UtshovChapter 225
225.1
मन्दपाल उवाच
युष्माकं परिरक्षार्थं विज्ञप्तो ज्वलनो मया
अग्निना च तथेत्येवं पूर्वमेव प्रतिश्रुतम्
Mandapala uvacha
Yushmakam parirakshartham vigyapto jvalano maya
Agnina cha tathetyevam purvameva pratishrutam
225.2
अग्नेर्वचनमाज्ञाय मातुर्धर्मज्ञतां च वः
युष्माकं च परं वीर्यं नाहं पूर्वमिहागतः
Agnervachanamagyaya maturdharmagyatam cha vah
Yushmakam cha param viryam naham purvamihagatah
225.3
न संतापो हि वः कार्यः पुत्रका मरणं प्रति
ऋषीन्वेद हुताशोऽपि ब्रह्म तद्विदितं च वः
Na santapo hi vah karyah putraka maranam prati
Rishinveda hutashopi brahma tadviditam cha vah
225.4
वैशंपायन उवाच
एवमाश्वास्य पुत्रान्स भार्यां चादाय भारत
मन्दपालस्ततो देशादन्यं देशं जगाम ह
Vaishampayana uvacha
Evamashvasya putransa bharyam chadaya bharata
Mandapalastato deshadanyam desham jagama ha
225.5
भगवानपि तिग्मांशुः समिद्धं खाण्डवं वनम्
ददाह सह कृष्णाभ्यां जनयञ्जगतोऽभयम्
Bhagavanapi tigmanshuh samiddham khandavam vanam
Dadaha saha krishnabhyam janayanjagatobhayam
225.6
वसामेदोवहाः कुल्यास्तत्र पीत्वा च पावकः
अगच्छत्परमां तृप्तिं दर्शयामास चार्जुनम्
Vasamedovahah kulyastatra pitva cha pavakah
Agachchhatparamam triptim darshayamasa charjunam
225.7
ततोऽन्तरिक्षाद्भगवानवतीर्य सुरेश्वरः
मरुद्गणवृतः पार्थं माधवं चाब्रवीदिदम्
Tatontarikshadbhagavanavatirya sureshvarah
Marudganavritah partham madhavam chabravididam
225.8
कृतं युवाभ्यां कर्मेदममरैरपि दुष्करम्
वरान्वृणीतं तुष्टोऽस्मि दुर्लभानप्यमानुषान्
Kritam yuvabhyam karmedamamarairapi dushkaram
Varanvrinitam tushtosmi durlabhanapyamanushan
225.9
पार्थस्तु वरयामास शक्रादस्त्राणि सर्वशः
ग्रहीतुं तच्च शक्रोऽस्य तदा कालं चकार ह
Parthastu varayamasa shakradastrani sarvashah
Grahitum tachcha shakrosya tada kalam chakara ha
225.10
यदा प्रसन्नो भगवान्महादेवो भविष्यति
तुभ्यं तदा प्रदास्यामि पाण्डवास्त्राणि सर्वशः
Yada prasanno bhagavanmahadevo bhavishyati
Tubhyam tada pradasyami pandavastrani sarvashah
225.11
अहमेव च तं कालं वेत्स्यामि कुरुनन्दन
तपसा महता चापि दास्यामि तव तान्यहम्
Ahameva cha tam kalam vetsyami kurunandana
Tapasa mahata chapi dasyami tava tanyaham
225.12
आग्नेयानि च सर्वाणि वायव्यानि तथैव च
मदीयानि च सर्वाणि ग्रहीष्यसि धनंजय
Agneyani cha sarvani vayavyani tathaiva cha
Madiyani cha sarvani grahishyasi dhananjaya
225.13
वासुदेवोऽपि जग्राह प्रीतिं पार्थेन शाश्वतीम्
ददौ च तस्मै देवेन्द्रस्तं वरं प्रीतिमांस्तदा
Vasudevopi jagraha pritim parthena shashvatim
Dadau cha tasmai devendrastam varam pritimanstada
225.14
दत्त्वा ताभ्यां वरं प्रीतः सह देवैर्मरुत्पतिः
हुताशनमनुज्ञाप्य जगाम त्रिदिवं पुनः
Dattva tabhyam varam pritah saha devairmarutpatih
Hutashanamanugyapya jagama tridivam punah
225.15
पावकश्चापि तं दावं दग्ध्वा समृगपक्षिणम्
अहानि पञ्च चैकं च विरराम सुतर्पितः
Pavakashchapi tam davam dagdhva samrigapakshinam
Ahani pancha chaikam cha virarama sutarpitah
225.16
जग्ध्वा मांसानि पीत्वा च मेदांसि रुधिराणि च
युक्तः परमया प्रीत्या तावुवाच विशां पते
Jagdhva mansani pitva cha medansi rudhirani cha
Yuktah paramaya pritya tavuvacha visham pate
225.17
युवाभ्यां पुरुषाग्र्याभ्यां तर्पितोऽस्मि यथासुखम्
अनुजानामि वां वीरौ चरतं यत्र वाञ्छितम्
Yuvabhyam purushagryabhyam tarpitosmi yathasukham
Anujanami vam virau charatam yatra vanchhitam
225.18
एवं तौ समनुज्ञातौ पावकेन महात्मना
अर्जुनो वासुदेवश्च दानवश्च मयस्तथा
Evam tau samanugyatau pavakena mahatmana
Arjuno vasudevashcha danavashcha mayastatha
225.19
परिक्रम्य ततः सर्वे त्रयोऽपि भरतर्षभ
रमणीये नदीकूले सहिताः समुपाविशन्
Parikramya tatah sarve trayopi bharatarshabha
Ramaniye nadikule sahitah samupavishan