Utshovঅধ্যায় 34
34.1
যজ্জাগ্রতো দূরমুদৈতি দৈবং তদু সুপ্তস্য তথৈবৈতি ।
দূরঙ্গমং জ্যোতিষাং জ্যোতিরেকং তন্মে মনঃ শিবসঙ্কল্পমস্তু ॥১॥
34.2
যেন কর্মাণ্যপসো মনীষিণো যজ্ঞে কৃণ্বন্তি বিদথেষু ধীরাঃ ।
যদপূর্বং যক্ষমন্তঃ প্রজানাং তন্মে মনঃ শিবসঙ্কল্পমস্তু ॥২॥
34.3
যত্প্রজ্ঞানমুত চেতো ধৃতিশ্চ যজ্জ্যোতিরন্তরমৃতং প্রজাসু ।
যস্মান্ন ঋতে কিং চন কর্ম ক্রিয়তে তন্মে মনঃ শিবসঙ্কল্পমস্তু ॥৩॥
34.4
যেনেদং ভূতং ভুবনং ভবিষ্যৎ পরিগৃহীতমমৃতেন সর্বম্ ।
যেন যজ্ঞস্তায়তে সপ্তহোতা তন্মে মনঃ শিবসঙ্কল্পমস্তু ॥৪॥
34.5
যস্মিন্নৃচঃ সাম যজূংষি যস্মিন্ প্রতিষ্ঠিতা রথনাভাবিবারাঃ ।
যস্মিঁশ্চিত্তং সর্বমোতং প্রজানাং তন্মে মনঃ শিবসঙ্কল্পমস্তু ॥৫॥
34.6
সুষারথিরশ্বানিব যন্মনুষ্যান্নেনীয়তেঽভীশুভির্বাজিন ইব ।
হৃত্প্রতিষ্ঠং যদজিরং জবিষ্ঠং তন্মে মনঃ শিবসঙ্কল্পমস্তু ॥৬॥
34.7
পিতুং নু স্তোষং মহো ধর্মাণং তবিষীম্ ।
যস্য ত্রিতো ব্যোজসা বৃত্রং বিপর্বমর্দয়ৎ ॥৭॥
34.8
অন্বিদনুমতে ত্বং মন্যাসৈ শং চ নস্কৃধি ।
ক্রত্বে দক্ষায় নো হিনু প্র ণ আয়ূংষি তারিষঃ ॥৮॥
34.9
অনু নোঽদ্যানুমতির্যজ্ঞং দেবেষু মন্যতাম্ ।
অগ্নিশ্চ হব্যবাহনো ভবতং দাশুষে ময়ঃ ॥৯॥
34.10
সিনীবালি পৃথুষ্টুকে যা দেবানামসি স্বসা ।
জুষস্ব হব্যমাহুতং প্রজাং দেবি দিদিড্ঢি নঃ ॥১০॥
34.11
পঞ্চ নদ্যঃ সরস্বতীমপি যন্তি সস্রোতসঃ ।
সরস্বতী তু পঞ্চধা সো দেশেঽভবত্সরিৎ ॥১১॥
34.12
ত্বমগ্নে প্রথমো অঙ্গিরা ঋষির্দেবো দেবানামভবঃ শিবঃ সখা ।
তব ব্রতে কবয়ো বিদ্মনাপসোঽজায়ন্ত মরুতো ভ্রাজদৃষ্টয়ঃ ॥১২॥
34.13
ত্বং নো অগ্নে তব দেব পায়ুভির্মঘোনো রক্ষ তন্বশ্চ বন্দ্য ।
ত্রাতা তোকস্য তনয়ে গবামস্যনিমেষং রক্ষমাণস্তব ব্রতে ॥১৩॥
34.14
উত্তানায়ামব ভরা চিকিত্বান্ত্সদ্যঃ প্রবীতা বৃষণং জজান ।
অরুষস্তূপো রুশদস্য পাজ ইডায়াস্পুত্রো বয়ুনেঽজনিষ্ট ॥১৪॥
34.15
ইডায়াস্ত্বা পদে বয়ং নাভা পৃথিব্যা অধি ।
জাতবেদো নিধীমহ্যগ্নে হব্যায় বোঢবে ॥১৫॥
34.16
প্র মন্মহে শবসানায় শূষমাঙ্গূষং গির্বণসে অঙ্গিরস্বৎ ।
সুবৃক্তিভি স্তুবত ঋগ্মিয়ায়ার্চামার্কং নরে বিশ্রুতায় ॥১৬॥
34.17
প্র বো মহে মহি নমো ভরধ্বমাঙ্গূষ্যং শবসানায় সাম ।
যেনা নঃ পূর্বে পিতরঃ পদজ্ঞা অর্চন্তো অঙ্গিরসো গা অবিন্দন্ ॥১৭॥
34.18
ইচ্ছন্তি ত্বা সোম্যাসঃ সখায়ঃ সুন্বন্তি সোমং দধতি প্রয়াংসি ।
তিতিক্ষন্তে অভিশস্তিং জনানামিন্দ্র ত্বদা কশ্চন হি প্রকেতঃ ॥১৮॥
34.19
ন তে দূরে পরমা চিদ্রজাংস্যা তু প্র যাহি হরিবো হরিভ্যাম্ ।
স্থিরায় বৃষ্ণে সবনা কৃতেমা যুক্তা গ্রাবাণঃ সমিধানে অগ্নৌ ॥১৯॥
34.20
অষাঢং যুত্সু পৃতনাসু পপ্রিং স্বর্ষামপ্সাং বৃজনস্য গোপাম্ ।
ভরেষুজাং সুক্ষিতিং সুশ্রবসং জয়ন্তং ত্বামনু মদেম সোম ॥২০॥
34.21
সোমো ধেনুং সোমো অর্বন্তমাশুং সোমো বীরং কর্মণ্যং দদাতি ।
সাদন্যং বিদথ্যং সভেয়ং পিতৃশ্রবণং যো দদাশদস্মৈ ॥২১॥
34.22
ত্বমিমা ওষধীঃ সোম বিশ্বাস্ত্বমপো অজনয়স্ত্বং গাঃ ।
ত্বমা ততন্থোর্বন্তরিক্ষং ত্বং জ্যোতিষা বি তমো ববর্থ ॥২২॥
34.23
দেবেন নো মনসা দেব সোম রায়ো ভাগং সহসাবন্নভি যুধ্য ।
মা ত্বা তনদীশিষে বীর্যস্যোভয়েভ্যঃ প্রচিকিত্সা গবিষ্টৌ ॥২৩॥
34.24
অষ্টৌ ব্যখ্যৎ ককুভঃ পৃথিব্যাস্ত্রী ধন্ব যোজনা সপ্ত সিন্ধূন্ ।
হিরণ্যাক্ষঃ সবিতা দেব আগাদ্দধদ্রত্না দাশুষে বার্যাণি ॥২৪॥
34.25
হিরণ্যপাণিঃ সবিতা বিচর্ষণিরুভে দ্যাবাপৃথিবী অন্তরীয়তে ।
অপামীবাং বাধতে বেতি সূর্যমভি কৃষ্ণেন রজসা দ্যামৃণোতি ॥২৫॥
34.26
হিরণ্যহস্তো অসুরঃ সুনীথঃ সুমৃডীকঃ স্ববাঁ যাত্বর্বাঙ্ ।
অপসেধন্ রক্ষসো যাতুধানানস্থাদ্দেবঃ প্রতিদোষং গৃণানঃ ॥২৬॥
34.27
যে তে পন্থাঃ সবিতঃ পূর্ব্যাসোঽরেণবঃ সুকৃতা অন্তরিক্ষে ।
তেভির্নো অদ্য পথিভিঃ সুগেভী রক্ষা চ নো অধি চ ব্রূহি দেব ॥২৭॥
34.28
উভা পিবতমশ্বিনোভা নঃ শর্ম যচ্ছতম্ । অবিদ্রিয়াভিরূতিভিঃ ॥২৮॥
34.29
অপ্নস্বতীমশ্বিনা বাচমস্মে কৃতং নো দস্রা বৃষণা মনীষাম্ ।
অদ্যূত্যেঽবসে নি হ্বয়ে বাং বৃধে চ নো ভবতং বাজসাতৌ ॥২৯॥
34.30
দ্যুভিরক্তুভিঃ পরি পাতমস্মানরিষ্টেভিরশ্বিনা সৌভগেভিঃ ।
তন্নো মিত্রো বরুণো মামহন্তামদিতিঃ সিন্ধুঃ পৃথিবী উত দ্যৌঃ ॥৩০॥
34.31
আ কৃষ্ণেন রজসা বর্তমানো নিবেশয়ন্নমৃতং মর্ত্যং চ ।
হিরণ্যয়েন সবিতা রথেনা দেবো যাতি ভুবনানি পশ্যন্ ॥৩১॥
34.32
আ রাত্রি পার্থিবং রজঃ পিতুরপ্রায়ি ধামভিঃ ।
দিবঃ সদাংসি বৃহতী বি তিষ্ঠস আ ত্বেষং বর্ততে তমঃ ॥৩২॥
34.33
উষস্তচ্চিত্রমা ভরাস্মভ্যং বাজিনীবতি । যেন তোকং চ তনয়ং চ ধামহে ॥৩৩॥
34.34
প্রাতরগ্নিং প্রাতরিন্দ্রং হবামহে প্রাতর্মিত্রাবরুণা প্রাতরশ্বিনা ।
প্রাতর্ভগং পূষণং ব্রহ্মণস্পতিং প্রাতঃ সোমমুত রুদ্রং হুবেম ॥৩৪॥
34.35
প্রাতর্জিতং ভগমুগ্রং হুবেম বয়ং পুত্রমদিতের্যো বিধর্তা ।
আধ্রশ্চিদ্যং মন্যমানস্তুরশ্চিদ্রাজা চিদ্যং ভগং ভক্ষীত্যাহ ॥৩৫॥
34.36
ভগ প্রণেতর্ভগ সত্যরাধো ভগেমাং ধিয়মুদবা দদন্নঃ ।
ভগ প্র নো জনয় গোভিরশ্বৈর্ভগ প্র নৃভির্নৃবন্তঃ স্যাম ॥৩৬॥
34.37
উতেদানীং ভগবন্তঃ স্যামোত প্রপিত্ব উত মধ্যে অহ্নাম্ ।
উতোদিতা মঘবন্ত্সূর্যস্য বয়ং দেবানাং সুমতৌ স্যাম ॥৩৭॥
34.38
ভগ এব ভগবাঁ২ অস্তু দেবাস্তেন বয়ং ভগবন্তঃ স্যাম ।
তং ত্বা ভগ সর্ব ইজ্জোহবীতি স নো ভগ পুর এতা ভবেহ ॥৩৮॥
34.39
সমধ্বরায়োষসো নমন্ত দধিক্রাবেব শুচয়ে পদায় ।
অর্বাচীনং বসুবিদং ভগং নো রথমিবাশ্বা বাজিন আ বহন্তু ॥৩৯॥
34.40
অশ্বাবতীর্গোমতীর্ন উষাসো বীরবতীঃ সদমুচ্ছন্তু ভদ্রাঃ ।
ঘৃতং দুহানা বিশ্বতঃ প্রপীতা যূয়ং পাত স্বস্তিভিঃ সদা নঃ ॥৪০॥
34.41
পূষন্ তব ব্রতে বয়ং ন রিষ্যেম কদা চন । স্তোতারস্ত ইহ স্মসি ॥৪১॥
34.42
পথস্পথঃ পরিপতিং বচস্যা কামেন কৃতো অভ্যানডর্কম্ ।
স নো রাসচ্ছুরুধশ্চন্দ্রাগ্রা ধিয়ং – ধিয়ং সীষধাতি প্র পূষা ॥৪২॥
34.43
ত্রীণি পদা বি চক্রমে বিষ্ণুর্গোপা অদাভ্যঃ । অতো ধর্মাণি ধারয়ন্ ॥৪৩॥
34.44
তদ্বিপ্রাসো বিপন্যবো জাগৃবাংসঃ সমিন্ধতে । বিষ্ণোর্যত্পরমং পদম্ ॥৪৪॥
34.45
ঘৃতবতী ভুবনানামভিশ্রিয়োর্বী পৃথ্বী মধুদুঘে সুপেশসা ।
দ্যাবাপৃথিবী বরুণস্য ধর্মণা বিষ্কভিতে অজরে ভূরিরেতসা ॥৪৫॥
34.46
যে নঃ সপত্না অপ তে ভবন্ত্বিন্দ্রাগ্নিভ্যামব বাধামহে তান্ ।
বসবো রুদ্রা আদিত্যা উপরিস্পৃশং মোগ্রং চেত্তারমধিরাজমক্রন্ ॥৪৬॥
34.47
আ নাসত্যা ত্রিভিরেকাদশৈরিহ দেবেভির্যাতং মধুপেয়মশ্বিনা ।
প্রায়ুস্তারিষ্টং নী রপাংসি মৃক্ষতং সেধতং দ্বেষো ভবতং সচাভুবা ॥৪৭॥
34.48
এষ ব স্তোমো মরুত ইয়ং গীর্মান্দার্যস্য মান্যস্য কারোঃ ।
এষা যাসীষ্ট তন্বে বয়াং বিদ্যামেষং বৃজনং জীরদানুম্ ॥৪৮॥
34.49
সহস্তোমাঃ সহচ্ছন্দস আবৃতঃ সহপ্রমা ঋষয়ঃ সপ্ত দৈব্যাঃ ।
পূর্বেষাং পন্থামনুদৃশ্য ধীরা অন্বালেভিরে রথ্যো ন রশ্মীন্ ॥৪৯॥
34.50
আয়ুষ্যং বর্চস্যং রায়স্পোষমৌদ্ভিদম্ । ইদং হিরণ্যং বর্চস্বজ্জৈত্রায়াবিশতাদু মাম্ ॥৫০॥
34.51
ন তদ্রক্ষাংসি ন পিশাচাস্তরন্তি দেবানামোজঃ প্রথমজং হ্যেতৎ ।
যো বিভর্তি দাক্ষায়ণং হিরণ্যং স দেবেষু কৃণুতে দীর্ঘমায়ুঃ স মনুষ্যেষু কৃণুতে দীর্ঘমায়ুঃ ॥৫১॥
34.52
যদাবধ্নন্ দাক্ষায়ণা হিরণ্যং শতানীকায় সুমনস্যমানাঃ ।
তন্ম আ বধ্নামি শতশারদায়ায়ুষ্মাঞ্জরদষ্টির্যথাসম্ ॥৫২॥
34.53
উত নোঽহির্বুধ্ন্যঃ শৃণোত্বজ একপাত্পৃথিবী সমুদ্রঃ ।
বিশ্বে দেবা ঋতাবৃধো হুবানা স্তুতা মন্ত্রাঃ কবিশস্তা অবন্তু ॥৫৩॥
34.54
ইমা গির আদিত্যেভ্যো ঘৃতস্নূঃ সনাদ্রাজভ্যো জুহ্বা জুহোমি ।
শৃণোতু মিত্রো অর্যমা ভগো নস্তুবিজাতো বরুণো দক্ষো অংশঃ ॥৫৪॥
34.55
সপ্ত ঋষয়ঃ প্রতিহিতাঃ শরীরে সপ্ত রক্ষন্তি সদমপ্রমাদম্ ।
সপ্তাপঃ স্বপতো লোকমীয়ুস্তত্র জাগৃতো অস্বপ্নজৌ সত্রসদৌ চ দেবৌ ॥৫৫॥
34.56
উত্তিষ্ঠ ব্রহ্মণস্পতে দেবয়ন্তস্ত্বেমহে । উপ প্র যন্তু মরুতঃ সুদানব ইন্দ্র প্রাশূর্ভবা সচা ॥৫৬॥
34.57
প্র নূনং ব্রহ্মণস্পতির্মন্ত্রং বদত্যুক্থ্যম্ । যস্মিন্নিন্দ্রো বরুণো মিত্রো অর্যমা দেবা ওকাংসি চক্রিরে ॥৫৭॥
34.58
ব্রহ্মণস্পতে ত্বমস্য যন্তা সূক্তস্য বোধি তনয়ং চ জিন্ব ।
বিশ্বং তদ্ভদ্রং যদবন্তি দেবা বৃহদ্বদেম বিদথে সুবীরাঃ ।।
য ইমা বিশ্বা বিশ্বকর্মা যো নঃ পিতা ঽন্নপতেঽন্নস্য নো দেহি ॥৫৮॥