্ষাত্কালহতা ইব
219.27
ন চালভন্ত তে শর্ম রোধঃসু বিষমেষু চ
পিতৃদেবনিবাসেষু সংতাপশ্চাপ্যজায়ত
219.28
ভূতসংঘসহস্রাশ্চ দীনাশ্চক্রুর্মহাস্বনম্
রুরুবুর্বারণাশ্চৈব তথৈব মৃগপক্ষিণঃ
তেন শব্দেন বিত্রেসুর্গঙ্গোদধিচরা ঝষাঃ
219.29
ন হ্যর্জুনং মহাবাহুং নাপি কৃষ্ণং মহাবলম্
নিরীক্ষিতুং বৈ শক্নোতি কশ্চিদ্যোদ্ধুং কুতঃ পুনঃ
219.30
একায়নগতা যেঽপি নিষ্পতন্ত্যত্র কেচন
রাক্ষসান্দানবান্নাগাঞ্জঘ্নে চক্রেণ তান্হরিঃ
219.31
তে বিভিন্নশিরোদেহাশ্চক্রবেগাদ্গতাসবঃ
পেতুরাস্যে মহাকায়া দীপ্তস্য বসুরেতসঃ
219.32
স মাংসরুধিরৌঘৈশ্চ মেদৌঘৈশ্চ সমীরিতঃ
উপর্যাকাশগো বহ্নির্বিধূমঃ সমদৃশ্যত
219.33
দীপ্তাক্ষো দীপ্তজিহ্বশ্চ দীপ্তব্যাত্তমহাননঃ
দীপ্তোর্ধ্বকেশঃ পিঙ্গাক্ষঃ পিবন্প্রাণভৃতাং বসাম্
219.34
তাং স কৃষ্ণার্জুনকৃতাং সুধাং প্রাপ্য হুতাশনঃ
বভূব মুদিতস্তৃপ্তঃ পরাং নির্বৃতিমাগতঃ
219.35
অথাসুরং ময়ং নাম তক্ষকস্য নিবেশনাৎ
বিপ্রদ্রবন্তং সহসা দদর্শ মধুসূদনঃ
219.36
তমগ্নিঃ প্রার্থয়ামাস দিধক্ষুর্বাতসারথিঃ
দেহবান্বৈ জটী ভূত্বা নদংশ্চ জলদো যথা
জিঘাংসুর্বাসুদেবশ্চ চক্রমুদ্যম্য বিষ্ঠিতঃ
219.37
স চক্রমুদ্যতং দৃষ্ট্বা দিধক্ষুং চ হুতাশনম্
অভিধাবার্জুনেত্যেবং ময়শ্চুক্রোশ ভারত
219.38
তস্য ভীতস্বনং শ্রুত্বা মা ভৈরিতি ধনংজয়ঃ
প্রত্যুবাচ ময়ং পার্থো জীবয়ন্নিব ভারত
219.39
তং পার্থেনাভয়ে দত্তে নমুচের্ভ্রাতরং ময়ম্
ন হন্তুমৈচ্ছদ্দাশার্হঃ পাবকো ন দদাহ চ
219.40
তস্মিন্বনে দহ্যমানে ষডগ্নির্ন দদাহ চ
অশ্বসেনং ময়ং চাপি চতুরঃ শার্ঙ্গকানিতি