অধ্যায় 221

221.1

বৈশংপায়ন উবাচ
ততঃ প্রজ্বলিতে শুক্রে শার্ঙ্গকাস্তে সুদুঃখিতাঃ
ব্যথিতাঃ পরমোদ্বিগ্না নাধিজগ্মুঃ পরায়ণম্

নিশাম্য পুত্রকান্বালান্মাতা তেষাং তপস্বিনী
জরিতা দুঃখসংতপ্তা বিললাপ নরেশ্বর

অয়মগ্নির্দহন্কক্ষমিত আয়াতি ভীষণঃ
জগত্সংদীপয়ন্ভীমো মম দুঃখবিবর্ধনঃ

ইমে চ মাং কর্ষয়ন্তি শিশবো মন্দচেতসঃ
অবর্হাশ্চরণৈর্হীনাঃ পূর্বেষাং নঃ পরায়ণম্
ত্রাসয়ংশ্চায়মায়াতি লেলিহানো মহীরুহান্

অশক্তিমত্ত্বাচ্চ সুতা ন শক্তাঃ সরণে মম
আদায় চ ন শক্তাস্মি পুত্রান্সরিতুমন্যতঃ

ন চ ত্যক্তুমহং শক্তা হৃদয়ং দূয়তীব মে
কং নু জহ্যামহং পুত্রং কমাদায় ব্রজাম্যহম্

কিং নু মে স্যাত্কৃতং কৃত্বা মন্যধ্বং পুত্রকাঃ কথম্
চিন্তয়ানা বিমোক্ষং বো নাধিগচ্ছামি কিংচন
ছাদয়িত্বা চ বো গাত্রৈঃ করিষ্যে মরণং সহ

জরিতারৌ কুলং হীদং জ্যেষ্ঠত্বেন প্রতিষ্ঠিতম্
সারিসৃক্বঃ প্রজায়েত পিতৄণাং কুলবর্ধনঃ

স্তম্বমিত্রস্তপঃ কুর্যাদ্দ্রোণো ব্রহ্মবিদুত্তমঃ
ইত্যেবমুক্ত্বা প্রয়য়ৌ পিতা বো নির্ঘৃণঃ পুরা

কমুপাদায় শক্যেত গন্তুং কস্যাপদুত্তমা
কিং নু কৃত্বা কৃতং কার্যং ভবেদিতি চ বিহ্বলা

নাপশ্যত্স্বধিয়া মোক্ষং স্বসুতানাং তদানলাৎ
এবং ব্রুবন্তীং শার্ঙ্গাস্তে প্রত্যূচুরথ মাতরম্

স্নেহমুত্সৃজ্য মাতস্ত্বং পত যত্র ন হব্যবাট্
অস্মাসু হি বিনষ্টেষু ভবিতারঃ সুতাস্তব
ত্বয়ি মাতর্বিনষ্টায়াং ন নঃ স্যাত্কুলসংততিঃ

অন্ববেক্ষ্যৈতদুভয়ং ক্ষমং স্যাদ্যত্কুলস্য নঃ
তদ্বৈ কর্তুং পরঃ কালো মাতরেষ ভবেত্তব

মা বৈ কুলবিনাশায় স্নেহং কার্ষীঃ সুতেষু নঃ
ন হীদং কর্ম মোঘং স্যাল্লোককামস্য নঃ পিতুঃ

জরিতোবাচ
ইদমাখোর্বিলং ভূমৌ বৃক্ষস্যাস্য সমীপতঃ
তদাবিশধ্বং ত্বরিতা বহ্নেরত্র ন বো ভয়ম্

ততোঽহং পাংসুনা ছিদ্রমপিধাস্যামি পুত্রকাঃ
এবং প্রতিকৃতং মন্যে জ্বলতঃ কৃষ্ণবর্ত্মনঃ

তত এষ্যাম্যতীতেঽগ্নৌ বিহর্তুং পাংসুসংচয়ম্
রোচতামেষ বোপায়ো বিমোক্ষায় হুতাশনাৎ

শার্ঙ্গকা ঊচুঃ
অবর্হান্মাংসভূতান্নঃ ক্রব্যাদাখুর্বিনাশয়েৎ
পশ্যমানা ভয়মিদং ন শক্ষ্যামো নিষেবিতুম্

কথমগ্নির্ন নো দহ্যাত্কথমাখুর্ন ভক্ষয়েৎ
কথং ন স্যাত্পিতা মোঘঃ কথং মাতা ধ্রিয়েত নঃ

বিল আখোর্বিনাশঃ স্যাদগ্নেরাকাশচারিণাম্
অন্ববেক্ষ্যৈতদুভয়ং শ্রেয়ান্দাহো ন ভক্ষণম্

গর্হিতং মরণং নঃ স্যাদাখুনা খাদতা বিলে
শিষ্টাদিষ্টঃ পরিত্যাগঃ শরীরস্য হুতাশনাৎ