অধ্যায় 35

35.1

অপেতো যন্তু পণয়োঽসুম্না দেবপীয়বঃ । অস্য লোকঃ সুতাবতঃ ।
দ্যুভিরহোভিরক্তুভির্ব্যক্তং যমো দদাত্ববসানমস্মৈ ॥১॥

সবিতা তে শরীরেভ্যঃ পৃথিব্যাঁল্লোকমিচ্ছতু । তস্মৈ যুজ্যন্তামুস্রিয়াঃ ॥২॥

বায়ুঃ পুনাতু সবিতা পুনাত্বগ্নের্ভ্রাজসা সূর্যস্য বর্চসা । বি মুচ্যন্তামুস্রিয়াঃ ॥৩॥

অশ্বত্থে বো নিষদনং পর্ণে বো বসতিষ্কৃতা ।
গোভাজ ইত্কিলাসথ যত্সনবথ পূরুষম্ ॥৪॥

সবিতা তে শরীরাণি মাতুরুপস্থ আ বপতু । তস্মৈ পৃথিবি শং ভব ॥৫॥

প্রজাপতৌ ত্বা দেবতায়ামুপোদকে লোকে নি দধাম্যসৌ । অপ নঃ শোশুচদঘম্ ॥৬॥

পরং মৃত্যো অনু পরেহি পন্থাং যস্তে অন্য ইতরো দেবয়ানাৎ ।
চক্ষুষ্মতে শৃণ্বতে তে ব্রবীমি মা নঃ প্রজাং রীরিষো মোত বীরান্ ॥৭॥

শং বাতঃ শং হি তে ঘৃণিঃ শং তে ভবন্ত্বিষ্টকাঃ ।
শং তে ভবন্ত্বগ্নয়ঃ পার্থিবাসো মা ত্বাঽভি শূশুচন্ ॥৮॥

কল্পন্তাং তে দিশস্তুভ্যমাপঃ শিবতমাস্তুভ্যং ভবন্তু সিন্ধবঃ ।
অন্তরিক্ষং শিবং তুভ্যং কল্পন্তাং তে দিশঃ সর্বাঃ ॥৯॥

অশ্মন্বতী রীয়তে সং রভধ্বমুত্তিষ্ঠত প্র তরতা সখায়ঃ ।
অত্রা জহীমোঽশিবা যে অসঞ্ছিবান্বয়মুত্তরেমাভি বাজান্ ॥১০॥

অপাঘমপ কিল্বিষমপ কৃত্যামপো রপঃ । অপামার্গ ত্বমস্মদপ দুঃষ্বপ্ন্যং সুব ॥১১॥

সুমিত্রিয়া ন আপ ওষধয়ঃ সন্তু দুর্মিত্রিয়াস্তস্মৈ সন্তু যোঽস্মান্দ্বেষ্টি যং চ বয়ং দ্বিষ্মঃ ॥১২॥

অনড্বাহমন্বারভামহে সৌরভেয়ং স্বস্তয়ে । স ন ইন্দ্র ইব দেবেভ্যো বহ্নিঃ সন্তারণো ভব ॥১৩॥

উদ্বয়ং তমসস্পরি স্বঃ পশ্যন্ত উত্তরম্ ।
দেবং দেবত্রা সূর্যমগন্ম জ্যোতিরুত্তমম্ ॥১৪॥

ইমং জীবেভ্যঃ পরিধিং দধামি মৈষাং নু গাদপরো অর্থমেতম্ ।
শতং জীবন্তু শরদঃ পুরূচীরন্তর্মৃত্যুং দধতাং পর্বতেন ॥১৫॥

অগ্ন আয়ূংষি পবস্ব আ সুবোর্জমিষং চ নঃ । আরে বাধস্ব দুচ্ছুনাম্ ॥১৬॥

আয়ুষ্মানগ্নে হবিষা বৃধানো ঘৃতপ্রতীকো ঘৃতয়োনিরেধি ।
ঘৃতং পীত্বা মধু চারু গব্যং পিতেব পুত্রমভি রক্ষতাদিমান্ত্স্বাহা ॥১৭॥

পরীমে গামনেষত পর্যগ্নিমহৃষত । দেবেষ্বক্রত শ্রবঃ ক ইমাঁ২ আ দধর্ষতি ॥১৮॥

ক্রব্যাদমগ্নিং প্র হিণোমি দূরং যমরাজ্যং গচ্ছতু রিপ্রবাহঃ ।
ইহৈবায়মিতরো জাতবেদা দেবেভ্যো হব্যং বহতু প্রজানন্ ॥১৯॥

বহ বপাং জাতবেদঃ পিতৃভ্যো যত্রৈনান্বেত্থ নিহিতান্ পরাকে ।
মেদসঃ কুল্যা উপ তান্ত্স্রবন্তু সত্যা এষামাশিষঃ সং নমন্তাং স্বাহা ॥২০॥

স্যোনা পৃথিবি নো ভবানৃক্ষরা নিবেশনী । যচ্ছা নঃ শর্ম সপ্রথাঃ ।
অপ নঃ শোশুচদঘম্ ॥২১॥

অস্মাত্ত্বমধি জাতোঽসি ত্বদয়ং জায়তাং পুনঃ । অসৌ স্বর্গায় লোকায় স্বাহা ॥২২॥