Utshovঅধ্যায় 220
220.1
জনমেজয় উবাচ
কিমর্থং শার্ঙ্গকানগ্নির্ন দদাহ তথাগতে
তস্মিন্বনে দহ্যমানে ব্রহ্মন্নেতদ্বদাশু মে
220.2
অদাহে হ্যশ্বসেনস্য দানবস্য ময়স্য চ
কারণং কীর্তিতং ব্রহ্মঞ্শার্ঙ্গকানাং ন কীর্তিতম্
220.3
তদেতদদ্ভুতং ব্রহ্মঞ্শার্ঙ্গানামবিনাশনম্
কীর্তয়স্বাগ্নিসংমর্দে কথং তে ন বিনাশিতাঃ
220.4
বৈশংপায়ন উবাচ
যদর্থং শার্ঙ্গকানগ্নির্ন দদাহ তথাগতে
তত্তে সর্বং যথাবৃত্তং কথয়িষ্যামি ভারত
220.5
ধর্মজ্ঞানাং মুখ্যতমস্তপস্বী সংশিতব্রতঃ
আসীন্মহর্ষিঃ শ্রুতবান্মন্দপাল ইতি শ্রুতঃ
220.6
স মার্গমাস্থিতো রাজন্নৃষীণামূর্ধ্বরেতসাম্
স্বাধ্যায়বান্ধর্মরতস্তপস্বী বিজিতেন্দ্রিয়ঃ
220.7
স গত্বা তপসঃ পারং দেহমুত্সৃজ্য ভারত
জগাম পিতৃলোকায় ন লেভে তত্র তত্ফলম্
220.8
স লোকানফলান্দৃষ্ট্বা তপসা নির্জিতানপি
পপ্রচ্ছ ধর্মরাজস্য সমীপস্থান্দিবৌকসঃ
220.9
কিমর্থমাবৃতা লোকা মমৈতে তপসার্জিতাঃ
কিং ময়া ন কৃতং তত্র যস্যেদং কর্মণঃ ফলম্
220.10
তত্রাহং তত্করিষ্যামি যদর্থমিদমাবৃতম্
ফলমেতস্য তপসঃ কথয়ধ্বং দিবৌকসঃ
220.11
দেবা ঊচুঃ
ঋণিনো মানবা ব্রহ্মঞ্জায়ন্তে যেন তচ্ছৃণু
ক্রিয়াভির্ব্রহ্মচর্যেণ প্রজয়া চ ন সংশয়ঃ
220.12
তদপাক্রিয়তে সর্বং যজ্ঞেন তপসা সুতৈঃ
তপস্বী যজ্ঞকৃচ্চাসি ন তু তে বিদ্যতে প্রজা
220.13
ত ইমে প্রসবস্যার্থে তব লোকাঃ সমাবৃতাঃ
প্রজায়স্ব ততো লোকানুপভোক্তাসি শাশ্বতান্
220.14
পুন্নাম্নো নরকাত্পুত্রস্ত্রাতীতি পিতরং মুনে
তস্মাদপত্যসংতানে যতস্ব দ্বিজসত্তম
220.15
বৈশংপায়ন উবাচ
তচ্ছ্রুত্বা মন্দপালস্তু তেষাং বাক্যং দিবৌকসাম্
ক্ব নু শীঘ্রমপত্যং স্যাদ্বহুলং চেত্যচিন্তয়ৎ
220.16
স চিন্তয়ন্নভ্যগচ্ছদ্বহুলপ্রসবান্খগান্
শার্ঙ্গিকাং শার্ঙ্গকো ভূত্বা জরিতাং সমুপেয়িবান্
220.17
তস্যাং পুত্রানজনয়চ্চতুরো ব্রহ্মবাদিনঃ
তানপাস্য স তত্রৈব জগাম লপিতাং প্রতি
বালান্সুতানণ্ডগতান্মাত্রা সহ মুনির্বনে
220.18
তস্মিন্গতে মহাভাগে লপিতাং প্রতি ভারত
অপত্যস্নেহসংবিগ্না জরিতা বহ্বচিন্তয়ৎ
220.19
তেন ত্যক্তানসংত্যাজ্যানৃষীনণ্ডগতান্বনে
নাজহত্পুত্রকানার্তা জরিতা খাণ্ডবে নৃপ
বভার চৈতান্সংজাতান্স্ববৃত্ত্যা স্নেহবিক্লবা
220.20
ততোঽগ্নিং খাণ্ডবং দগ্ধুমায়ান্তং দৃষ্টবানৃষিঃ
মন্দপালশ্চরংস্তস্মিন্বনে লপিতয়া সহ
220.21
তং সংকল্পং বিদিত্বাস্য জ্ঞাত্বা পুত্রাংশ্চ বালকান্
সোঽভিতুষ্টাব বিপ্রর্ষির্ব্রাহ্মণো জাতবেদসম্
পুত্রান্পরিদদদ্ভীতো লোকপালং মহৌজসম্
220.22
মন্দপাল উবাচ
ত্বমগ্নে সর্বদেবানাং মুখং ত্বমসি হব্যবাট্
ত্বমন্তঃ সর্বভূতানাং গূঢশ্চরসি পাবক
220.23
ত্বামেকমাহুঃ কবয়স্ত্বামাহুস্ত্রিবিধং পুনঃ
ত্বামষ্টধা কল্পয়িত্বা যজ্ঞবাহমকল্পয়ন্
220.24
ত্বয়া সৃষ্টমিদং বিশ্বং বদন্তি পরমর্ষয়ঃ
ত্বদৃতে হি জগত্কৃত্স্নং সদ্যো ন স্যাদ্ধুতাশন
220.25
তুভ্যং কৃত্বা নমো বিপ্রাঃ স্বকর্মবিজিতাং গতিম্
গচ্ছন্তি সহ পত্নীভিঃ সুতৈরপি চ শাশ্বতীম্
220.26
ত্বামগ্নে জলদানাহুঃ খে বিষক্তান্সবিদ্যুতঃ
দহন্তি সর্বভূতানি ত্বত্তো নিষ্ক্রম্য হায়নাঃ
220.27
জাতবেদস্তবৈবেয়ং বিশ্বসৃষ্টির্মহাদ্যুতে
তবৈব কর্ম বিহিতং ভূতং সর্বং চরাচরম্
220.28
ত্বয়াপো বিহিতাঃ পূর্বং ত্বয়ি সর্বমিদং জগৎ
ত্বয়ি হব্যং চ কব্যং চ যথাবত্সংপ্রতিষ্ঠিতম্
220.29
অগ্নে ত্বমেব জ্বলনস্ত্বং ধাতা ত্বং বৃহস্পতিঃ
ত্বমশ্বিনৌ যমৌ মিত্রঃ সোমস্ত্বমসি চানিলঃ
220.30
বৈশংপায়ন উবাচ
এবং স্তুতস্ততস্তেন মন্দপালেন পাবকঃ
তুতোষ তস্য নৃপতে মুনেরমিততেজসঃ
উবাচ চৈনং প্রীতাত্মা কিমিষ্টং করবাণি তে
220.31
তমব্রবীন্মন্দপালঃ প্রাঞ্জলির্হব্যবাহনম্
প্রদহন্খাণ্ডবং দাবং মম পুত্রান্বিসর্জয়
220.32
তথেতি তত্প্রতিশ্রুত্য ভগবান্হব্যবাহনঃ
খাণ্ডবে তেন কালেন প্রজজ্বাল দিধক্ষয়া