অধ্যায় 225

225.1

মন্দপাল উবাচ
যুষ্মাকং পরিরক্ষার্থং বিজ্ঞপ্তো জ্বলনো ময়া
অগ্নিনা চ তথেত্যেবং পূর্বমেব প্রতিশ্রুতম্

অগ্নের্বচনমাজ্ঞায় মাতুর্ধর্মজ্ঞতাং চ বঃ
যুষ্মাকং চ পরং বীর্যং নাহং পূর্বমিহাগতঃ

ন সংতাপো হি বঃ কার্যঃ পুত্রকা মরণং প্রতি
ঋষীন্বেদ হুতাশোঽপি ব্রহ্ম তদ্বিদিতং চ বঃ

বৈশংপায়ন উবাচ
এবমাশ্বাস্য পুত্রান্স ভার্যাং চাদায় ভারত
মন্দপালস্ততো দেশাদন্যং দেশং জগাম হ

ভগবানপি তিগ্মাংশুঃ সমিদ্ধং খাণ্ডবং বনম্
দদাহ সহ কৃষ্ণাভ্যাং জনয়ঞ্জগতোঽভয়ম্

বসামেদোবহাঃ কুল্যাস্তত্র পীত্বা চ পাবকঃ
অগচ্ছত্পরমাং তৃপ্তিং দর্শয়ামাস চার্জুনম্

ততোঽন্তরিক্ষাদ্ভগবানবতীর্য সুরেশ্বরঃ
মরুদ্গণবৃতঃ পার্থং মাধবং চাব্রবীদিদম্

কৃতং যুবাভ্যাং কর্মেদমমরৈরপি দুষ্করম্
বরান্বৃণীতং তুষ্টোঽস্মি দুর্লভানপ্যমানুষান্

পার্থস্তু বরয়ামাস শক্রাদস্ত্রাণি সর্বশঃ
গ্রহীতুং তচ্চ শক্রোঽস্য তদা কালং চকার হ

যদা প্রসন্নো ভগবান্মহাদেবো ভবিষ্যতি
তুভ্যং তদা প্রদাস্যামি পাণ্ডবাস্ত্রাণি সর্বশঃ

অহমেব চ তং কালং বেত্স্যামি কুরুনন্দন
তপসা মহতা চাপি দাস্যামি তব তান্যহম্

আগ্নেয়ানি চ সর্বাণি বায়ব্যানি তথৈব চ
মদীয়ানি চ সর্বাণি গ্রহীষ্যসি ধনংজয়

বাসুদেবোঽপি জগ্রাহ প্রীতিং পার্থেন শাশ্বতীম্
দদৌ চ তস্মৈ দেবেন্দ্রস্তং বরং প্রীতিমাংস্তদা

দত্ত্বা তাভ্যাং বরং প্রীতঃ সহ দেবৈর্মরুত্পতিঃ
হুতাশনমনুজ্ঞাপ্য জগাম ত্রিদিবং পুনঃ

পাবকশ্চাপি তং দাবং দগ্ধ্বা সমৃগপক্ষিণম্
অহানি পঞ্চ চৈকং চ বিররাম সুতর্পিতঃ

জগ্ধ্বা মাংসানি পীত্বা চ মেদাংসি রুধিরাণি চ
যুক্তঃ পরময়া প্রীত্যা তাবুবাচ বিশাং পতে

যুবাভ্যাং পুরুষাগ্র্যাভ্যাং তর্পিতোঽস্মি যথাসুখম্
অনুজানামি বাং বীরৌ চরতং যত্র বাঞ্ছিতম্

এবং তৌ সমনুজ্ঞাতৌ পাবকেন মহাত্মনা
অর্জুনো বাসুদেবশ্চ দানবশ্চ ময়স্তথা

পরিক্রম্য ততঃ সর্বে ত্রয়োঽপি ভরতর্ষভ
রমণীয়ে নদীকূলে সহিতাঃ সমুপাবিশন্