Utshovঅধ্যায় 224
224.1
বৈশংপায়ন উবাচ
মন্দপালোঽপি কৌরব্য চিন্তয়ানঃ সুতাংস্তদা
উক্তবানপ্যশীতাংশুং নৈব স স্ম ন তপ্যতে
224.2
স তপ্যমানঃ পুত্রার্থে লপিতামিদমব্রবীৎ
কথং ন্বশক্তাঃ প্লবনে লপিতে মম পুত্রকাঃ
224.3
বর্ধমানে হুতবহে বাতে শীঘ্রং প্রবায়তি
অসমর্থা বিমোক্ষায় ভবিষ্যন্তি মমাত্মজাঃ
224.4
কথং ন্বশক্তা ত্রাণায় মাতা তেষাং তপস্বিনী
ভবিষ্যত্যসুখাবিষ্টা পুত্রত্রাণমপশ্যতী
224.5
কথং নু সরণেঽশক্তান্পতনে চ মমাত্মজান্
সংতপ্যমানা অভিতো বাশমানাভিধাবতী
224.6
জরিতারিঃ কথং পুত্রঃ সারিসৃক্বঃ কথং চ মে
স্তম্বমিত্রঃ কথং দ্রোণঃ কথং সা চ তপস্বিনী
224.7
লালপ্যমানং তমৃষিং মন্দপালং তথা বনে
লপিতা প্রত্যুবাচেদং সাসূয়মিব ভারত
224.8
ন তে সুতেষ্ববেক্ষাস্তি তানৃষীনুক্তবানসি
তেজস্বিনো বীর্যবন্তো ন তেষাং জ্বলনাদ্ভয়ম্
224.9
তথাগ্নৌ তে পরীত্তাশ্চ ত্বয়া হি মম সংনিধৌ
প্রতিশ্রুতং তথা চেতি জ্বলনেন মহাত্মনা
224.10
লোকপালোঽনৃতাং বাচং ন তু বক্তা কথংচন
সমর্থাস্তে চ বক্তারো ন তে তেষ্বস্তি মানসম্
224.11
তামেব তু মমামিত্রীং চিন্তয়ন্পরিতপ্যসে
ধ্রুবং ময়ি ন তে স্নেহো যথা তস্যাং পুরাভবৎ
224.12
ন হি পক্ষবতা ন্যায্যং নিঃস্নেহেন সুহৃজ্জনে
পীড্যমান উপদ্রষ্টুং শক্তেনাত্মা কথংচন
224.13
গচ্ছ ত্বং জরিতামেব যদর্থং পরিতপ্যসে
চরিষ্যাম্যহমপ্যেকা যথা কাপুরুষে তথা
224.14
মন্দপাল উবাচ
নাহমেবং চরে লোকে যথা ত্বমভিমন্যসে
অপত্যহেতোর্বিচরে তচ্চ কৃচ্ছ্রগতং মম
224.15
ভূতং হিত্বা ভবিষ্যেঽর্থে যোঽবলম্বেত মন্দধীঃ
অবমন্যেত তং লোকো যথেচ্ছসি তথা কুরু
224.16
এষ হি জ্বলমানোঽগ্নির্লেলিহানো মহীরুহান্
দ্বেষ্যং হি হৃদি সংতাপং জনয়ত্যশিবং মম
224.17
বৈশংপায়ন উবাচ
তস্মাদ্দেশাদতিক্রান্তে জ্বলনে জরিতা ততঃ
জগাম পুত্রকানেব ত্বরিতা পুত্রগৃদ্ধিনী
224.18
সা তান্কুশলিনঃ সর্বান্নির্মুক্তাঞ্জাতবেদসঃ
রোরূয়মাণা কৃপণা সুতান্দৃষ্টবতী বনে
224.19
অশ্রদ্ধেয়তমং তেষাং দর্শনং সা পুনঃ পুনঃ
একৈকশশ্চ তান্পুত্রান্ক্রোশমানান্বপদ্যত
224.20
ততোঽভ্যগচ্ছত্সহসা মন্দপালোঽপি ভারত
অথ তে সর্ব এবৈনং নাভ্যনন্দন্ত বৈ সুতাঃ
224.21
লালপ্যমানমেকৈকং জরিতাং চ পুনঃ পুনঃ
নোচুস্তে বচনং কিংচিত্তমৃষিং সাধ্বসাধু বা
224.22
মন্দপাল উবাচ
জ্যেষ্ঠঃ সুতস্তে কতমঃ কতমস্তদনন্তরঃ
মধ্যমঃ কতমঃ পুত্রঃ কনিষ্ঠঃ কতমশ্চ তে
224.23
এবং ব্রুবন্তং দুঃখার্তং কিং মাং ন প্রতিভাষসে
কৃতবানস্মি হব্যাশে নৈব শান্তিমিতো লভে
224.24
জরিতোবাচ
কিং তে জ্যেষ্ঠে সুতে কার্যং কিমনন্তরজেন বা
কিং চ তে মধ্যমে কার্যং কিং কনিষ্ঠে তপস্বিনি
224.25
যস্ত্বং মাং সর্বশো হীনামুত্সৃজ্যাসি গতঃ পুরা
তামেব লপিতাং গচ্ছ তরুণীং চারুহাসিনীম্
224.26
মন্দপাল উবাচ
ন স্ত্রীণাং বিদ্যতে কিংচিদন্যত্র পুরুষান্তরাৎ
সাপত্নকমৃতে লোকে ভবিতব্যং হি তত্তথা
224.27
সুব্রতাপি হি কল্যাণী সর্বলোকপরিশ্রুতা
অরুন্ধতী পর্যশঙ্কদ্বসিষ্ঠমৃষিসত্তমম্
224.28
বিশুদ্ধভাবমত্যন্তং সদা প্রিয়হিতে রতম্
সপ্তর্ষিমধ্যগং বীরমবমেনে চ তং মুনিম্
224.29
অপধ্যানেন সা তেন ধূমারুণসমপ্রভা
লক্ষ্যালক্ষ্যা নাভিরূপা নিমিত্তমিব লক্ষ্যতে
224.30
অপত্যহেতোঃ সংপ্রাপ্তং তথা ত্বমপি মামিহ
ইষ্টমেবংগতে হিত্বা সা তথৈব চ বর্তসে
224.31
নৈব ভার্যেতি বিশ্বাসঃ কার্যঃ পুংসা কথংচন
ন হি কার্যমনুধ্যাতি ভার্যা পুত্রবতী সতী
224.32
বৈশংপায়ন উবাচ
ততস্তে সর্ব এবৈনং পুত্রাঃ সম্যগুপাসিরে
স চ তানাত্মজান্রাজন্নাশ্বাসয়িতুমারভৎ