অধ্যায় 222

222.1

জরিতোবাচ
অস্মাদ্বিলান্নিষ্পতিতং শ্যেন আখুং জহার তম্
ক্ষুদ্রং গৃহীত্বা পাদাভ্যাং ভয়ং ন ভবিতা ততঃ

শার্ঙ্গকা ঊচুঃ
ন হৃতং তং বয়ং বিদ্মঃ শ্যেনেনাখুং কথংচন
অন্যেঽপি ভবিতারোঽত্র তেভ্যোঽপি ভয়মেব নঃ

সংশয়ো হ্যগ্নিরাগচ্ছেদ্দৃষ্টং বায়োর্নিবর্তনম্
মৃত্যুর্নো বিলবাসিভ্যো ভবেন্মাতরসংশয়ম্

নিঃসংশয়াত্সংশয়িতো মৃত্যুর্মাতর্বিশিষ্যতে
চর খে ত্বং যথান্যায়ং পুত্রান্বেত্স্যসি শোভনান্

জরিতোবাচ
অহং বৈ শ্যেনমায়ান্তমদ্রাক্ষং বিলমন্তিকাৎ
সংচরন্তং সমাদায় জহারাখুং বিলাদ্বলী

তং পতন্তমহং শ্যেনং ত্বরিতা পৃষ্ঠতোঽন্বগাম্
আশিষোঽস্য প্রয়ুঞ্জানা হরতো মূষকং বিলাৎ

যো নো দ্বেষ্টারমাদায় শ্যেনরাজ প্রধাবসি
ভব ত্বং দিবমাস্থায় নিরমিত্রো হিরণ্ময়ঃ

যদা স ভক্ষিতস্তেন ক্ষুধিতেন পতত্রিণা
তদাহং তমনুজ্ঞাপ্য প্রত্যুপায়াং গৃহান্প্রতি

প্রবিশধ্বং বিলং পুত্রা বিশ্রব্ধা নাস্তি বো ভয়ম্
শ্যেনেন মম পশ্যন্ত্যা হৃত আখুর্ন সংশয়ঃ

শার্ঙ্গকা ঊচুঃ
ন বিদ্ম বৈ বয়ং মাতর্হৃতমাখুমিতঃ পুরা
অবিজ্ঞায় ন শক্ষ্যামো বিলমাবিশতুং বয়ম্

জরিতোবাচ
অহং হি তং প্রজানামি হৃতং শ্যেনেন মূষকম্
অত এব ভয়ং নাস্তি ক্রিয়তাং বচনং মম

শার্ঙ্গকা ঊচুঃ
ন ত্বং মিথ্যোপচারেণ মোক্ষয়েথা ভয়ং মহৎ
সমাকুলেষু জ্ঞানেষু ন বুদ্ধিকৃতমেব তৎ

ন চোপকৃতমস্মাভির্ন চাস্মান্বেত্থ যে বয়ম্
পীড্যমানা ভরস্যস্মান্কা সতী কে বয়ং তব

তরুণী দর্শনীয়াসি সমর্থা ভর্তুরেষণে
অনুগচ্ছ স্বভর্তারং পুত্রানাপ্স্যসি শোভনান্

বয়মপ্যগ্নিমাবিশ্য লোকান্প্রাপ্স্যামহে শুভান্
অথাস্মান্ন দহেদগ্নিরায়াস্ত্বং পুনরেব নঃ

বৈশংপায়ন উবাচ
এবমুক্তা ততঃ শার্ঙ্গী পুত্রানুত্সৃজ্য খাণ্ডবে
জগাম ত্বরিতা দেশং ক্ষেমমগ্নেরনাশ্রয়ম্

ততস্তীক্ষ্ণার্চিরভ্যাগাজ্জ্বলিতো হব্যবাহনঃ
যত্র শার্ঙ্গা বভূবুস্তে মন্দপালস্য পুত্রকাঃ

তে শার্ঙ্গা জ্বলনং দৃষ্ট্বা জ্বলিতং স্বেন তেজসা
জরিতারিস্ততো বাচং শ্রাবয়ামাস পাবকম্