Utshovঅধ্যায় 223
223.1
জরিতারিরুবাচ
পুরতঃ কৃচ্ছ্রকালস্য ধীমাঞ্জাগর্তি পূরুষঃ
স কৃচ্ছ্রকালং সংপ্রাপ্য ব্যথাং নৈবৈতি কর্হিচিৎ
223.2
যস্তু কৃচ্ছ্রমসংপ্রাপ্তং বিচেতা নাববুধ্যতে
স কৃচ্ছ্রকালে ব্যথিতো ন প্রজানাতি কিংচন
223.3
সারিসৃক্ব উবাচ
ধীরস্ত্বমসি মেধাবী প্রাণকৃচ্ছ্রমিদং চ নঃ
শূরঃ প্রাজ্ঞো বহূনাং হি ভবত্যেকো ন সংশয়ঃ
223.4
স্তম্বমিত্র উবাচ
জ্যেষ্ঠস্ত্রাতা ভবতি বৈ জ্যেষ্ঠো মুঞ্চতি কৃচ্ছ্রতঃ
জ্যেষ্ঠশ্চেন্ন প্রজানাতি কনীয়ান্কিং করিষ্যতি
223.5
দ্রোণ উবাচ
হিরণ্যরেতাস্ত্বরিতো জ্বলন্নায়াতি নঃ ক্ষয়ম্
সপ্তজিহ্বোঽনলঃ ক্ষামো লেলিহানোপসর্পতি
223.6
বৈশংপায়ন উবাচ
এবমুক্তো ভ্রাতৃভিস্তু জরিতারির্বিভাবসুম্
তুষ্টাব প্রাঞ্জলির্ভূত্বা যথা তচ্ছৃণু পার্থিব
223.7
জরিতারিরুবাচ
আত্মাসি বায়োঃ পবনঃ শরীরমুত বীরুধাম্
যোনিরাপশ্চ তে শুক্র যোনিস্ত্বমসি চাম্ভসঃ
223.8
ঊর্ধ্বং চাধশ্চ গচ্ছন্তি বিসর্পন্তি চ পার্শ্বতঃ
অর্চিষস্তে মহাবীর্য রশ্ময়ঃ সবিতুর্যথা
223.9
সারিসৃক্ব উবাচ
মাতা প্রপন্না পিতরং ন বিদ্মঃ; পক্ষাশ্চ নো ন প্রজাতাব্জকেতো
ন নস্ত্রাতা বিদ্যতেঽগ্নে ত্বদন্য;স্তস্মাদ্ধি নঃ পরিরক্ষৈকবীর
223.10
যদগ্নে তে শিবং রূপং যে চ তে সপ্ত হেতয়ঃ
তেন নঃ পরিরক্ষাদ্য ঈডিতঃ শরণৈষিণঃ
223.11
ত্বমেবৈকস্তপসে জাতবেদো; নান্যস্তপ্তা বিদ্যতে গোষু দেব
ঋষীনস্মান্বালকান্পালয়স্ব; পরেণাস্মান্প্রৈহি বৈ হব্যবাহ
223.12
স্তম্বমিত্র উবাচ
সর্বমগ্নে ত্বমেবৈকস্ত্বয়ি সর্বমিদং জগৎ
ত্বং ধারয়সি ভূতানি ভুবনং ত্বং বিভর্ষি চ
223.13
ত্বমগ্নির্হব্যবাহস্ত্বং ত্বমেব পরমং হবিঃ
মনীষিণস্ত্বাং যজন্তে বহুধা চৈকধৈব চ
223.14
সৃষ্ট্বা লোকাংস্ত্রীনিমান্হব্যবাহ; প্রাপ্তে কালে পচসি পুনঃ সমিদ্ধঃ
সর্বস্যাস্য ভুবনস্য প্রসূতি;স্ত্বমেবাগ্নে ভবসি পুনঃ প্রতিষ্ঠা
223.15
ত্বমন্নং প্রাণিনাং ভুক্তমন্তর্ভূতো জগত্পতে
নিত্যং প্রবৃদ্ধঃ পচসি ত্বয়ি সর্বং প্রতিষ্ঠিতম্
223.16
দ্রোণ উবাচ
সূর্যো ভূত্বা রশ্মিভির্জাতবেদো; ভূমেরম্ভো ভূমিজাতান্রসাংশ্চ
বিশ্বানাদায় পুনরুত্সর্গকালে; সৃষ্ট্বা বৃষ্ট্যা ভাবয়সীহ শুক্র
223.17
ত্বত্ত এতাঃ পুনঃ শুক্র বীরুধো হরিতচ্ছদাঃ
জায়ন্তে পুষ্করিণ্যশ্চ সমুদ্রশ্চ মহোদধিঃ
223.18
ইদং বৈ সদ্ম তিগ্মাংশো বরুণস্য পরায়ণম্
শিবস্ত্রাতা ভবাস্মাকং মাস্মানদ্য বিনাশয়
223.19
পিঙ্গাক্ষ লোহিতগ্রীব কৃষ্ণবর্ত্মন্হুতাশন
পরেণ প্রৈহি মুঞ্চাস্মান্সাগরস্য গৃহানিব
223.20
বৈশংপায়ন উবাচ
এবমুক্তো জাতবেদা দ্রোণেনাক্লিষ্টকর্মণা
দ্রোণমাহ প্রতীতাত্মা মন্দপালপ্রতিজ্ঞয়া
223.21
ঋষির্দ্রোণস্ত্বমসি বৈ ব্রহ্মৈতদ্ব্যাহৃতং ত্বয়া
ঈপ্সিতং তে করিষ্যামি ন চ তে বিদ্যতে ভয়ম্
223.22
মন্দপালেন যূয়ং হি মম পূর্বং নিবেদিতাঃ
বর্জয়েঃ পুত্রকান্মহ্যং দহন্দাবমিতি স্ম হ
223.23
যচ্চ তদ্বচনং তস্য ত্বয়া যচ্চেহ ভাষিতম্
উভয়ং মে গরীয়স্তদ্ব্রূহি কিং করবাণি তে
ভৃশং প্রীতোঽস্মি ভদ্রং তে ব্রহ্মন্স্তোত্রেণ তে বিভো
223.24
দ্রোণ উবাচ
ইমে মার্জারকাঃ শুক্র নিত্যমুদ্বেজয়ন্তি নঃ
এতান্কুরুষ্ব দংষ্ট্রাসু হব্যবাহ সবান্ধবান্
223.25
বৈশংপায়ন উবাচ
তথা তত্কৃতবান্বহ্নিরভ্যনুজ্ঞায় শার্ঙ্গকান্
দদাহ খাণ্ডবং চৈব সমিদ্ধো জনমেজয়